Ap First Model Anganwadi: ఏపీలో తొలి మోడల్ అంగన్వాడీ కేంద్రం.. రామ్ చరణ్, ఉపాసన దంపతుల చొరవ.. నేడు స్మృతి ఇరానీ చేతుల మీదుగా ప్రారంభం!
రామ్ చరణ్, ఉపాసన దంపతుల సహకారంతో అపోలో ఆరంభ్ ఆధ్వర్యంలో రూపొందించిన ఆంధ్రప్రదేశ్ తొలి మోడల్ అంగన్వాడీ(Ap First Model Anganwadi) కేంద్రాన్ని మాజీ కేంద్ర మంత్రి స్మృతి ఇరానీ ప్రారంభించనున్నారు.
- V Santhosh Kumar
- Published on- November 20, 2026 / 10:36 AM IST
Smriti irani inaugurating ap's first model anganwadi centre in pithapuram
Ap First Model Anganwadi: సామాజిక సేవా కార్యక్రమాల్లో ఎప్పుడూ ముందుండే మెగా పవర్ స్టార్ రామ్ చరణ్, ఉపాసన కొణిదెల దంపతులు ఆంధ్రప్రదేశ్లోని చిన్నారుల సంక్షేమం కోసం మరో గొప్ప ముందడుగు వేశారు. అపోలో హాస్పిటల్స్కు చెందిన ‘అపోలో ఆరంభ్’ (Apollo Aarambh) చొరవతో, రామ్ చరణ్, ఉపాసన దంపతుల సహకారంతో రాష్ట్రంలోనే తొలి ‘మోడల్ అంగన్వాడీ కేంద్రాన్ని(Ap First Model Anganwadi)’ అత్యంత ఆధునికంగా తీర్చిదిద్దారు. చిన్నారుల ప్రాథమిక ఆరోగ్యం, పౌష్టికాహారం, బాల్య దశ సంరక్షణపై (Early Childhood Care) ప్రత్యేక దృష్టి సారిస్తూ రూపొందించిన ఈ కేంద్రాన్ని నవంబర్ 20న (నేడు) మాజీ కేంద్ర మంత్రి స్మృతి జుబిన్ ఇరానీ ఘనంగా ప్రారంభించనున్నారు.
పవన్ కళ్యాణ్ మార్గదర్శకత్వంలో సేవా కార్యక్రమం.. మెగా అభిమానుల్లో హర్షం:
ఆంధ్రప్రదేశ్ ఉప ముఖ్యమంత్రి కొణిదెల పవన్ కళ్యాణ్ మార్గదర్శకత్వంలో రూపుదిద్దుకున్న ఈ ప్రతిష్టాత్మక కార్యక్రమంలో స్మృతి ఇరానీతో పాటు ఉపాసన కొణిదెల కూడా పాల్గొంటున్నారు. కేవలం సినిమాలకే పరిమితం కాకుండా, సమాజంలోని పేద పిల్లలు, కుటుంబాల అభ్యున్నతి కోసం కొణిదెల కుటుంబం చూపిస్తున్న అంకితభావానికి ఈ కేంద్రం నిదర్శనమని స్థానికులు, మెగా అభిమానులు హర్షం వ్యక్తం చేస్తున్నారు. ఆధునిక విద్యాబోధన, మెరుగైన వైద్య సదుపాయాలతో కూడిన ఈ మోడల్ అంగన్వాడీ కేంద్రం స్థానిక చిన్నారుల బంగారు భవిష్యత్తుకు ఒక గొప్ప మైలురాయిగా నిలవనుంది.
