AP DSC Application: ఏపీ డీఎస్సీ అభ్యర్థులకు అలర్ట్.. ఆన్‌లైన్ దరఖాస్తుల ప్రక్రియ షురూ.. లాస్ట్ డేట్ ఇదే!

AP DSC Online Application : ఆంధ్రప్రదేశ్‌లో 2,721 ఉపాధ్యాయ పోస్టుల భర్తీకి సంబంధించి డీఎస్సీ ఆన్‌లైన్ దరఖాస్తుల స్వీకరణ ప్రారంభం అయ్యింది.

Ap dsc 2026 online application process begins for 2721 teacher posts

AP DSC Application: ఆంధ్రప్రదేశ్‌లో ప్రభుత్వ ఉపాధ్యాయ కొలువుల కోసం ఎంతో ఆశగా ఎదురుచూస్తున్న నిరుద్యోగ అభ్యర్థులకు పాఠశాల విద్యాశాఖ తీపి కబురు అందించింది. రాష్ట్రంలో మొత్తం 2,721 టీచర్ పోస్టుల భర్తీకి నవంబర్ 5న విడుదలైన నోటిఫికేషన్‌కు అనుగుణంగా, నవంబర్ 11 నుంచి ఆన్‌లైన్ దరఖాస్తుల స్వీకరణ అధికారికంగా ప్రారంభమైందని డీఎస్సీ కన్వీనర్ ఎం.వి. కృష్ణారెడ్డి వెల్లడించారు. అర్హత కలిగిన అభ్యర్థులందరూ చివరి నిమిషంలో సాంకేతిక ఇబ్బందులు తలెత్తకుండా ముందుగానే మేల్కొని, నవంబర్ 30వ తేదీలోగా తమ దరఖాస్తులను ఆన్‌లైన్‌లో సమర్పించాలని అధికారులు సూచించారు. దరఖాస్తు ఫారమ్ నింపే సమయంలో వ్యక్తిగత వివరాలు, విద్యార్హతల సమాచారాన్ని ఎలాంటి పొరపాట్లు లేకుండా అత్యంత జాగ్రత్తగా నమోదు చేయాలని స్పష్టం చేశారు.

*Mahesh Bhagwat: హైదరాబాద్ కొత్త సీపీగా మహేష్ భగవత్ బాధ్యతలు.. శాంతిభద్రతలు, మహిళా భద్రతకే తొలి ప్రాధాన్యత అంటూ వ్యాఖ్య

తొలిరోజే అభ్యర్థుల నుంచి అనూహ్య స్పందన:

ఆన్‌లైన్ అప్లికేషన్ల ప్రక్రియ ప్రారంభమైన తొలిరోజైన నవంబర్ 11న అభ్యర్థుల నుంచి మంచి స్పందన లభించింది. మొదటి రోజే 397 మంది అభ్యర్థులు వివిధ కేటగిరీల్లో మొత్తం 487 పేపర్లకు దరఖాస్తు చేసుకున్నట్లు కృష్ణారెడ్డి తెలిపారు. రానున్న రోజుల్లో దరఖాస్తుల సంఖ్య మరింత భారీగా పెరిగే అవకాశం ఉందని అధికారులు అంచనా వేస్తున్నారు.

అధికారిక వెబ్‌సైట్‌లో పూర్తి సమాచారం అందుబాటులో:

అభ్యర్థుల సౌకర్యార్థం డీఎస్సీకి సంబంధించిన ప్రభుత్వ ఉత్తర్వులు (జీవోలు), ఖాళీల వివరాలు, పరీక్షల షెడ్యూల్, సిలబస్, హెల్ప్‌డెస్క్ నంబర్లను పాఠశాల విద్యాశాఖ ప్రత్యేక వెబ్‌సైట్‌లో పొందుపరిచింది. అభ్యర్థులు దరఖాస్తు చేసే ముందు నోటిఫికేషన్‌లోని అర్హతలు, నిబంధనలను క్షుణ్ణంగా పరిశీలించుకోవాలని విద్యాశాఖ సూచించింది.