Canada Walmart : కెనడాలో భారతీయ జంట హత్య కలకలం.. కాల్పుల తర్వాత కారుకు నిప్పు!

Canada Walmart : కెనడాలోని సర్రే వాల్‌మార్ట్ పార్కింగ్‌లో భారత సంతతికి చెందిన గగన్‌ప్రీత్ రెహల్, సుఖ్‌జీత్ కౌర్ కాల్పుల్లో హత్యకు గురయ్యారు. ఆ తర్వాత కారు దగ్ధం అయింది. పోలీసుల దర్యాప్తు వివరాలివే..

Canada Walmart

  • కెనడా వాల్‌మార్ట్ పార్కింగ్‌లో కాల్పుల కలకలం..
  • షాపింగ్‌కు వెళ్లిన భారతీయ జంట దారుణ హత్య
  • వాల్‌మార్ట్‌కు వెళ్లిన ప్రేమజంటపై బుల్లెట్ల వర్షం
  • ఇంటి నుంచి వెళ్లిన కొద్దిసేపటికే విషాదం..

Canada Walmart : కెనడాలో మరోసారి తుపాకీ కాల్పులు కలకలం రేపాయి. షాపింగ్‌కు వెళ్లిన భారత సంతతికి చెందిన యువ జంటను గుర్తుతెలియని దుండగులు కాల్చి చంపారు. బ్రిటిష్ కొలంబియాలోని సర్రే నగరంలో జరిగిన ఈ ఘటన స్థానికంగా తీవ్ర సంచలనం సృష్టించింది. వాల్‌మార్ట్ స్టోర్ పార్కింగ్ స్థలంలోనే ఈ దారుణం జరగడం అందరినీ షాక్‌కు గురిచేసింది..

అసలేం జరిగింది? :
నవంబర్ 15 రాత్రి సర్రేలోని 88 అవెన్యూ, 124 స్ట్రీట్ సమీపంలోని వాల్‌మార్ట్ పార్కింగ్‌లో ఈ ఘటన చోటుచేసుకుంది. రాత్రి 10.38 గంటల సమయంలో ఓ యువకుడు, యువతి తుపాకీ గాయాలతో పడి ఉన్నట్లు పోలీసులకు సమాచారం అందింది. వెంటనే అక్కడికి చేరుకున్న పోలీసులు, అత్యవసర వైద్య సిబ్బంది వారిని కాపాడేందుకు ప్రయత్నించారు. అయితే, అప్పటికే వారిద్దరి పరిస్థితి విషమించడంతో ఇద్దరూ ప్రాణాలు కోల్పోయారు.

Read Also : Motorola Edge 70 Pro Plus : మోటోరోలా లవర్స్‌కు పండగే.. రూ.47,999 ఫోన్ ఇప్పుడు జస్ట్ రూ. 42,749కే.. ఇంకా తగ్గాలంటే?

ఎవరీ మృతులు? :
మృతులను డెల్టా ప్రాంతానికి చెందిన 23 ఏళ్ల గగన్‌ప్రీత్ (గ్యారీ) రెహల్, 24 ఏళ్ల సుఖ్‌జీత్ కౌర్‌గా గుర్తించారు. పోలీసుల సమాచారం ప్రకారం.. గగన్‌ప్రీత్ గతంలో ఆయుధాలకు సంబంధించిన నేరాల విషయంలో పోలీసులకు పరిచయమున్న వ్యక్తి.. ఈ దాడి యాదృచ్ఛికంగా జరిగింది కాదని, ముందస్తు ప్రణాళికతో లక్ష్యంగా చేసుకుని హత్య చేసి ఉండవచ్చని దర్యాప్తు అధికారులు అనుమానిస్తున్నారు.

కాల్పుల తర్వాత కారుకు నిప్పు :
ఈ ఘటనలో కాల్పులు జరిగిన 15 నిమిషాలకే ప్రిన్సెస్ డ్రైవ్‌లోని 9700 బ్లాక్‌లో ఓ కారు మంటల్లో కాలిపోయింది. ఈ వాహనానికి కాల్పుల ఘటనతో సంబంధం ఉండవచ్చని పోలీసులు భావిస్తున్నారు. నిందితుల కోసం గాలింపు చర్యలు చేపట్టారు.

కొడుకును కోల్పోయిన తండ్రి కన్నీరు :
కుమారుడి మరణవార్త విన్న గగన్‌ప్రీత్ తండ్రి తీవ్ర విషాదంలో మునిగిపోయారు. చివరిసారిగా తన కొడుకును చూడాలనుకుంటున్నానంటూ ఆయన చేసిన వ్యాఖ్యలు అందరినీ కలచివేస్తున్నాయి. ప్రస్తుతం IHIT, సర్రే పోలీసులు సంయుక్తంగా కేసును దర్యాప్తు చేస్తున్నారు. ఈ హత్యల వెనుక అసలు కారణమేంటి? దుండగులు ఎవరు? అనే ప్రశ్నలకు సమాధానాలు తెలియాల్సి ఉంది.