tollywood

10:30 - October 22, 2018

హైదరాబాద్ : రాజకీయాల్లోకి మరో యంగ్ హీరో రానున్నారా ? త్వరలో దేశంలో ఎన్నికలు రానున్న నేపథ్యంలో పలువురు ఎన్నికల బరిలో నిలిచేందుకు ఆసక్తి చూపుతున్నారు. ఏపీలో ఇప్పటికే రాజకీయాలు వేడెక్కుతున్నాయి. ప్రధాన ప్రతిపక్ష నేత జగన్ ప్రజా సంకల్ప యాత్ర పేరిట ప్రజల్లో తిరుగుతున్నారు. పార్టీ స్థాపించి వివిధ జిల్లాల్లో పోరుయాత్ర పేరిట జనసేన అధినేత పవన్ కళ్యాణ్ పర్యటిస్తున్నారు. ప్రభుత్వంపై ఆయా పార్టీల నేతలు విమర్శల వర్షం కురిపిస్తున్నారు. వీటిని అధికార పార్టీ తిప్పికొడుతోంది. తాజాగా టాలీవుడ్ డైలాగ్ కింగ్‌గా పేరొందిన ‘మోహన్ బాబు’ తనయుడు ‘మంచు మనోజ్’ రాజకీయాల్లోకి ఎంట్రీ ఇస్తారనే ప్రచారం జరుగుతోంది. ఇందుకు ఆయన ట్విట్టర్ వేదికగా ‘మీ కోసం నేను’ అంటూ ఓ లేఖను పోస్టు చేయడం ప్రాధాన్యత సంతరించుకుంది. 
మంచు మనోజ్...గత కొంతకాలంగా సినిమాలు ఏమీ చేయడం లేదు. సినిమా కథలు కూడా వినడానికి ఆసక్తి చూపడం లేదని తెలుస్తోంది. సేవా కార్యక్రమాల కోసం తిరుపతికి మకాం మారుస్తున్నానని సంచలన ప్రకటన చేశారు. తిరుపతిలో రైతుల పిల్లలకు విద్యను అందించడంతో పాటు యువతకు తన వంతు సాయం చేస్తానని ప్రకటించడం ప్రాధాన్యత సంతరించుకుంది. 
ఏపీలోని ఇతర ప్రాంతాలతో పాటు తెలంగాణకూ విస్తరిస్తానని మనోజ్ పేర్కొన్నారు. గతంలో తాను సినిమాలు చేయబోనని సంచలన ప్రకటన చేసి తిరిగి వెనక్కి తీసుకున్న సంగతి తెలిసిందే. ప్రస్తుతం ఆయన రాజకీయాల వైపు అడుగులు వేస్తున్నారని ప్రచారం జరుగుతోంది. కానీ తన సినిమా, రాజకీయ జీవితంపై ఎలాంటి తీర్మానాలు చేయవద్దని లేఖలో పేర్కొన్నారు. సినిమాలపై తన ఆసక్తి తగ్గదని..విలక్షణ పాత్రలు పాత్రలు చేసి ప్రేక్షకులను మెప్పించాలన్నదే తపన అని తెలిపారు. ఛివరగా రాయలసీమకు వస్తున్నా..రాగి సంగటి..మటన్ పులుసు సిద్ధం చేయండని తన అభిమానులకు సూచించారు. మరి రాజకీయాల్లోకి వస్తారా ?  రారా ? అనేది తెలుసుకోవాలంటే కొద్ది రోజులు ఆగాల్సిందే. 

09:55 - October 21, 2018

హైదరాబాద్: టాలీవుడ్‌లో విషాదం నెలకొంది. ప్రముఖ క్యారెక్టర్ నటుడు వైజాగ్ ప్రసాద్ కన్నుమూశారు. ఆదివారం తెల్లవారుజామున 3 గంటల సమయంలో ఆయన మరణించారు. అకస్మాత్తుగా గుండెపోటు రావడంతో నిమ్స్‌ ఆసుపత్రికి తరలించారు. చికిత్సపొందుతూ కాసేపటికే ఆయన కన్నుమూశారు. ప్రసాద్ వయసు 75 సంవత్సరాలు. ఆయనకు భార్య విద్యావతి, ఇద్దరు పిల్లలు రత్నప్రభ, రత్నకుమార్ ఉన్నారు. గత రెండేళ్లుగా ప్రసాద్ అనారోగ్యంతో బాధపడుతున్నారు. 

వైజాగ్ ప్రసాద్ అసలు పేరు కొర్లాం పార్వతీ వరప్రసాదరావు. విశాఖపట్నంలోని గోపాలపట్నం ఆయన స్వస్థలం. వైజాగ్‌ నుంచి వచ్చారు కాబట్టి వైజాగ్‌ ప్రసాద్‌గా ఆయన పేరు స్థిరపడిపోయింది. ప్రసాద్‌ తండ్రి ఉపాధ్యాయుడు. తల్లిదండ్రులకు ముగ్గురు అమ్మాయిల తర్వాత నాలుగో సంతానంగా జన్మించారు. ఊహ తెలియక ముందే తల్లి కన్నుమూసింది. మేనమామ దగ్గరుండి ఎస్‌ఎస్‌ఎల్‌సీ దాకా చదువుకున్నారు. చదువుకునే రోజుల నుంచే నాటకాల్లో నటించేవారు. నాటకాల పిచ్చితో అగ్రికల్చర్‌ బీఎస్‌సీ సీటు, ఎంబీబీఎస్‌ సీటు పోగొట్టుకున్నారని సన్నిహితులు చెబుతారు. 

1983లో వచ్చిన బాబాయ్‌ అబ్బాయ్‌‌ నటుడిగా ఆయన మొదటి సినిమా. కొన్ని వందల చిత్రాల్లో నటించిన ఆయన, టీవీ సీరియల్స్‌లోనూ పలు కీలకమైన పాత్రలు పోషించి తెలుగు అభిమానులకు వినోదాన్ని అందించారు. రంగస్థలం నుంచి వెండితెరకు వచ్చిన వైజాగ్ ప్రసాద్ తేజ దర్శకత్వంలో వచ్చిన 'నువ్వు నేను'లో హీరో ఉదయ్ కిరణ్ తండ్రి పాత్రను పోషించి, మెప్పించారు. తర్వాత వరుసగా అవకాశాలను పొందారు. భద్ర, జై చిరంజీవ, గౌరి, జానకీ వెడ్స్ శ్రీరామ్ తదితర చిత్రాల్లో నటనతో గుర్తింపు పొందారు.

కాగా, ప్రసాద్ పిల్లలు రత్నప్రభ అమెరికాలో, రత్నకుమార్ లండన్ లో నివాసం ఉంటుఃన్నారు. వారికి కబురు చేశామని, వారు వచ్చాక అంత్యక్రియలు జరుగుతాయని ప్రసాద్ కుటుంబీకులు తెలిపారు. వైజాగ్ ప్రసాద్ మృతికి టాలీవుడ్ సంతాపం వెలిబుచ్చింది.

07:34 - October 15, 2018

హైదరాబాద్ : తిత్లీ తుపానుతో అతలాకుతలం అయిన శ్రీకాకుళం జిల్లాను ఆదుకునేందుకు టాలీవుడ్ నటుడు విజయ్ దేవరకొండ ముందుకొచ్చారు. తుపాను బాధితులకు తనవంతు సాయం ప్రకటించాడు. ముఖ్యమంత్రి సహాయనిధికి రూ.5 లక్షలు అందించాడు. ఈ మేరకు ట్విట్టర్‌ ద్వారా తెలిపారు. అంతేకాకుండా తిత్లీ తుపాను కారణంగా దెబ్బతిన్న సిక్కోలును ఆదుకోవావడానికి ముందుకు రావాలంటూ అభిమానులకు పిలుపునిచ్చారు. ఆయన పిలుపుతో పలువురు అభిమానులు ముఖ్యమంత్రి సహాయనిధికి విరాళాలు అందించారు. బాధితులను ఆదుకునేందుకు ముందుకొచ్చిన విజయ్‌దేవరకొండపై ప్రజలు ప్రశంసల వర్షం కురుపిస్తున్నారు. ఇండస్ట్రీ నుంచి మరింతమంది ముందుకు వచ్చి శ్రీకాకుళం ప్రజలను ఆదుకోవాలని కోరుతున్నారు.

ఇటీవలే వరదలతో అతలాకుతలమైన కేరళకు విజయ్‌దేవరకొండ రూ.5 లక్షల విరాళం ప్రకటించాడు. తనకు వచ్చిన తొలి ఫిలింఫేర్ అవార్డును వేలం వేయగా వచ్చిన రూ.25 లక్షలను ముఖ్యమంత్రి సహాయనిధికి అందించిన సంగతి తెలిసిందే.

 

14:25 - October 8, 2018

ముంబయి: టాలీవుడ్, కోలీవుడ్, బాలీవుడ్.. అనే తేడా లేదు.. అన్ని సినీ ప‌రిశ్ర‌మ‌ల్లోనూ లైంగిక వేధింపుల వ్య‌వ‌హారం వెలుగులోకి వ‌స్తోంది. త‌మపై లైంగిక వేధింపులు జ‌రిగిన‌ట్టు పలువురు హీరోయిన్లు, న‌టీమ‌ణులు బ‌య‌ట‌పెడుతున్నారు. క్యాస్టింగ్ కౌచ్ గురించి శ్రీరెడ్డి చేసిన వ్యాఖ్య‌లు క‌ల‌క‌లం రేపాయి. బాలీవుడ్ న‌టి త‌నూశ్రీ ద‌త్తా చేసిన కామెంట్స్ కూడా ర‌చ్చ ర‌చ్చ చేస్తున్నాయి. ఈ నేపథ్యంలో ప్రముఖ దక్షిణాది నేపథ్య గాయని చిన్మయి శ్రీపాద కూడా తన జీవితంలో ఎదురైన లైంగిక వేధింపులపై పెదవి విప్పింది. ట్విట్టర్ వేదికగా ఆమె తన స్పందన తెలియజేసింది.  8-9 ఏళ్ల వయస్సులో అమ్మతో కలిసి ఒక రికార్డింగ్‌ స్టూడియోకు వెళ్లానని, అక్కడ తను నిద్రపోతున్నప్పుడు ఎవరో తడుముతున్నట్టు గుర్తించానని, ఆ విషయాన్ని అమ్మతో కూడా చెప్పానని పేర్కొంది. అలాగే 10-11 ఏళ్ల వయసులో ఉన్న‌ప్పుడు సంగీత కచేరీ చూస్తుండగా ఒక ముసలాయన తన తొడపై గిల్లాడని వెల్లడించింది.
 
ఇక తాజాగా తన అభిప్రాయాలకు మద్దుతు తెలిపే నెపంతో ఒక వ్యక్తి మాటలతోనే లైంగికంగా వేధించడం మొదలుపెట్టాడని ఆమె ఆవేదన వ్యక్తం చేసింది. డార్లింగ్‌, స్వీట్‌హార్ట్‌ అంటూ పిలవడంతో అతన్ని దూరంగా పెట్టానని, అయితే ఇప్పుడు తనకు వ్యతిరేకంగా ప్రచారం చేయడం మొదలుపెట్టాడని చిన్మయి ఆవేద‌న వ్య‌క్తం చేసింది.

సింగ‌ర్ చిన్మయి చేసిన వ్యాఖ్య‌లు ఇండ‌స్ట్రీలో హాట్ టాపిక్ గా మారాయి. చిన్మ‌యిని వేధింపుల‌కు గురి చేసిన ఆ వ్య‌క్తి ఎవ‌రా? అనే చ‌ర్చ జ‌రుగుతోంది.

16:40 - October 4, 2018

ముంబై : క్యాస్టింగ్ కౌచ్ ఈ పదం గత కొంతకాలంగా సంచలనంగా మారిపోయింది. అన్ని రకాల పనిప్రదేశాలలోను ఈ మాట సర్వసాధారణంగా మారిపోయింది. మహిళలను ఆ కోణంలో తప్ప మరో కోణంలో చూడలేని దౌర్భాగ్యపు సమాజంలో ఈ మాట కామన్ గా మారిపోయింది. దీని బారిన పడిన మహిళలు కొందరు మౌనంగా భరిస్తుంటే కొందరు మాత్రం బహిరంగంగా చెప్పటమే కాక ‘మీ టు’ వంటి ఉద్యమంలో పాల్గొని దీన్ని తీవ్రంగా ఖండిస్తున్నారు. దీనిపై పలువురు పలు విధాలుగా తమ అభిప్రాయాలను వ్యక్తంచేస్తున్నారు. క్యాస్టింగ్ కౌచ్ అనేది సామాన్యులకు ఒకలా సెలబ్రిటీలకు ఒకలా బాదించదు. ఆ బాధ అందరికీ ఒక్కటే. కానీ సెలబ్రిటీలు ఈ విషయంపై మాట్లాడితే అది మరింతగా ప్రచారం అవుతుంది. ఈ నేపథ్యంలో బాలీవుడ్ పాపులర్ తార కాజోల్ కూడా తన అభిప్రాయాన్ని వెల్లడించింది. 
తనుశ్రీ దత్తా-నానా పటేకర్ లైంగిక వేధింపుల వ్యవహారంపై ఇప్పుడు బాలీవుడ్ లో సంచలనంగా మారింది. ఈ క్రమంలో లైంగిక వేధింపులు ప్రతి చోటా ఉన్నాయని బాలీవుడ్ హీరోయిన్ కాజోల్ అభిప్రాయపడింది. ఈ వేధింపులు కేవలం సినీ పరిశ్రమకే పరిమితం కాలేదనీ, అన్నిచోట్లా జరుగుతున్నాయని పేర్కొంది. 
తానెప్పుడూ ఇండస్ట్రీలో లైంగిక వేధింపులను ఎదుర్కొనలేదనీ..కానీ తన కళ్లముందు ఈ రకమైన వేధింపులు జరిగితే చూస్తూ ఊరుకోబోనని తేల్చిచెప్పింది.  విదేశాల్లో వచ్చిన ‘మీ టూ’ తరహా ఉద్యమం మన దేశంలో కూడా రావాల్సిన అవసరం ఉందని కాజోల్ అభిప్రాయపడింది. ఇది మనకు చాలా అవసరమని కాజోల్ పేర్కొంది. 
 

21:14 - October 1, 2018

ముంబై : క్యాస్టింగ్ కౌచ్ వివాదం సినిమా పరిశ్రను కుదిపివేస్తోంది. టాలీవుడ్ లో శ్రీరెడ్డితో మరోసారి మొదలైన ఈ రచ్చ బాలివుడ్ లో కూడా గత కొన్ని రోజుల నుండి వివాదాస్పదమవుతోంది. దాదాపు అన్ని భాషాల్లోని సినిమా పరిశ్రమపై ఈ అంశం సంచలనంగా మారుతోంది. ఈ నేపథ్యంలో  బాలీవుడ్ లో హీరోయిన్ తనుశ్రీ దత్తా క్యాస్టింగ్ కౌచ్ వ్యవహారం రోజుకో మలుపు తిరుగుతోంది. తనను సీనియర్ నటుడు నానా పటేకర్ లైంగికంగా వేధించాడని తనుశ్రీ దత్తా ఆరోపించిన సంగతి తెలిసిందే. అలాగే  కొరియోగ్రాఫర్ గణేశ్ ఆచార్య కూడా తనను లైంగికంగా వేధించాడని ఆమె తెలిపింది.  దీంతో ఈ వివాదంపై సల్మాన్ ఖాన్, ఆమిర్ ఖాన్, సోనమ్ కపూర్, ప్రియాంక చోప్రా తనుశ్రీ దత్తాకు మద్దతుగా నిలిచారు. అయితే ఈ వివాదంపై బిగ్ బీ అమితాబ్ బచ్చన్ స్పందించేందుకు నిరాకరించారు. ఈ వివాదంపై మాట్లాడటానికి తాను తను శ్రీ దత్తాను కానీ, నానా పటేకర్ ను కానీ కాదని స్పష్టం చేశారు. దీంతో అమితాబ్ వ్యాఖ్యలపై తనుశ్రీ దత్తా తీవ్ర ఆవేదన వ్యక్తం చేసింది. అమ్మాయిల సమస్యల గురించి స్పందించని అమితాబ్ లాంటి వ్యక్తులు సామాజిక కథాంశాల ఆధారంగా ‘పింక్’ వంటి సినిమాలు తీస్తున్నారని విమర్శించింది. ఇలాంటి వ్యక్తులు నిజజీవితంలో కళ్ల ఎదుట జరిగే దారుణాన్ని ప్రశ్నించరనీ, కళ్లు మూసుకుంటారని..ఇటువంటివారు సినిమాల్లో హీరోలు..నిజ జీవితంలో జీరోలు అని వ్యాఖ్యానించింది. క్యాస్టింగ్ కౌచ్ వ్యవహారంపై తాను చివరివరకూ పోరాడుతానని స్పష్టం చేసింది. 
మహారాష్ట్ర, ముంబై, బాలివుడ్, క్యాస్టింగ్ కౌచ్, తనుశ్రీదత్తా, నానా పటేకర్, అమితాబచ్చన్,టాలీవుడ్, శ్రీరెడ్డి, Maharashtra, Mumbai, Bollywood, Casting Cowch, Tanushree Datta, Nana Patekar, Amitabhachan,Tollywood, Sri Reddy

 

10:31 - September 26, 2018

వైరైటీ స్టైల్‌తో దూసుకపోతున్న నటుల్లో ఒకరు విజయ్ దేవరకొండ. ఇతని చిత్రాలు విజయవంతం కావడంతో పలువురు దర్శకులు ఇతనితో సినిమాలు చేయాలని తహతహలాడుతున్నారు. తాజాగా ఆయన నటించిన ‘నోటా’ విడుదలకు సిద్ధమౌతోంది. ఇదిలా ఉంటే సామాజిక మాధ్యమాల్లో ఓ వార్త చక్కర్లు కొడుతోంది. ఇటీవలే మృతి చెందిన ప్రముఖ బాలీవుడ్ నటి శ్రీదేవి కూతురు విజయ్ దేవరకొండతో జత కడుతోందని వార్తలు వెలువడుతున్నాయి. 
అలనాటి అందాలతార శ్రీదేవి హఠాన్మరణం చెందిన సంగతి తెలిసిందే. ఈమె కూతుళ్లను వెండితెరకు పరిచయం చేయాలని శ్రీదేవి భావించింది. 'ధడక్‌' చిత్రంతో బాలీవుడ్‌లోకి జాన్వి అడుగు పెట్టిన సంగతి తెలిసిందే. తాజాగా తెలుగులో విజయ్ దేవరకొండ హీరోగా నిర్మాణమయ్యే చిత్రంలో జాన్వీ నటించబోతున్నట్లు టాక్. కానీ దీనిపై అధికారికంగా ప్రకటన రావాల్సి ఉంది. ప్రస్తుతం జాన్వి 'తఖ్త్‌' అనే చారిత్రక చిత్రంలో నటించబోతున్నారు. ఈ సినిమాలో కరీనా కపూర్‌, విక్కీ కౌశల్‌, ఆలియా భట్‌, రణ్‌వీర్‌ సింగ్‌, భూమి పెడ్నేకర్‌ ప్రధాన పాత్రలు పోషించనున్నారు.

12:36 - September 11, 2018

టాలీవుడ్ యంగ్ టైగర్ జూ.ఎన్టీఆర్...మాట మాంత్రికుడు త్రివిక్రమ్ శ్రీనివాస్ కాంబినేషన్ లో రూపొందుతున్న అరవింద సేమత సినిమా షూటింగ్ చివరి దశకు చేరుకుంది. ఇటీవలే ఈ చిత్రానికి సంబంధించిన టీజర్ విడుదలైన సంగతి తెలిసిందే. సినిమాలో ఎన్టీఆర్ ఆరు పలకలతో కనిపించడం అభిమానులను అలరిస్తోంది. ఎన్టీఆర్ సరసన పూజాహెగ్డే నటిస్తోంది. అక్టోబర్ మాసంలో చిత్రాన్ని విడుదల చేయాలని చిత్ర యూనిట్ భావిస్తోంది. 
తాజాగా చిత్ర యూనిట్ ఆడియో వేడుకపై దృష్టి పెట్టింది. వేడుకకు ముఖ్యఅతిథులు వారేనంటూ సోషల్ మీడియాలో తెగ వార్తలు వస్తున్నాయి. మహేష్ బాబు రానున్నారని ప్రచారం జరిగింది. గతంలో మహేష్ సినిమాకు ఎన్టీఆర్ వెళ్లిన సంగతి తెలిసిందే. బాలకృష్ణ కూడా హాజరయ్యే అవకాశం ఉందని టాక్. కానీ తాజాగా మరో టాక్ వినిపిస్తోంది. బాలీవుడ్ బిగ్ బి అమితాబ్ బచ్చన్ వస్తారని పుకార్లు షికారు చేస్తున్నాయి. అరవింద సమేతలో బిగ్ బి కీలక పాత్ర పోషించారని గుసగుసలు వినిపిస్తున్నాయి. కానీ ఇది నిజమా ? కాదా ? అనేది తెలియాలంటే సినిమా విడుదలయ్యే వరకు వేచి చూడాల్సిందే. 

14:46 - March 27, 2018

సినిమా అంటే చాలా మందికి వినోదం. అది చాలా మందికి ఉపాధి కూడా. అవకాశాల కోసం ఇండస్ట్రీకి చాలా మంది వస్తుంటారు. స్టూడియోల దగ్గర పడిగాపులు కాస్తారు. ఇలా ఒక్కరోజు కాదు.. రెండు రోజులు కాదు.. అవకాశం వచ్చే వరకు వారి ప్రయత్నాలు కొనసాగిస్తూనే ఉంటారు. సినిమా ఇండస్ట్రీలో ఇలా అవకాశాల కోసం వచ్చిన మహిళలను కొంతమంది తమ అవసరాల కోసం వేధిస్తున్నారా? ఇప్పుడు ఇవే ఆరోపణలు టాలీవుడ్‌లోని కొంతమంది నటీమణులు వినిపిస్తున్నారు. ఒక్క టాలీవుడే కాదు... మన పక్కనే ఉన్న కోలీవుడ్‌, బాలీవుడ్‌లో కూడా ఇలాంటి ఆరోపణలే చాలా మంది చేశారు. అవకాశాలు చూపిస్తామని మహిళలపై లైంగిక దాడి చేస్తున్నారని వీరు చేస్తున్న కామెంట్లు ఇప్పుడు చర్చనీయాంశమవుతున్నాయి. అసలు ఈ పరిస్థితికి కారణమేంటి. దీనికి పరిష్కారం ఏంటి. పరిష్కారానికి తీసుకోవాల్సిన చర్యలేంటి. ఈ అంశాలపై సామాజిక కార్యకర్త దేవి ఎటువంటి విషయాలను వెల్లడించారో చూద్దాం..

11:48 - December 28, 2017

హైదరాబాద్ : షార్ట్ ఫిల్మ్ డైరెక్టర్ యోగి-నటి హారిక కేసు కొత్త మలుపులు తిరుగుతోంది. తప్పు నువ్వు చేశావంటే..నువ్వు చేశావని పరస్పరం ఆరోపణలు చేసుకుంటున్నారు. హారిక చేసిన వాట్సాప్ మెసేజ్‌లను డైరెక్టర్‌ యోగి లీక్ చేశాడు. తనపై యోగి తప్పుడు ఆరోపణలు చేస్తున్నారంటూ సెల్ఫీ వీడియోతో హారిక కౌంటర్‌ ఇచ్చింది. 
యోగి, నటి హారిక మధ్య ముదురుతోన్న వివాదం  
షార్ట్ ఫిల్మ్ డైరెక్టర్ యోగి, నటి హారిక మధ్య వివాదం ముదురుతోంది. పరస్పరం ఆరోపణలు, విమర్శలతో చినికి చినికి గాలివానలా మారుతోంది. ఏ తప్పు చేయలేదంటూ ఇద్దరు ఇస్తున్న లీకులు షార్ట్‌ ఫిల్మ్‌ ఇండస్ట్రీలో చర్చనీయాంశంగా మారాయి.  
హారిక ఆరోపణలపై యోగి ఎదురుదాడి 
తనను లైంగిక వేధింపులకు గురిచేశారన్న హారిక ఆరోపణలపై షార్ట్‌ఫిల్మ్‌డైరెక్టర్‌ ఎదురుదాడికి దిగాడు. గతంలో హారిక తనకు పెట్టిన వాట్సాప్‌ మెసేజ్‌లు బయటపెట్టి ఆమె అమాయకురాలేం కాదని ఆరోపిస్తున్నాడు. అవకాశాల కోసం కాంప్రమైజ్ అవుతానని హారిక తనతో చెప్పిందన్నాడు. తన వ్యక్తిగత జీవితం ఆనందంగా లేదని, ఎవరితోనైనా డేటింగ్‌ చేయాలని, విదేశాలకు వెళ్లి ఎంజాయ్ చేయాలని ఉందని చాట్‌ చేసినట్లు వెల్లడించాడు. సంతోషంగా లేనప్పుడు విలువలు ఎందుకు పాటించాలని ప్రశ్నించిందని, అయితే, అలా ఎందుకు ఆలోచిస్తున్నావని తాను హారికను హెచ్చరించినట్లు యోగి తెలిపాడు. ఇద్దరి మధ్య జరిగిన వాట్సాప్ మెసేజ్‌ల మొబైల్ స్క్రీన్ షాట్లను పోలీసులకు అప్పగించాడు యోగి. 
యోగి ఆరోపణలపై హారిక కౌంటర్‌ అటాక్‌ 
మరోవైపు యోగి ఆరోపణలపై నటి హారిక కౌంటర్‌ అటాక్‌ ఇచ్చింది. సెల్ఫ్‌ వాట్సాప్‌ మెసేజ్‌లతో తనపై తప్పుడు ప్రచారం చేస్తున్నారని మండిపడింది. క్రిమినల్‌ బ్రెయిన్‌తో తప్పుడు స్టోరీలు క్రియేట్‌ చేస్తున్నాడని ఆరోపించింది. తాను తప్పు చేస్తే పోలీసులకు ఎందుకు ఫిర్యాదు చేస్తానంది. యోగి తరహా వ్యక్తులు ఏరంగంలో ఉన్నా.. మహిళలు వారి  వేధింపులు భరించాల్సిన అవసరం లేదని చెప్పింది. తనను బూతులు తిట్టడం వల్లే అడిషనల్‌ డీసీపీ గంగారెడ్డి యోగిని తన్నినట్లు తెలిపింది. పోలీస్‌ స్టేషన్‌లో జరిగిన దృశ్యాలు తాను వీడియో తీయలేదని చెప్పింది. 
హరిక ఫిర్యాదుపై యోగి అరెస్ట్ 
యోగి తనను వేధింపులకు గురిచేస్తున్నారని హారిక చేసిన ఫిర్యాదుపై గచ్చిబౌలి పోలీసులు అతన్ని అరెస్ట్ చేశారు. అయితే ఎవరి ఆరోపణల్లో నిజమెంత అనే విషయాలపై నిగ్గు తేల్చేందుకు పోలీసులు లోతుగా దర్యాప్తు చేస్తున్నారు. 

Pages

Don't Miss

Subscribe to RSS - tollywood