Revanth Reddy

19:53 - November 15, 2018

హైదరాబాద్: తాను పార్టీ మారుతున్నట్లు వచ్చిన వార్తలపై టీఆర్‌ఎస్ ఎంపీ కొండా విశ్వేశ్వరరెడ్డి స్పందించారు. టీఆర్‌ఎస్‌ వీడుతున్నట్లు వస్తున్న వార్తల్ని ఆయన తీవ్రంగా ఖండించారు. తాను టీఆర్ఎస్‌కు రాజీనామా చేయలేదని, తనకు పార్టీ మారే ఆలోచనే లేదని ఆయన స్ఫష్టం చేశారు. గురువారం(15వ తేదీ) ప్రగతి భవన్‌లో కేటీఆర్‌ను కలిసి వచ్చినట్లు చెప్పారు. తెలంగాణ పీసీసీ వర్కింగ్ ప్రెసిడెంట్ రేవంత్‌రెడ్డి కావాలనే తనపై దుష్ప్రచారం చేస్తున్నారని కొండా విశ్వేశ్వరరెడ్డి ఆరోపించారు.
కాగా టీఆర్ఎస్ నుంచి ఇద్దరు ఎంపీలు కాంగ్రెస్ పార్టీలో చేరతారంటూ రేవంత్‌రెడ్డి చేసిన వ్యాఖ్యలు రాజకీయవర్గాల్లో కలకలం రేపాయి. దీనికి తోడు చేవెళ్ల ఎంపీ కొండా విశ్వేశ్వరరెడ్డి టీఆర్ఎస్‌కు రాజీనామా చేశారని, ఆ లేఖను కేసీఆర్‌కు పంపారని మీడియాలో వార్తలు హల్‌హల్ చేశాయి. దీంతో ఎంపీ కొండా విశ్వేశ్వరరెడ్డి క్లారిటీ ఇచ్చారు.
మరోవైపు మహబూబాబాద్ ఎంపీ సీతారాం నాయక్ కూడా టీఆర్ఎస్‌కు గుడ్‌బై చెబుతారని ఊహాగానాలు వచ్చాయి. అయితే ఎంపీ సీతారాం నాయక్ అనూహ్యంగా గురువారం(15వ తేదీ) మధ్యాహ్నం మీడియా ముందుకు వచ్చారు. తాను పార్టీ మారడం లేదని స్పష్టం చేశారు. ఇద్దరు టీఆర్‌ఎస్ ఎంపీలు పార్టీ మారుతున్నారని రేవంత్ చెప్పడం.. పేపర్లలో రావడం.. ఓ మైండ్‌గేమ్‌లా ఉందని సీతారాం నాయక్ పేర్కొన్నారు. రేవంత్‌కు దమ్ము, ధైర్యం ఉంటే పార్టీ మారుతున్న ఆ ఇద్దరు ఎంపీలు ఎవరో వెల్లడించాలని సీతారాం నాయక్ సవాల్ చేశారు.

08:46 - October 23, 2018

హైదరాబాద్: కాంగ్రెస్ వర్కింగ్ ప్రెసిడెంట్ రేవంత్ రెడ్డి... ఇవాళ ఉదయం 10గంటలకు ఐటీ అధికారుల ముందు విచారణకు హాజరుకానున్నారు. బషీర్‌బాగ్‌లోని ఐటీ శాఖ కార్యాలయంలో జరిగే విచారణకు రేవంత్ రెడ్డి అటెండవనున్నారు. కొద్దిరోజుల క్రితం రేవంత్ రెడ్డి ఇంట్లో సోదాల తర్వాత ఐటీ శాఖ నోటీసులు ఇచ్చింది. ఈ నేపథ్యంలో ఈ నెల మూడున విచారణకు హాజరైన రేవంత్ రెడ్డిని  దాదాపు నాలుగున్నర గంటలపాటు అధికారులు విచారించారు. ఈనెల 23వ తేదీన మరోసారి తమ ముందుకు రావాలని ఆదేశాలు జారీ చేసిన నేపథ్యంలో ఇవాళ మరోసారి అధికారుల ముందు హాజరవనున్నారు. రేవంత్ రెడ్డితో పాటు ఆయన అనుచరుడు ఉదయ్ సింహా, మామ పద్మనాభరెడ్డి, శ్రీ సాయి మౌర్యా కంపెనీ డైరెక్టర్లు ప్రవీణ్ రెడ్డి, సురేశ్ రెడ్డి, శివరామిరెడ్డి, రామచంద్రారెడ్డిలు సైతం విచారణకు హాజరయ్యే అవకాశాలు ఉన్నాయి. 

కొన్ని రోజుల క్రితం రేవంత్ రెడ్డి ఇళ్లలో రెండు రోజులకు పైగా సోదాలు నిర్వహించిన అధికారులు పలు డాక్యుమెంటు స్వాధీనం చేసుకున్నారు. ఓటు నోటు కేసు, రేవంత్ బావమరిది జయప్రకాశ్ రెడ్డికి చెందిన శ్రీ సాయి మౌర్య ఎస్టేట్స్ అండ్ ప్రయివేటు లిమిటెడ్‌లో రూ.20 కోట్ల లెక్క తేలని ఆదాయాన్ని గుర్తించిన అధికారులు.. రేవంత్ రెడ్డి భాగస్వామ్యం పై ఆరా తీసే అవకాశాలున్నాయి.  సోదరుడు కొండల్ రెడ్డికి చెందిన భూపాల్ ఇన్‌ఫ్రా కంపెనీతో రేవంత్‌కు ఉన్న సంబంధాలపైనా వివరాలు సేకరించే అవకాశం ఉందని తెలుస్తోంది. హైదరాబాద్‌లోని జూబ్లీహిల్స్‌లో రేవంత్ ఇంటి అడ్రస్ పైన పలు కంపెనీలు రిజిస్టర్ అయ్యాయని ఐటీ అధికారులు గుర్తించారు. అయితే, తమ ఇంట్లో అద్దెకు ఉన్న వారి కంపెనీల పేర్లు అని రేవంత్ చెప్పారు. ఆయా కంపెనీలతో రేవంత్‌కు ఏమైనా సంబంధాలున్నాయా అనే కోణంలోనూ ఆరా తీయనున్నారు. మొత్తంగా ఓటుకు నోటు డబ్బులు, రూ.20 కోట్ల లెక్క, సోదరుడి కంపెనీలో వాటా, తన ఇంటి అడ్రస్‌లోని కంపెనీలపై ఆరా తీయనున్నారని తెలుస్తోంది.

17:08 - October 20, 2018

హైదరాబాద్: రాష్ట్ర్రంలో అసెంబ్లీ ఎన్నికలకు ఒకేసారి 105మంది అభ్యర్ధుల పేర్లు ప్రకటించి ఎన్నికలలో అన్ని పార్టీల కంటే ముందు దూసుకు పోతున్న టీఆర్ఎస్ పార్టీ ఇటీవల ప్రకటించిన మేనిఫెస్టోలో రెడ్డి కార్పోరేషన్ ఏర్పాటు చేస్తామని చెప్పటంతో రెడ్డి సామాజికవర్గం ఆనందోత్సాహాల్లో ఉంది. కాంగ్రెస్ పార్టీ నాయకుడు రేవంత్ రెడ్డి పై ఓటుకు నోటుకేసు, ఐటీ దాడుల నేపధ్యంలో రాష్ట్రంలో రెడ్డి సామాజిక వర్గం పార్టీకి దూరం అవుతోందనే ఊహాగానాలు జరుగుతున్న వేళ ఆపధ్దర్మ ముఖ్యమంత్రి కేసీఆర్ రెడ్డికార్పోరేషన్ ఏర్పాటు చేస్తామని చెప్పటంతో ఆ సామాజికవర్గంలోని అట్టడుగు వర్గాలకు ఈవార్త ఊరట కల్పించిందనటంలో సందేహం లేదు. రెడ్డి జాయింట్ యాక్ష‌న్ క‌మిటీ నేతలు నిన్న కేటీఆర్ ను కలిసి అభినందనలు తెలిపారు.  టీఆర్ఎస్ కు చెందిన రెడ్డి సామాజికవర్గ ప్రజాప్రతినిధులు, మరికొందరు రెడ్డిసామాజికవర్గ నాయకులతో కలిసి శనివారం బేగంపేటలోని  సీఎం క్యాంపు కార్యాలయంలో ఆపధ్దర్మ మంత్రి కేటీఆర్ ను  కలిసి శుభాకాంక్షలు తెలిపారు.  కేటీఆర్ ను  కలిసిన వారిలో ఎంపీలు మ‌ల్లారెడ్డి, కొండా విశ్వేశ్వర్‌రెడ్డితో పాటు తాజా మాజీఎమ్మెల్యే ముత్తిరెడ్డి యాదిరెడ్డి, చంద్రారెడ్డి, శ్రీనివాస్‌రెడ్డి, హరిమోహన్‌రెడ్డి, భాగ్యరెడ్డి తదితరులు ఉన్నారు. 

19:46 - October 13, 2018

హైదరాబాద్: తనకు టీఆర్ఎస్ నుంచి ప్రాణహాని ఉందని కాంగ్రెస్ వర్కింగ్ ప్రెసిడెంట్ రేవంత్ రెడ్డి అన్నారు. తనకు కేంద్ర భద్రతా సంస్థల ద్వారా రక్షణ కల్పించాలని కోరారు. ఈ మేరకు తెలంగాణ ఎన్నికల సంఘం అధికారులను కోరినట్లు రేవంత్‌ రెడ్డి వివరించారు. రాష్ట్ర ఎన్నికల ప్రధానాధికారి రజత్‌కుమార్‌ను రేవంత్ రెడ్డి కలిశారు. రెండు అంశాలపై ఫిర్యాదు చేసినట్టు రేవంత్ రెడ్డి తెలిపారు. ఇటీవల మంత్రి జగదీశ్‌ రెడ్డి, పల్లా రాజేశ్వర రెడ్డి, ఎంపీ బాల్క సుమన్‌ తనను భౌతికంగా అంతమొందిస్తామని హెచ్చరించారని.. టీఆర్ఎస్ సర్కార్‌ నుంచి తనకు ప్రాణహాని ఉన్నట్లు అధికారులకు తాను ఫిర్యాదు చేశానని రేవంత్ తెలిపారు. డీజీపీ మహేందర్ రెడ్డి గతంలో నాగార్జునసాగర్‌లో జరిగిన టీఆర్ఎస్ నేతల శిక్షణకు హాజరైనందున ఆయనపై తనకు నమ్మకం లేదని.. కేంద్ర సంస్థల సిబ్బందితో తనకు భద్రత కల్పించాలని కోరినట్లు రేవంత్‌ చెప్పారు. 

మరోవైపు టీఆర్ఎస్ అధినేత, సీఎం కేసీఆర్ తనకు రూ.10 కోట్లు లంచం ఇస్తానన్నారంటూ హోంమంత్రి నాయిని నర్సింహారెడ్డి చేసిన వ్యాఖ్యలపైనా ఈసీకి ఫిర్యాదు చేసినట్లు రేవంత్ తెలిపారు. నాయిని వ్యాఖ్యల ఆధారంగా సుమోటోగా కేసు నమోదు చేయాలని.. లేదంటే తన ఫిర్యాదు ఆధారంగా కేసు నమోదు చేయాలని కోరినట్టు చెప్పారు. నాయిని స్టేట్‌మెంట్ రికార్డు చేసి కేసీఆర్‌పై చర్యలు తీసుకోవాలని కోరినట్లు వెల్లడించారు. 

తనకు ముషీరాబాద్ టికెట్ ఇవ్వకుండా ఎల్బీనగర్ టికెట్ ఇస్తానని.. అక్కడి నుంచి పోటీ చేస్తే రూ.10కోట్ల లంచం కేసీఆర్ ఇవ్వజూపారని నాయిని నర్సింహారెడ్డి పత్రికాముఖంగా వ్యాఖ్యానించినట్టు రేవంత్ రెడ్డి గుర్తు చేశారు. ముఖ్యమంత్రి గారు నాకు పది కోట్లు లంచం ఇవ్వజూపారని స్వయంగా ఒక రాష్ట్ర మంత్రే చెప్పినప్పుడు ఎందుకు చర్యలు తీసుకోరని రేవంత్ ప్రశ్నించారు. అవినీతి నిరోధక శాఖ చట్టం ప్రకారం ఒక ప్రజాప్రతినిధి మరొక ప్రజాప్రతినిధికి లంచం ఇస్తానని అనడం నేరం అని రేవంత్ రెడ్డి పేర్కొన్నారు.

12:56 - October 7, 2018

హైద‌రాబాద్:తెలంగాణ అసెంబ్లీ ఎన్నిక‌ల న‌గారా మోగింది. డిసెంబ‌ర్ 7న తెలంగాణ‌లో 119 స్థానాల‌కు ఒకే ద‌శ‌లో పోలింగ్ నిర్వ‌హించున్నారు. ఈ మేర‌కు కేంద్ర ఎన్నిక‌ల సంఘం ఎన్నిక‌ల తేదీని అనౌన్స్ చేసింది. ఎన్నిక‌ల షెడ్యూల్ ప్రక‌ట‌న రావ‌డంతో తెలంగాణ కాంగ్రెస్ జోరు పెంచింది. ఎన్నిక‌ల ప్ర‌చారాన్ని ప‌రుగులు పెట్టించాల‌ని నిర్ణ‌యించింది. అంద‌రూ ఒకే చోట కాకుండా విడివిడిగా ప్ర‌చారం నిర్వ‌హించాల‌ని నిర్ణ‌యించారు. రోడ్డు షోలు, స‌భ‌లు, పాద‌యాత్ర‌లతో జ‌నంలోకి వెళుతున్నారు. 

ముషీరాబాద్ నియోజ‌క‌వ‌ర్గంలో తెలంగాణ కాంగ్రెస్ పార్టీ ఇంచార్జీ కుంతియా పాద‌యాత్ర చేస్తుండ‌గా, కోదాడ‌లో పీసీసీ చీఫ్ ఉత్త‌మ్ కుమార్ రెడ్డి రైతు గ‌ర్జ‌న స‌భ‌లో పాల్గొంటారు. ఇక కుత్బుల్లాపూర్ లో కాంగ్రెస్ వ‌ర్కింగ్ ప్రెసిడెంట్ రేవంత్ రెడ్డి, ష‌బ్బీర్ అలీ, పొన్నం ప్ర‌భాక‌ర్  రోడ్ షోల పాల్గొంటారు. అన‌త‌రం మైనార్టీ స‌భ‌ల్లో పాల్గొంటారు. మైనార్టీల‌కు కాంగ్రెస్ ఏం చేసింది అనేది వారు తెలియ‌జేస్తారు. అలాగే మైనార్టీల‌కు టీఆర్ఎస్ ప్ర‌భుత్వం ఎలా మోసం చేసిందో చెప్ప‌బోతున్నారు.

మొత్తంగా తెలంగాణ కాంగ్రెస్ ప్ర‌చార జోరును పెంచింది. వ్యూహాత్మంగా, ప్ర‌ణాళికాబ‌ద్దంగా ముందుకు వెళుతోంది. ఎవ‌రు ఎక్క‌డ ప్ర‌చారం చేయాల‌నే దానిపై ప్ర‌ణాళిక‌తో ముందుకు వెళుతున్నారు. పార్టీలోని ప్ర‌ముఖ నాయ‌కులు అన్ని నియోజ‌క‌వ‌ర్గాల‌ను చుట్టేయ‌బోతున్నారు. మ‌రోవైపు తెలంగాణ ప‌రిర‌క్ష‌ణ క‌మిటీలో పార్టీల మ‌ధ్య సీట్ల స‌ర్దుబాటుపైనా మ‌రోసారి చ‌ర్చ‌లు జ‌ర‌గ‌నున్నాయి.

12:16 - October 1, 2018

హైదరాబాద్ : టి.కాంగ్రెస్ నేత రేవంత్ రెడ్డి అక్రమాస్తుల కేసులో ఐటీ అధికారుల విచారణ కొనసాగుతోంది. ఐటీ కార్యాలయానికి సోమవారం ఉదయ్ సింహా కాసేపటి క్రితం చేరుకున్నారు. ఓటుకు నోటు కేసులో కీలకమైన వ్యక్తి..ఏ2 ఉదయ్ సింహా ఉన్న సంగతి తెలిసిందే. ఈ కేసులో రూ. 50 లక్షలు ఎక్కడి నుండి వచ్చాయో తెలియచేయాలని ఐటీ అధికారులు ప్రశ్నించనున్నట్లు తెలుస్తోంది. ఇదిలా ఉంటే ఐటీ కార్యాలయానికి రేవంత్ సోదరుడు కొండల్ రెడ్డి కూడా చేరుకున్నారు. 

మూడు రోజుల క్రితం కాంగ్రెస్ పార్టీ వర్కింగ్ ప్రెసిడెంట్ రేవంత్ రెడ్డి ఇంట్లో ఐటీ అధికారుల సోదాల సందర్భంగా సెబాస్టియన్,  ఉదయ్ సింహాల ఇండ్లలో కూడ సోదాలు నిర్వహించారు. రేవంత్ సోదరుడు కొండల్ రెడ్డి ఇండ్లలో కూడా ఐటీ అధికారులు సోదాలు జరిపిన సంగతి తెలిసిందే. ఈ సందర్భంగా స్వాధీనం చేసుకొన్న డాక్యుమెంట్ల పరిశీలిస్తున్నట్లు సమాచారం.  సెబాస్టియన్, కొండల్ రెడ్డిలకు ఐటీ అధికారులు నోటీసులు అందించిన సంగతి తెలిసిందే. అక్టోబర్ 1న వ్యక్తిగతంగా విచారణకు హాజరు కావాలని, హాజరు కాని పక్షంలో సెక్షన్ 271ఏ ఆదాయపు పన్ను చట్టం కింద జరిమానా విధించడంతో పాటు చర్యలు తీసుకోవాల్సి ఉంటుందని అధికారులు హెచ్చరించారు. 

09:52 - September 29, 2018

హైదరాబాద్ : తెలంగాణ కాంగ్రెస్ వర్కింగ్ రేవంత్‌రెడ్డి ఇంట్లో ఐటీ అధికారులు సోదాలు ముగిశాయి. రేవంత్‌రెడ్డికి అధికారులు నోటీసులు జారీ చేశారు. 15 ప్రాంతాల్లో సోదాలు నిర్వహించారు. రేవంత్‌రెడ్డి ఇంట్లో 43 గంటలపాటు ఐటీ దాడులు కొనసాగాయి. 31 గంటలపాటు రేవంత్‌తోపాటు, ఆయన భార్యను ఐటీ అధికారులు విచారించారు. పలు కీలక పత్రాలు స్వాధీనం చేసుకున్నారు. 


27 ఉదయం 8 గంటలకు రేవంత్ ఇంటిపై ఐటీ దాడులు ప్రారంభమయ్యాయి. ఈ తెల్లవారు జాము 2.30 గంటలకు వరకు సోదాలు కొనసాగాయి. రెండు రోజులపాటు ఐటీ అధికారులు సోదాలు నిర్వహించారు. 
రేవంత్ నివాసంలో, ఆయన కుటుంబ సభ్యలు ఇళ్లల్లో, బంధువుల ఇళ్లల్లో అధికారులు సోదాలు నిర్వహించారు. రేవంత్ ఇంటి నుంచి కీలక పత్రాలు, హార్డ్ డిస్క్‌లు స్వాధీనం చేసుకున్నారు. వచ్చే నెల 3న బషీర్‌బాగ్‌లోని ఆదాయ పన్ను భవన్‌లో హాజరు కావాలని రేవంత్‌ను ఆదేశించారు. అక్టోబర్ 1న రేవంత్ బంధువుల విచారణ జరుగనుంది. రెండు రోజుల సోదాల్లో రూ.20 కోట్లు లెక్క చూపని ఆస్తులను ఐటీ అధికారులు గుర్తించారు. 

ఓటుకు నోటు కేసులో సెబాస్టియన్, ఉదయ్‌సింహలను ఐటీ అధికారులు విచారించారు. ఉదయ్‌సింహ ఇంట్లో కూడా సోదాలు నిర్వహించిన అధికారుల కీలక డాక్యుమెంట్లను స్వాధీనం చేసుకున్నారు. రేవంత్‌కు నివాసానికి ఆయన అభిమానులు, అనుచరులు భారీగా చేరుకుంటున్నారు. ఉదయం 11.30 గంటలకు రేవంత్ ప్రెస్ మీట్ ఏర్పాటు చేసే అవకాశం ఉంది. 

 

08:27 - September 29, 2018

హైదరాబాద్ : తెలంగాణ కాంగ్రెస్ వర్కింగ్ ప్రెసిండెంట్ రేవంత్‌ నివాసంలో రెండో రోజైన శుక్రవారం కూడా ఐటీ, ఈడీ సోదాలు కొనసాగాయి. రేవంత్‌రెడ్డి, ఆయన కుటుంబ సభ్యుల బ్యాంక్‌ లాకర్లు తెరిచిన ఆదాయపన్ను శాఖ అధికారులు కీలక పత్రాలు స్వాధీనం చేసుకోవడతోపాటు భారీగా నగదు, నగలు కొనుగొన్నారని సమాచారం. తెల్లవారుజామున 3 గంటల వరకు సోదాలు కొనసాగాయి. 

డొల్ల కంపెనీలతో అక్రమార్జనకు పాల్పడ్డారన్న ఆరోపణలపై రేవంత్‌రెడ్డి నివాసంలో  రెండో రోజు కూడా ఆదాయ పన్ను, ఎన్‌ఫోర్స్‌మెంట్‌ డైరెక్టరేట్‌ అధికారుల సోదాలు కొనసాగాయి. ఈ సోదాల్లో పలు అకమ్రాలు వెలుగులోకి వచ్చాయని సమాచారం. అమెరికా, సింగపూర్‌, హాంకాంగ్‌, దుబాయ్‌.. తదితర దేశాలకు హవాలా మార్గంలో భారీగా డబ్బు తరలించినట్టు గుర్తించారు. సోదా కోసం ఐటీ అధికారులు వచ్చినప్పుడు రేవంత్‌రెడ్డి ఇంట్లో లేకపోవడంతో.. సాయంత్రం ఇంటికి తిరిగి వచ్చిన తర్వాత ఐటీ అధికారులు ప్రశ్నించారు. రేవంత్‌ ముగ్గురు న్యాయవాదులను వెంట తెచ్చుకున్నా.. వారిని ఇంట్లోకి అనుమతించలేదు. రేవంత్‌ను ప్రశ్నించిన ఐటీ, ఈడీ అధికారులు... ఐటీ చట్టంలోని 54, 55 సెక్షన్ల కింద నోటీసులు జారీ చేశారు. అలాగే నల్లధనం నిరోధక చట్టంలోని 49, 50 సెక్ష్లన కింద కేసు పెట్టారు. అక్రమ నగదు చెలామణి చట్టంలోని 3,4 సెక్షన్ల కింది కేసు నమోదు చేశారు. బినామీ లావాదేవీల నిరోధక చట్టంలోని 53, 54 సెక్షన్ల కింది కేసు పెట్టారు. అవినీతి నిరోధక చట్టం 1988లోని సెక్షన్‌ 13 కింది కేసు నమోదైంది. రేవంత్‌రెడ్డి గత ఎన్నికల సందర్భంగా  అఫిడవిట్లలో పేర్కొన్న అంశాలే ఇప్పుడు ఐటీ అధికారులకు ఆధారాలుగా మారాయి. 

రేవంత్‌రెడ్డి నివాసంలో ఐటీ సోదాలు కొనసాగుతున్న సమయంలో కాంగ్రెస్‌ కార్యకర్తలు, అభిమానులు చేరుకొని ఆందోళన చేశారు. ఇంట్లోకి చొచ్చుకుపోయేందుకు ప్రయత్నించినప్పుడు పోలీసులు అడ్డుకున్నారు. దీంతో రేవంత్‌ నివాసం వద్ద ఉద్రిక్తత నెలకొంది. రేవంత్‌రెడ్డి ఇంట్లో నుంచి బయటకు వచ్చి అభివాదం చేసి వెళ్లినా శాతించలేదు. మరోవైపు రేవంత్‌రెడ్డికి చెందిన మూడు బ్యాంకు లాకర్లను అధికారులు తెరిచారు. కీలక పత్రాలను స్వాధీనం చేసుకున్నారు. ఓటుకు నోటు కేసులో నిందితుగా ఉన్న ఉదయ్‌సింహ్‌కు ఫోన్‌ చేసి... రేవంత్‌ నివాసానికి పిలించుకున్న ఐటీ అధికారులు.. ఆయన్ను కూడా ప్రశ్నించారు. రేవంత్‌రెడ్డి నివాసం నుంచి హార్ట్‌ డిస్క్‌లను స్వాధీనం చేసుకున్న అధికారులు.. ఫోరెన్సిక్‌ పరిశోధన కోసం ఎఫ్‌ఎస్‌ఎల్‌కు పంపారు. నివేదిక వచ్చిన తర్వాత రేవంత్‌రెడ్డి అక్రమ నగదు చెలామణికి సంబంధించిన మరింత సమాచారం లభించే అవకాశం ఉందని భావిస్తున్నారు. 

ఇంకోవైపు రేవంత్‌రెడ్డి ఇళ్లలో ఐటీ దాడులపై కాంగ్రెస్‌ నేతలు చేస్తున్న విమర్శలను టీఆర్‌ఎస్‌ తిప్పికొట్టింది. ఈ దాడులతో టీఆర్‌ఎస్‌కు సంబంధంలేదని ఎంపీ బాల్క సుమన్‌ స్పష్టం చేశారు. అక్రమ నగదు చెలామణి కేసులో రేవంత్‌రెడ్డిపై కేసులు నమోదైన నేపథ్యంలో ఎన్నికల్లో పోటీ చేయకుండా అనర్హుడిగా ప్రకటించాలని డిమాండ్‌ చేశారు. రేవంత్‌ నివాసం, కార్యాలయాల్లో ఇవాళ కూడా  సోదాలు కొనసాగే అవకాశం ఉంది. 

07:43 - September 29, 2018

హైదరాబాద్ : తెలంగాణ కాంగ్రెస్ వర్కింగ్  రేవంత్‌రెడ్డి ఇంట్లో ఐటీ అధికారులు సోదాల ముగిశాయి. రేవంత్‌రెడ్డికి అధికారులు నోటీసులు జారీ చేశారు. రెండు రోజులపాటు రేవంత్‌రెడ్డిపై ఐటీ అధికారులు సోదాలు నిర్వహించారు. శుక్రవారం రేవంత్ ఇళ్లపై అధికారులు దాడులు ప్రారంభించారు. రేవంత్ నివాసంలో, ఆయన కుటుంబ సభ్యలు ఇళ్లల్లో, బంధువుల ఇళ్లల్లో అధికారులు సోదాలు నిర్వహించారు. ఈ తెల్లవారు జాము 2.30 గంటలకు వరకు సోదాలు కొనసాగాయి. రేవంత్ ఇంటి నుంచి కీలక పత్రాలు, హార్డ్ డిస్క్‌లు స్వాధీనం చేసుకున్నారు. వచ్చే నెల 3న బషీర్‌బాగ్‌లోని ఆదాయ పన్ను భవన్‌లో హాజరు కావాలని రేవంత్‌ను ఆదేశించారు. అక్టోబర్ 1న రేవంత్ బంధువుల విచారణ జరుగనుంది. రెండు రోజుల సోదాల్లో రూ.20 కోట్లు లెక్క చూపని ఆస్తులను ఐటీ అధికారులు గుర్తించారు. 

 

22:34 - September 28, 2018

గుంటూరు : తెలంగాణ కాంగ్రెస్‌ కార్యనిర్వాహక అధ్యక్షుడు రేవంత్ రెడ్డి నివాసంలో ఐటీ దాడుల వ్యవహారంపై ఏపీ సీఎం చంద్రబాబు స్పందించారు. విలేకర్లు అడిగిన ప్రశ్నకు స్పందిస్తూ.. దొంగల్ని, నేరస్థుల్ని పట్టుకోలేరని, సమర్ధవంతంగా పనిచేసేవారిపైనే దాడి చేస్తారని మండిపడ్డారు. తమిళనాడు, కర్ణాటక, యూపీలో ఏం జరిగిందో అదే మిగిలిన రాష్ట్రాలలో అమలుచేస్తున్నారని మండిపడ్డారు. నాలుగేళ్లుగా భాజపా విధానాలు చూస్తున్నానని, ఎప్పుడు ఎన్నికలు వచ్చినా ఇలాంటి కక్షసాధింపు చర్యలకు పాల్పడుతున్నారని చంద్రబాబు విమర్శించారు. ప్రజాస్వామ్యంలో ఇది మంచి పద్ధతి కాదన్నారు. వ్యక్తులు, పార్టీలకు హుందాతనం ఉండాలని సూచించారు. 

Pages

Don't Miss

Subscribe to RSS - Revanth Reddy