విశాఖ

09:22 - November 16, 2018

విశాఖ : గజ తుపాను తీరం దాటింది. నాగప్నటం..వేదారణ్యం మధ్య తీవ్ర తుపాను తీరం దాటింది. తుపాను తీరం దాటిన సమయంలో బలమైన గాలులు వీయడంతో భారీ వృక్షాలు నేలకొరిగాయి. లోతట్టు ప్రాంతాల ప్రజలను పునరావాసాలకు తరలించారు. తమిళనాడులోని ఏడు జిల్లాల్లో విద్యా సంస్థలకు సెలవులు ప్రకటించారు. మరోవైపు గజ తుపాన్‌‌తో దక్షిణ కోస్తాలో భారీ వర్షాలు కురిసే అవకాశం ఉంది. 

 

21:23 - November 15, 2018

విశాఖ: ఏపీ సీఎం చంద్రబాబు నాయుడు మరోసారి బీజేపీపై ధ్వజమెత్తారు. బీజేపీ తమను నమ్మించి మోసం చేసిందని చంద్రబాబు ఆరోపించారు. ప్రధాని మోడీ వల్లే భారత్ నష్టపోయిందన్నారు. ప్రధాని మోడీ వ్యవస్థలను అపహాస్యం చేశారని.. ఆర్బీఐ, సీబీఐలను నాశనం చేసేందుకు చూశారని మండిపడ్డారు. ఏమైనా అంటే సీబీఐ, ఈడీ, ఐటీలను ప్రత్యర్థులపై ఉసిగొల్పుతున్నారని చంద్రబాబు దుయ్యబట్టారు. నోట్ల రద్దు, జీఎస్టీ వల్ల దేశం ఆర్థికంగా దెబ్బతిందని వాపోయారు. బీజేపీ చేసిన నోట్ల రద్దు కారణంగా తీవ్ర సమస్యలొచ్చాయని.. రూపాయి పడిపోయిందని చంద్రబాబు ఆవేదన వ్యక్తం చేశారు. బీజేపీ ప్రభుత్వ హయాంలో పెట్రోల్, నిత్యావసర ధరలు భారీగా పెరిగాయన్నారు. తాను ఎవరికీ భయపడేది లేదని చంద్రబాబు స్పష్టం చేశారు. దేశాన్ని కాపాడుకోవాలనే ఉద్దేశంతోనే జాతీయస్థాయిలో పార్టీలను ఏకం చేస్తున్నానని.. కాంగ్రెస్‌తో చేతులు కలిపామని సీఎం వివరించారు. ఏపీకి ప్రత్యేక హోదాతోపాటు విభజన హామీలు అమలు చేస్తామని కాంగ్రెస్ తెలిపిందన్నారు. రాష్ట్ర పునర్విభజన గురించి ప్రస్తావిస్తూ విభజన కారణంగా ఏపీ నష్టపోయిందని, రాష్ట్రానికి ఎన్ని కష్టాలు, ఇబ్బందులు ఉన్నా పట్టించుకోకుండా ముందుకు తీసుకెళ్తున్నానని చంద్రబాబు వ్యాఖ్యానించారు. 
'బాబూ జగ్జీవన్ రామ్ ఉత్తరాంధ్ర సుజల స్రవంతి' ప్రాజెక్ట్‌కు చంద్రబాబు శంకుస్థాపన చేశారు. ఈ ప్రాజెక్టు ద్వారా విశాఖ జిల్లాలోని తొమ్మిది మండలాల్లోని లక్షా ముప్పై వేల ఎకరాలకు సాగునీరు అందించవచ్చని చంద్రబాబు తెలిపారు. ఈ సందర్భంగా చోడవరంలో ఏర్పాటు చేసిన బహిరంగ సభలో ఆయన మాట్లాడుతూ, ఉత్తరాంధ్ర సుజల స్రవంతి ఫేజ్-1ను వీలైనంత త్వరగా పూర్తి చేసి జాతికి అంకితం చేస్తామని హామీ ఇచ్చారు.
నదుల అనుసంధానం, పోలవరం ప్రాజెక్టును పూర్తి చేయడం ద్వారా నీటి కష్టాలు తొలగిస్తామని, మే నాటికి ఈ ప్రాజెక్టును పూర్తి చేస్తామని ముఖ్యమంత్రి స్పష్టం చేశారు. ఉత్తరాంధ్రలో వంశధార, నాగావళి నదులను అనుసంధానం చేశామని, ఈ నెలలోనే గోదావరి, పెన్నా నదులను కూడా అనుసంధానం చేస్తామన్నారు.

09:24 - November 15, 2018

విశాఖ : బంగాళాఖాతంలో గజ తుఫాన్ అలజడి సృష్టిస్తోంది. తమిళనాడు తీరం దిశగా తుఫాన్ దూసుకొస్తోంది. ఇవాళ సాయంత్రం కడలూరు..పంబన్ మధ్య తీరం దాటనున్నట్లు వాతావరణ శాఖ అధికారులు తెలిపారు. చెన్నైకి 430 కి.మీ, నాగపట్నానికి 510 కి.మీ దూరంలో కేంద్రీకృతమైంది. నైరుతి, దానికి ఆనుకుని పశ్చిమ మధ్య బంగాళాఖాతంలో కేంద్రీకృతమైంది. ఇది పశ్చిమ నైరుతిగా పయనించి తొలుత తీవ్ర తుఫాన్‌గా ఆ తర్వాత బలహీనపడి తుఫాన్‌గా మారనుంది. తుఫాన్ ప్రభావంతో పశ్చిమ మధ్య బంగాళాఖాతంలో అలలు ఎగిసిపడుతున్నాయి. 60 కి.మీ వేగంతో ఈదురుగాలులు వీస్తున్నాయి. 

ఏపీలో కోస్తా తీరం వెంబడి గంటకు 45 నుంచి 55 కి.మీ అప్పుడప్పుడు 65 కిమీ వేగంతో బలమైన గాలులు వీస్తాయని... తుఫాన్ తీరం దాటే సమయంలో గాలుల ఉధృతి పెరుగుతుందని వాతావరణ శాఖ ప్రకటించింది. ఏపీ, తమిళనాడు అధికారులు అప్రమత్తమయ్యారు. దక్షిణ కోస్తా, ఉత్తర తమిళనాడుకు భారీ వర్ష సూచన చేసింది. 

 

11:46 - November 14, 2018

విశాఖ : పశ్చిమ మధ్య బంగాళాఖాతంలో ఏర్పడిన గజ తుఫాన్ వణికిస్తోంది. సాయంత్రానికి తీవ్ర తుఫానుగా మారనుంది. రేపు మధ్యాహ్నం పంబన్..కడలూరు మధ్య తీరం దాటనుంది. తీరం దాటే సమయంలో తుఫాను పెను బీభత్సం సృష్టించే అవకాశం ఉంది. చెన్నైకి తూర్పున 580 కి.మీ దూరాన, నాగపట్నానికి 680 కి.మీ దూరాన కేంద్రీకృతమైంది. బలంగా గాలులు వీయడంతోపాటు అత్యధికంగా వర్షాలు కురుస్తాయని వాతావారణ శాఖ అధికారులు చెబుతున్నారు. ప్రకాశం నంచి కర్నూలు వరకు ఉన్న నాలుగు జిల్లాలో వర్షాలు కురిసే అవకాశమున్నట్లు తెలిపారు. ప్రజలు అప్రమత్తంగా ఉండాలని సూచించారు. జాలర్లు  సముద్రంలోకి చేపల వేటకు వెళ్ళరాదని హెచ్చరికలు జారీ చేశారు. తుఫాను ప్రభావంతో తమిళనాడులో హైఅలర్ట్ ప్రకటించారు. ఆంధ్ర, తమిళనాడుల్లోని తీర ప్రాంత పోర్టులలో 2వ నెంబరు ప్రమాద హెచ్చరిక ఎగురవేశారు. 

 

09:17 - November 13, 2018

విశాఖ : గంజాయి కేసులో ముగ్గురికి 14 ఏళ్ల జైలు శిక్ష పడింది. లక్ష జరిమానా విధించారు. గంజాయి కేసులో నేరం రుజువు కావడంతో ముగ్గురు నిందితులకు పధ్నాలుగేళ్ల చొప్పున జైలు శిక్ష, లక్ష రూపాయల చొప్పున జరిమానా విధించారు. విశాఖపట్నంలోని అడిషినల్‌ మెట్రోపాలిటిన్‌ సెషన్స్‌ జడ్జి ఎన్‌.నాగార్జున నిన్న తీర్పిచ్చినట్టు నర్సీపట్నం ఎక్సైజ్‌ సీఐ డి.వి.కె.రాజు తెలిపారు. జరిమానా చెల్లించకపోతే మరో ఏడాది అదనంగా శిక్ష అనుభవించాల్సివుంటుందని తీర్పులో పేర్కొన్నారని తెలిపారు. శిక్షకు గురైన వారిలో తూర్పు గోదావరి జిల్లా రాజమండ్రికి చెందిన కొల్లు నాగరాజు, కొరకండ్ల ఏసు, నెక్కంటి శ్రీనివాసరావు ఎలియాస్‌ బాబా  ఉన్నారని చెప్పారు. 2015 డిసెంబరు 7న నర్సీపట్నం సమీపంలో 750 కిలోల గంజాయితో పట్టుబడిన కేసులో వీరంతా నిందితులని సీఐ తెలిపారు. బాబాపై మరో రెండు గంజాయి కేసులు ఉన్నాయని పేర్కొన్నారు.

 

21:45 - November 11, 2018

విశాఖ : విహారయాత్రలో విషాదం నెలకొంది. సముద్రంలో స్నానానికి వెళ్లి ఆరుగురు యువకులు గల్లంతయ్యారు. ఒకరి మృతదేహాన్ని వెలికితీశారు. గల్లంతైన మరో ఐదుగురు యువకుల కోసం అధికారులు గాలిస్తున్నారు. 

విశాఖ హౌసింగ్ బోర్డు, కేఆర్ఎం కాలనీకి చెందిన 12 మంది యువకులు విహారయాత్రకు యారాడ బీచ్‌కు వెళ్లారు. పుట్టిన రోజు వేడుకులు చేసుకునేందుకు వచ్చారు. కొంతసేపు ఆనందంగా గడిపాక స్నానానికని సముద్రంలోకి దిగారు. వారు అలల ఉధృతికి కొట్టుకుపోతుండగా గమనించిన స్థానిక జాలర్లు పలువురిని రక్షించి, ఒడ్డుకు తీసుకొచ్చారు. అనంతరం అధికారులకు సమాచారం అందించారు. గల్లంతైన ఆరుగురిలో ఒకరి మృతదేహాన్ని వెలికితీశారు. మిగిలిన ఐదుగురి కోసం గాలింపు చర్యలు కొనసాగుతున్నాయి. అయితే చీకటి పడుతుండటంతో గాలింపు చర్యలకు ఆటంకం కలుగుతోందని అధికారులు భావిస్తున్నారు. ఈ ఘటనపై సీఎం చంద్రబాబు స్పందించారు. అవసరమైతే ఎన్‌డీఆర్‌ఎఫ్ సహాయం తీసుకోవాలని కలెక్టర్‌కు సీఎం సూచించారు.

18:56 - November 11, 2018

విశాఖ : విహారయాత్రలో విషాదం నెలకొంది. సముద్రంలో స్నానానికి వెళ్లి ఆరుగురు యువకులు గల్లంతయ్యారు. విశాఖ హౌసింగ్ బోర్డు, కేఆర్ఎం కాలనీకి చెందిన 12 మంది యువకులు విహారయాత్ర కోసం యారాడ బీచ్‌కు వెళ్లారు. కొంతసేపు ఆనందంగా గడిపాక స్నానానికని సముద్రంలోకి దిగారు. అలల ఉధృతికి అందరూ కొట్టుకుపోతుండగా గమనించిన జాలర్లు కొందరిని ఒడ్డుకు తీసుకొచ్చి.. అధికారులకు సమాచారమిచ్చారు. సముద్రంలోకి దిగిన వారిలో సగం మందే ఒడ్డుకు చేరుకున్నారు. గల్లంతైన వారిలో వాసు, తిరుపతి, గణేశ్, దుర్గ, రాజేశ్, శ్రీను ఉన్నారు. గల్లంతైనవారు ఇసుకతోట దగ్గర దుర్గానగర్ ఎస్సీ కాలనీకి చెందిన యువకులుగా గుర్తించారు. వీరికోసం ముమ్మరంగా గాలింపు చర్యలు చేప్టట్టారు. అయితే చీకటి పడుతుండటంతో గాలింపు చర్యలకు ఆటంకం కలుగుతోందని అధికారులు భావిస్తున్నారు.

 

21:13 - November 6, 2018

విశాఖపట్నం: విశాఖలో జరిగిన భూరికార్డుల ట్యాంపరింగ్ పై సిట్ అధికారులు విచారణ జరిపి కేబినెట్ కు నివేదిక ఇచ్చారు. నివేదికలో మాజీ మంత్రి ధర్మాన పేరు కూడా ఉంది.  విశాఖ జిల్లాలో గత 15 ఏళ్లుగా జరిగిన భూలావాదేవీలపై విచారణ జరిపి ఇచ్చిన సిట్ నివేదికలో ధర్మానతో సహా ముగ్గురు కలెక్టర్లు, నలుగురు జాయింట్ కలెక్టర్లు పేర్లు ఉన్నాయి. వీరు కాక కిందిస్ధాయి సిబ్బందిలో 14మంది ఆర్డీవోలు,10 మంది డీఆర్వోలు కూడా ఉన్నారు. మొత్తంగా 100 మంది అధికారులపై శాఖాపరమైన క్రిమినల్  చర్యలు తీసుకోవాలని సిట్ తన నివేదికలో తెలిపింది. మాజీ సైనికుల పేరుతో జరిగిన భూముల కుంభకోణంపై ప్రభుత్వం సిట్ ఏర్పాటు చేసింది.  సిట్ నివేదిక అనంతరం ,అప్పటి ఎన్వోసీలు రద్దు చేసేందుకు ప్రభుత్వం రంగం సిధ్దం చేస్తోంది. కొన్ని భూముల రిజిష్ట్రేషన్లు రద్దు చేయాలని కూడా సిట్ సూచించింది. భూ కుంభకోణంలో మంత్రి గంటాకుసంబంధంలేదని  సిట్ తేల్చింది. సిట్ నివేదికపై తదుపరి చర్యలకోసం ప్రభుత్వం ఒక కమిటీని ఏర్పాటు చేసింది.

10:33 - November 4, 2018

విశాఖ : ఎమ్మెల్యే కిడారి సర్వేశ్వరరావు, మాజీ ఎమ్మెల్యే సోమ హత్యలపై మావోయిస్టులు వివరణ ఇచ్చారు. 14 పేజీల ఇంటర్వ్యూను విడుదల చేశారు. జగబంధు పేరు మీద లేఖలను విడుదల చేశారు. కిడారి, సోమలు ఆస్తులు కూడబెట్టుకునేందుకు ప్రాధాన్యం ఇచ్చారని జగబంధు పేర్కొంది. కిడారి, సోమలు బాక్సైట్ తవ్వకాలకు మద్దతు ఇచ్చారని తెలిపింది. కిడారి, సోమను శిక్షించడానికి ముందు గంట సేపు ప్రజాకోర్టు నిర్వహించామని పేర్కొంది. కిరాయి కోసం హత్యలు చేయబోమని స్పష్టం చేసింది. ఉనికి కోసమే కాల్పులకు పాల్పడ్డారన్న ఆరోపణల్లో నిజం లేదని జగబంధు తెలిపింది.  

 

09:44 - November 4, 2018

విశాఖ : ఏలేరు రిజర్వాయర్ నుంచి వైజాగ్‌ వెళ్లే కాలువకు గండి పడింది. ప్రత్తిపాడు మండలం పెదశంకర్లపూడి గ్రామంలోకి నీళ్లు చేరాయి. ఇళ్లల్లోకి చేరిన నీటితో గ్రామస్థులు ఆందోళన చెందుతున్నారు. అధికారులు రిజర్వాయర్ వద్ద గేట్లు మూసి నీటిని అదుపు చేశారు. గండి పూడ్చివేత పనులు ప్రారంభించారు.

Pages

Don't Miss

Subscribe to RSS - విశాఖ