విచారణ

11:27 - September 25, 2018

ఢిల్లీ : క్రిమినల్ నేరాల ఆరోపణలు ఎదుర్కొంటున్న రాజకీయ నేతలు అభియోగాల నమోదు దశ నుంచే ఎన్నికల్లో పోటీ చేయకుండా అనర్హులను చేయాలంటూ దాఖలైన పిటిషన్లపై సుప్రీంకోర్టు విచారణ చేపట్టింది. నేరచరితులైన చట్టసభ సభ్యులను ఎన్నికల్లో పోటీ చేయకుండా నిలువరించజాలమని సుప్రీంకోర్టు తెలిపింది. 
"క్రిమినెట్ కేసులో ఛార్జిషీట్ దాఖలు చేయడంలో అభ్యర్థుల అనర్హతను చేర్చే బాథ్యత మాది కాదు," అని దీపక్-మిశ్రా భారత ప్రధాన న్యాయమూర్తి ఆదేశించారు. క్రిమినల్ అభ్యర్థులను ప్రజా జీవితంలోకి ప్రవేశించకుండా, న్యాయనిర్ణేతగా వ్యవహరించడానికి చట్టప్రకారం చట్టాన్ని పార్లమెంటు రూపొందించాలని దేశ అత్యున్నత న్యాయస్థానం పేర్కొంది. 

 

07:13 - September 25, 2018

ఢిల్లీ : ప్రజలకు దిశా నిర్ధేశం చేయాల్సిన నేతలు..ప్రజలకు మేమున్నాం అనే భరోసా కల్పించాల్సిన నేతలు..ప్రజాప్రతినిధులుగా చట్టసభలకు వెళ్లి అధికార దర్పంతో నేరాలకు పాల్పడం..లేదా నేరాలను ప్రోత్సహించేలా వ్యవహరించటం ఎంతవరకూ సమంజసం?.  ప్రజల సంక్షమం కోసం పనిచేసేందుకు చట్టసభలకు వెళ్లిన నేతలపై నేరాల చిట్టా వారిపై కేసులు నమోదుచేసేంతవరకూ వెళ్లింది. ఈ క్రమంలో క్రిమినల్ నేరాల అభియోగంపై  ఆరోపణలు ఎదుర్కొంటున్న చట్టసభ సభ్యులపై నేడు సుప్రీంకోర్టులో విచారణ జరగనుంది. ఈ క్రమంలో సామాన్యులకు ఒక న్యాయం..చట్టసభ సభ్యులకు మరోన్యాయం కాకుండా దేశ అత్యున్నత న్యాయం స్థానం అయిన సుప్రీంకోర్టు ఈ క్రిమినల్ నేతలపై ఎటువంటి చర్యలు తీసుకోనుందో అనే ప్రశ్న, ఆసక్తి ప్రజల్లోనెలకొంది. క్రిమినల్‌ విచారణ ఎదుర్కొంటున్న చట్టసభ సభ్యులు.. అభియోగాల నమోదు దశ నుంచే ఎన్నికల్లో పోటీ చేయకుండా అనర్హులను చేయాలా అన్న ప్రశ్నను లేవదీస్తూ దాఖలైన పిటిషన్లపై సుప్రీం కోర్టు మంగళవారం తీర్పు వెలువరించే అవకాశం ఉంది. ఈ పిటిషన్లపై విచారణ జరిపిన ప్రధాన న్యాయమూర్తి జస్టిస్‌ దీపక్‌ మిశ్ర నేతృత్వంలోని ఐదుగురు సభ్యుల రాజ్యాంగ ధర్మాసనం ఆగస్టు 28న తన తీర్పును వాయిదా వేసింది. ప్రస్తుతం ప్రజాప్రాతినిధ్య చట్టం ప్రకారం.. ఒక క్రిమినల్‌ కేసులో దోషిగా తేలాకే సదరు చట్టసభ సభ్యుడిపై అనర్హత వేటు పడుతుంది. పబ్లిక్‌ ఇంట్రెస్ట్‌ ఫౌండేషన్‌ అనే స్వచ్ఛంద సంస్థతో పాటు భాజపా నేత అశ్వనీ కుమార్‌ ఉపాధ్యాయ్‌లు ఈ పిటిషన్లను దాఖలు చేసిన విషయం  తెలిసిందే.   ఈ నేపథ్యంలో ఈరోజు సుప్రీంకోర్టులో విచారణపై సర్వత్రా ఉత్కంఠ నెలకొంది. 
 

08:36 - September 21, 2018

హైదరాబాద్ : ఎనిమిదేళ్ల క్రితం జరిగిన బాబ్లీ కేసు....మళ్లీ తెరపైకి వచ్చింది. ఏపీ సీఎం చంద్రబాబు సహా మొత్తం 16 మందికి అరెస్ట్ వారెంట్లు జారీ అయ్యాయి. దీంతో తెలుగు రాష్ట్రాల్లో రాజకీయాలు వేడెక్కాయి. ఇవాళ కోర్టు హాజరు కావాలని ధర్మాబాద్ కోర్టు వారెంట్ ఇవ్వడంతో....చంద్రబాబు, ఇతర నేతల తరపున రీకాల్ పిటిషన్ వేయాలని డిసైడ్ అయ్యారు. మరోవైపు టీడీపీ నుంచి ఇతర పార్టీల్లోకి వలసవెళ్లిన నేతలు...ధర్మాబాద్ కోర్టుకు హాజరుకానున్నట్లు తెలుస్తోంది. 

బాబ్లీ ప్రాజెక్టుతో తెలుగు రాష్ట్రాలకు తీవ్ర అన్యాయం జరుగుతోందంటూ...టీడీపీ పెద్ద ఎత్తున పోరాటం చేసింది. ఎనిమిదేళ్ల క్రితం ప్రాజెక్టు ముట్టడి కార్యక్రమం...అప్పట్లో సంచలనం సృష్టించింది. ఏపీ సీఎం చంద్రబాబు నాయుడుతో పాటు 70 మంది నేతలను మహారాష్ట్ర పోలీసులు...ఐదు రోజుల పాటు నిర్బంధించారు. అంతా ఈ సంఘటనను మరచిపోయిన సమయంలో....అకస్మాత్తుగా చంద్రబాబు, ఇతర నేతలకు ధర్మాబాద్ కోర్టు అరెస్ట్ వారెంట్ జారీ చేసింది. నోటీసులపై న్యాయనిపుణులు, సీనియర్ నేతలతో సుదీర్ఘంగ చర్చించిన చంద్రబాబు...రీకాల్ పిటిషన్ వేయాలని నిర్ణయించారు.  

అలాగే చంద్రబాబుతో పాటు వారెంట్లు అందుకున్నఏపీకి చెందిన మిగిలిన నేతల విషయంలోనూ... ఇదే థియరీని ఫాలో కావాలని టీడీపీ భావిస్తోంది. ధర్మాబాద్ కోర్టులో చంద్రబాబు తరపున హాజరయ్యే న్యాయవాదులు...టీడీపీ నేతల తరుపున కూడా రీకాల్ పిటిషన్ వేయనున్నారు. 2013లో కేసు నమోదు చేసినప్పటికీ....ఇప్పటి వరకు ఎలాంటి నోటీసులు, అరెస్ట్ వారెంట్లు తమకు అందలేదనే విషయాన్ని చంద్రబాబు తరపు న్యాయవాదులు కోర్టుకు దృష్టికి తీసుకెళ్లనున్నారు.  

అలాగే ఎఫ్ఐఆర్ కాపీలు.. ఇతర ఉత్తర ప్రత్యుత్తరాలు మరాఠీ భాషలో ఉండడంతో కేసు విషయంలో తమకు మరింత సమయం కావాలని కోరుతూ వాయిదా అడిగే ఛాన్స్ కన్పిస్తోంది. ఇక అరెస్ట్ వారెంట్లు అందుకున్నవారిలో తెలంగాణకు చెందిన ఎమ్మెల్యేలు ప్రకాష్ గౌడ్, గంగుల కమలాకర్ వంటి నేతలు... ధర్మాబాద్ కోర్టుకు హాజరయ్యే అవకాశాలు ఉన్నాయ్. మొత్తంగా తెలుగు రాష్ట్రాల్లో రాజకీయంగా హీటెక్కించిన అరెస్ట్ వారెంట్ల ఎపిసోడులో కోర్టు ఏ విధంగా స్పందిస్తుందనే అంశంపై రాజకీయ వర్గాల్లో ఉత్కంఠ రేపుతోంది.

16:28 - September 13, 2018

హైదరాబాద్ : ఉమ్మడి హైకోర్టు విభజనపై సుప్రీంకోర్టులో ఆంధ్రప్రదేశ్ తరఫున వాదించేందుకు సీనియర్ న్యాయవాది పాలి నారిమన్ ను ఏపీ ప్రభుత్వం నియమించింది. అందుకు గానూ నారిమన్ కు 33 లక్షల ఫీజు ఇచ్చేందుకు ఏపీ ప్రభుత్వం జీవో విడుదల చేసింది. సుప్రీంకోర్టులో ఏపీ తరఫున పాలి నారిమన్ వాదించనున్నారు. శుక్రవారం సుప్రీంకోర్టులో ఉమ్మడి హైకోర్టు విభజన విచారణకు రానుంది. ఉమ్మడి హైకోర్టు విభజనపై గతంలో సుప్రీంకోర్టులో పిటిషన్ వేశారు. 

 

19:16 - September 12, 2018

కోచ్చి: మహిళా సంఘాల ఉద్యమాల వత్తిడితో కదిలిన కేరళ పోలీసులు బలత్కార కేసులో నిందితుడైన బిషప్ ఫ్రాంకో ములక్కల్ ను విచారణకు రావాల్సిందిగా ఆదేశించారు. 

నలభై ఏళ్ల క్రిష్టయన్ సన్యాసినిని బిషప్ ఫ్రాంకో రెండేళ్లలో (2014-16 సంవత్సరాల మధ్య) తనను 13 సార్లు మానభంగం చేశారని వ్యాటికన్ సిటీలోని మత పెద్దలకు ఫిర్యాదు చేశారు. దీంతో మహిళా సంఘాలు ఉద్యమాలు చేపట్టి బిషప్ ను కఠినంగా శిక్షించాలని కోరుతూ ఆందోళనలు చేస్తున్నారు.

ఈ నేపథ్యంలో పోలీసులు ఈ నెల 19న బిషప్ ను ప్రశ్నించేందుకు రావాలని ఆదేశించారు. ప్రజా సంఘాల వత్తిడి తెచ్చినప్పటికీ పోలీసులు కేసును నీరుగార్చే విధంగా వ్యవహరిస్తున్నారని.. తక్షణం బిషప్ అరెస్టుకు చర్యలు తీసుకోవాలని వారు డిమాండ్ చేస్తున్నారు.  

06:32 - August 31, 2018

హైదరాబాద్ : టీఆర్‌ఎస్‌ తలపెట్టిన ప్రగతి నివేదన సభకు అనుమతి ఇవ్వకుండా ఆదేశాలు జారీ చేయాలని కోరుతూ హైకోర్టులో ప్రజా ప్రయోజన వ్యాజ్యం దాఖలైంది. సెప్టెంబర్‌ 2న జరుపనున్న భారీ బహిరంగ సభ వల్ల ప్రజలకు తీవ్ర ఇబ్బందులతోపాటు పర్యావరణానికి నష్టం వాటిల్లే ప్రమాదం ఉందంటూ పర్యావరణ పరిరక్షణ సమితి అధ్యక్షుడు , న్యాయవాది అయిన పూజారి శ్రీధర్‌ వ్యాజ్యాన్ని దాఖలు చేశారు. ప్రగతిని నివేదించాలనుకుంటే అనేక ప్రత్యామ్నాయ మార్గాలున్నాయని పిటిషనర్‌ తన పిటిషన్‌లో స్పష్టం చేశారు. సాంకేతిక పరిజ్ఞానం విస్తృతంగా అందుబాటులో ఉన్నందున 4జీ లైవ్‌ స్ట్రీమింగ్‌ ద్వారా వివరించవచ్చని పిటిషన్‌లో సూచించారు. ప్రజలకు ఇబ్బంది కలుగుతుందన్న కారణంగా గతంలో ఇందిరాపార్కు, విశ్వవిద్యాలయాల్లో పలు సభల నిర్వహణకు అనుమతి నిరాకరించిన ప్రభుత్వం... ఇప్పుడెలా భారీ బహిరంగ సభ నిర్వహిస్తోందని ప్రశ్నించారు. సభ పేరిట టీఆర్‌ఎస్‌ సర్కార్‌ కోట్ల రూపాయల ప్రజాధనం దుర్వినియోగం చేస్తోందని పిటిషనర్‌ ఆరోపించారు. ప్రగతి నివేదన సభకు అనుమతి నిరాకరిస్తూ ఉత్తర్వులు జారీ చేయాలని పిటిషనర్‌ కోరారు. ఈ పిటిషన్‌పై శుక్రవారం మధ్యాహ్నం హైకోర్టులో విచారణ జరుగనుంది.

07:11 - August 26, 2018

హైదరాబాద్ : దేశ వ్యాప్తంగా సంచలనం సృష్టించిన గోకుల్‌చాట్‌, లుంబినీపార్క్‌ బ్లాస్ట్‌ కేసులో దర్యాప్తు ముగిసింది. కీలక ఆధారాలు సేకరించిన ఎన్‌ఐఏ... కోర్టులో చార్జిషీట్‌ కూడా దాఖలు చేసింది. 11ఏళ్ల సుదీర్ఘ విచారణ తర్వాత.. రేపు తుదితీర్పు రాబోతోంది. ఎన్‌ఐఏ స్పెషల్‌ కోర్టు ఈ కేసులో తీర్పు ఇవ్వనుండడంతో సర్వత్రా ఆసక్తి నెలకొంది. మరోవైపు నాటి బాంబు బ్లాస్ట్‌ బాధితులు న్యాయం కోసం ఎదురు చూస్తున్నారు.
2007 ఆగస్టు 25న బాంబు బ్లాస్ట్‌
ఉమ్మడి రాష్ట్ర రాజధాని హైదరాబాద్‌లోని గోకుల్‌చాట్, లుంబినీపార్క్‌లో ఉగ్రవాదులు మారణహోమానికి పాల్పడి 11 ఏళ్లు పూర్తయ్యింది. 2007 ఆగస్టు 25వ తేదీ సాయంత్రం 7 గంటలకు బాంబ్‌ బ్లాస్ట్‌లు జరిగాయి. దీంతో భాగ్యనగరం ఒక్కసారిగా ఉలిక్కిపడింది.  42 మంది చనిపోగా... 70మందికిపైగా గాయపడ్డారు. 
లుంబినీపార్క్‌, గోకుల్‌చాట్‌ బండార్‌లలో పేలుళ్లు
మొదట సెక్రటేరియట్‌ ఎదురుగా ఉన్న లుంబినీ పార్క్‌లో బాంబు పేలుడు సంభవించింది. ఆ తర్వాత ఐదు నిమిషాలకే కోఠిలోని అత్యంత రద్దీ ప్రదేశమైన గోకుల్‌చాట్‌ బండార్‌లో మరో శక్తివంతమైన బాంబు పేలింది.  రెండు ఘటనల్లో స్పాట్‌లోనే 33మంది అమాయకులు ప్రాణాలు కోల్పోగా... వందలాది మందికి గాయాలయ్యాయి. ఈ పేలుళ్ల వెనుక ఇండియన్‌ ముజాహిద్దీన్‌ హస్తం ఉన్నట్టు విచారణలో తేలింది. పాకిస్తాన్‌ ప్రేరణతో సాగుతున్న ఈ సంస్థకు చెందిన రియాజ్‌ భత్కల్‌, యాసిన్‌ భత్కల్‌, ఇక్భాల్‌ భత్కల్‌ నాయకత్వం వహించినట్టు ముంబై పోలీసులు తేల్చారు.  దీంతో ఈ ఏడుగురు  ఉగ్రవాదులను 2009లో రాష్ట్రానికి తీసుకొచ్చిన రాష్ట్ర కౌంటర్‌ ఇంటెలిజెన్స్‌, అక్టోపస్‌ విభాగాల అధికారులు  వారిని విచారించారు.  ప్రధాన సూత్రధారి అయిన యాసిన్‌ భత్కల్‌ను నేపాల్‌ ప్రాంతం నుంచి పట్టుకొచ్చారు.  కర్నాటక రాష్ట్రంలోని భత్కల్‌ ప్రాంతానికి చెందిన ఈ ముగ్గురు సోదరులలో యాసిన్‌, ఇక్భాల్‌ పట్టుబడ్డారు. అసలు నిందితుడు రియాజ్‌ తర్వాత అల్‌ఖైదాతో సంబంధాలు పెట్టుకున్నట్టు తాజాగా అంతర్జాతీయ ఉగ్రవాద సంస్థ ఐసిస్‌ వైపు ఆకర్షితుడైనట్టు ఎన్‌ఐఏకు సమాచారం అందింది.
రేపు తుది తీర్పు 
నాంపల్లి రెండవ అదనపు మెట్రోపాలిటన్‌ సెషన్స్‌ జడ్జి కోర్టులో చార్జిషీటు దాఖలు చేసింది. దాని ఆధారంగా  ఈ కోర్టులో వారానికి రెండు రోజుల చొప్పున విచారణ చేపట్టారు. దర్యాప్తు బృందం ఈ కేసులో కీలక ఆధారాలను సేకరించింది.  అనంతరం 1125 పేజీలతో కూడిన చార్జిషీట్‌ను కోర్టుకు దాఖలు చేసింది. 11 మందిపై అభియోగాలు నమోదు అయ్యాయి. 286 మంది సాక్ష్యులను ఎన్‌ఐఏ విచారించింది. మొత్తానికి 11 ఏళ్ల సుదీర్ఘ విచారణ తర్వాత ఈ కేసులో సోమవారం తీర్పు వెలువడనుంది. ఎన్‌ఐఏ ప్రత్యేక కోర్టు ఎలాంటి తీర్పు ఇస్తుందోనన్న ఉత్కంఠ సర్వత్రా నెలకొంది.

 

15:43 - August 21, 2018

హైదరాబాద్ : కాంగ్రెస్ ఎమ్మెల్యేలు కోమటిరెడ్డి వెంకటరెడ్డి, సంపత్ లకు హైకోర్టులో ఎదురుదెబ్బ తగిలింది. వారిపై ఉన్న సస్పెన్షన్ వేటుపై సింగిల్ బెంచ్ ఇచ్చిన తీర్పును నిలిపివేస్తున్నట్టు డివిజన్ బెంచ్ కొద్దిసేపటి క్రితం ఆదేశాలు జారీ చేసింది. తెలంగాణ అసెంబ్లీలో గవర్నర్ ప్రసంగిస్తున్న సమయంలో, మండలి చైర్ పర్సన్ స్వామిగౌడ్ పై మైకులు విసిరిన ఘటనలో ఆయన కంటికి గాయం అయింది. దీంతో కాంగ్రెస్ ఎమ్మెల్యేలు కోమటిరెడ్డి, సంపత్ ల శాసనసభ సభ్యత్వాలను రద్దు చేసిన సంగతి తెలిసిందే. ఈ విషయంలో వారిరువురూ హైకోర్టును ఆశ్రయించగా..విచారణ జరిపిన సింగిల్ జడ్జ్, వారిపై అనర్హత వేటు కుదరదని తీర్పిచ్చారు. దీంతో సింగిల్ బెంచ్ తీర్పును సవాల్ చేస్తు టీ.సర్కార్ పిటీషన్ దాఖలు చేసింది. దీంతో ఘటనకు సంబంధించిన వీడియో సాక్ష్యాలను కోర్టులో ప్రవేశపెట్టాలని కోర్టు ఆదేశించింది. ఈ వీడియో సాక్ష్యాలను కోర్టుకు అందించడంలో అసెంబ్లీ అధికారులు విఫలం కావడంతో..వారు ఎమ్మెల్యేలుగా కొనసాగవచ్చని కోర్టు పేర్కొంది. ఇదే కేసులో అసెంబ్లీ స్పీకర్ కు న్యాయస్థానం నోటీసులు కూడా జారీ చేసంది. దీనిపై ప్రభుత్వం డివిజన్ బెంచ్ ని ఆశ్రయించింది. దీనిపై విచారణ చేపట్టిన న్యాయస్థానం..సింగిల్ బెంచ్ తీర్పును రెండు నెలల పాటు సస్పెండ్ చేస్తున్నట్టు ప్రకటించింది. దీంతో తెలంగాణ సర్కార్ కు తాత్కాలికంగా ఊరట లభించింది. కోమటిరెడ్డి, సంపత్ లకు ఎదురు దెబ్బ తగిలింది. కాగా ఈ కేసు తదుపరి విచారణను ధర్మాసనం రెండు నెలలకు వాయిదా వేసింది.

12:41 - August 13, 2018

హైదరాబాద్ : హైదరాబాద్‌లో ఎన్‌ఐఏ తన ఆపరేషన్‌ను కొనసాగిస్తోంది. ఉగ్రవాద కార్యకలాపాలు నిర్వహిస్తున్న ఇద్దరు నిందితులను ఎన్ఐఏ అధికారులు అరెస్ట్‌ చేశారు. నిందితులను అబ్దుల్‌ బాసిత్‌, అబ్దుల్‌ ఖాదర్‌లుగా గుర్తించారు. రాత్రి నిందితులను అధికారులు జడ్జి ముందు ప్రవేశపెట్టారు. అనంతరం నిందితులను ఢిల్లీకి తీసుకెళ్లారు. ఇవాళ పటియాల  కోర్టులో నిందితులను ఎన్‌ఐఏ అధికారులు ప్రవేశపెట్టనున్నారు. వారం రోజుల పాటు కస్టడీకి ఇవ్వాలని కోరనున్నారు. అలాగే కేసును హైదరాబాద్‌కు బదిలీ చేయటానికి ట్రాన్స్‌ఫర్‌ పిటిషన్‌ను ఎన్ ఐఏ అధికారులు వేయనున్నారు. మరిన్ని వివరాలను వీడియోలో చూద్దాం... 

13:29 - August 12, 2018

నిజామాబాద్ : లైంగిక వేధింపుల ఆరోపణలు ఎదుర్కొంటున్న నిజామాబాద్‌ మాజీ మేయర్‌ సంజయ్‌ ఎట్టకేలకు అజ్ఞాతం వీడారు. గత కొన్ని రోజులుగా పోలీసులకు చిక్కకుండా తిరుగుతున్న సంజయ్‌.. ఈరోజు ఏసీబీ కార్యాలయంలో విచారణకు హాజరయ్యారు. సంజయ్‌పై నర్సింగ్‌ విద్యార్థినులు అనేక ఆరోపణలు చేయడంతో పాటు పోలీసులకు ఫిర్యాదు చేశారు. దీంతో పోలీసులు సంజయ్‌పై నిర్భయ, ఎస్సీ, ఎస్టీ అట్రాసిటీ కేసులు నమోదు చేశారు. మరిన్ని వివరాలను వీడియోలో చూద్దాం... 

Pages

Don't Miss

Subscribe to RSS - విచారణ