National News

గుర్‌గావ్: ఓ కారు మంటల్లో చిక్కుకుంది..అయినా ఆగలేదు. మంటల్లోనే కదులుతున్న కారులోంచి దూకి ఒక వ్యక్తి ప్రాణాలు కాపాడుకున్న సంఘటన ఢిల్లీ దగ్గరలోని గుర్‌గావ్‌లో చోటుచేసుకుంది. మంటలతో కారు స్పీడుగా పోతుంటే అటుగా వెళుతున్న ఓ వ్యక్తి దాన్ని చిత్రీకరించాడు. చూపరులను భయభ్రాంతులకు గురిచేసే ఈ సంఘటన వీడియో నెట్‌లో హల్‌చల్ చేస్తోంది. రాకేష్ చందల్ అనే వ్యక్తి దీపావళి బహుమతులను స్నేహితులకు పంచుకుంటూ కారులో ప్రయాణిస్తుండగా ఉన్నట్టుండి ఏదో పెద్ద శబ్దం వినిపించింది. ఏంటో చూద్దామని కారు దిగినా ఏమీ లేకపోవడంతో మళ్లీ కారు స్టార్ట్ చేసి సైబర్ సిటీ ప్లైఓవర్ మీద పోతుండగా మంటలు కనిపించాయి. బ్రేక్ వేసేందుకు చేసిన ప్రయత్నం ఫలించలేదు. దీంతో ఒక్కసారిగా సీటులోంచి జంప్ చేసి రోడ్డుమీదకు దూకి ప్రమాదం నుంచి తప్పించుకోగలిగాడు. మంటలు ఒక్కసారిగా పెరిగి కారు వెనకాలే తనుకూడా పరిగెత్తడం వీడియోలో రికార్డు అయ్యింది. 

చెన్నై: మురుగదాస్ దర్శకత్వం వహించిన సర్కార్ వివాదంలో చిక్కుకుంది. ఈ సినిమా దివంగత నేత జయలలిత ప్రభుత్వాన్ని కించపరిచేవింధంగా ఉందని ఏఐడీఎంకే కార్యకర్తలు విరుచుకుపడుతున్నారు. సినిమా పోస్టర్లను తగలబెట్టి, కోయంబత్తూరు, మధురై, చెన్నై ప్రాంతాల్లో సినిమా హాళ్లపై దాడులు చేయడంతో చిత్ర దర్శకుడు మురుగదాస్ ముందస్తు బెయిల్‌కు శుక్రవారం ధరఖాస్తు చేసుకున్నారు. దీనిపై కోర్టు ఈ రోజు విచారించే అవకాశం ఉంది. ఇక హీరో విజయ్‌కు కూడా పోలీసు భద్రత కల్పించారు.
దళపతి విజయ్ నటించిన ‘సర్కార్’ సినిమా రెండు రోజుల క్రితం విడుదల అయ్యి దాదాపు రూ 100 కోట్లు వసూలు చేసింది. తమిళనాడు న్యాయశాఖ మంత్రి సీ వీ షణ్ముగం సైతం సినిమా అభ్యంతరకరంగా ఉందని.. మనోభావాలను రెచ్చగొట్టేవిధంగా సినిమా ఉందని వ్యాఖ్యానించడం విశేషం. ఇది టెర్రరిస్టులు ప్రజలను భయభ్రాంతులకు గురిచేసే చర్యగా పోల్చడంతో మురుగదాస్ ముందస్తు బెయిల్‌కు అప్పీలు చేసుకున్నారు. 

 

 

పూణే: పోతూ పోతూ రోడ్డు మీద ఉమ్మేసే వారిని నిత్యం మనం చూస్తూనే ఉంటాం. ఈ చెడు అలవాటు చదువుకున్న వారిలో సైతం ఉంటుంది. భాధించే అంశం ఏంటంటే వాళ్లు కనీసం తాము తప్పు చేస్తున్నాం అనే భావనకూడా వీరిలో కలగకపోవడం విచారకరం. ఇక మన హైదరాబాద్‌లో  అయితే చెప్పాల్సిన పనేలేదు. ఏ ప్రభుత్వ ఆఫీసులో చూసినా గోడలు పాన్ మరకలతో ఎంతో అసహ్యంగా ఉంటాయి. ఎన్ని తొట్లు పెట్టినా.. బోర్డులు పెట్టినా జనంలో మార్పు తీసుకురావడం కష్టం అనే అభిప్రాయం పాలకులలో గట్టిగా స్థిరపడిపోయింది.
అయితే మహారాష్ట్రలోని పూణే మునిసిపల్ పరిథిలో అధికారులు ఓ వినూత్న ప్రయత్నం చేస్తున్నారు. ఎవరైనా రోడ్డు మీద ఉమ్మేస్తే రూ 100 జరిమానా విధిస్తున్నారు. ఇక్కడితో అయిపోలేదు వారిచేత రోడ్లు శుభ్రపరిచే కార్యక్రమాన్నికూడా చేపట్టారు పూణే మునిసిపల్ అధికారులు. ఈ కార్యక్రమాన్ని పూణేలోని బిబీవేవాడి ప్రాంతంలో విజయవంతంగా అమలు చేశారు. ఇప్పటివరకూ 25 మందికి ఇటువంటి శిక్షలు విధించినట్టు అధికారలు తెలిపారు. ఇది కఠినమైన శిక్షలే అని మాకు తెలుసు.. కానీ భవిషత్తులో పొగాకును నమిలి ఉమ్మేసే ముందు ఒకసారి ఆలోచిస్తారనే నమ్మకం మాకుంది అని స్థానిక అధికారులు అభిప్రాయపడ్డారు.
 

 

దంతెవాడ: చత్తీస్ ఘడ్ రాష్ట్రం దంతెవాడలో ప్రధానమంత్రి నరేంద్రమోడీని పోలిన వ్యక్తి కాంగ్రెస్ పార్టీ తరఫున ప్రచారం చేస్తున్నారు. మనుషులను పోలిన మనుషులు ఏడుగురు ఉంటారని అంటారు. చత్తీస్ ఘడ్ కు చెందిన అభినందన్ పాఠక్ అచ్చు మోడీ లాగానే ఉంటారు. ప్రస్తుతం ఆయన కాంగ్రెస్ పార్టీ తరఫున బస్తర్ ప్రాంతంలో ప్రచారం చేస్తూ ఓటర్లను ఆకట్టుకుంటున్నారు.  గతంలో బీజేపీ కార్యకర్తగానే ఉన్న పాఠక్ ఇటీవలే కాంగ్రెస్ పార్టీలో చేరారు. దంతెవాడ, కొండగావ్‌, జగ్దల్‌పూర్‌, బస్తర్‌ జిల్లాల్లో ప్రచారం నిర్వహిస్తున్నపాఠక్ తో ఓటర్లు సెల్ఫీలు దిగేందుకు ఉత్సాహం చూపుతున్నారు.

బెంగుళూరు: ఆంధ్రప్రదేశ్ ముఖ్యమంత్రి, తెలుగుదేశంపార్టీ జాతీయ అధ్యక్షుడు చంద్రబాబునాయుడు గురువారం బెంగుళూరులో జేడీఎస్ అధినేత, కర్ణాటక మాజీ సీఎం దేవెగౌడతో, కర్ణాటక ముఖ్యమంత్రి కుమారస్వామితోనూ సమావేశం అయ్యారు. దేశంలో బీజేపీ వ్యతిరేక కూటమి ఏర్పాటులో భాగంగా చంద్రబాబునాయుడు వీరిని కలిశారు. సుమారు 40 నిమిషాలపాటు సమావేశమైన అనంతరం ముగ్గురు నేతలు విలేకరుల సమావేశంలో మాట్లాడారు. 
రాజ్యాంగ బధ్దంగా ఏర్పాటైన సంస్ధలను మోడీ ప్రభుత్వం నిర్వీర్యం చేస్తోందని దేవెగౌడ అన్నారు. కేంద్రలోని బీజేపీని గద్దె దించాలంటే దేశంలోని లౌకికవాద పార్టీలన్నీ ఏకం కావాలని అందులో భాగంగా చంద్రబాబుతో చర్చలు జరిపామని దేవెగౌడ చెప్పారు. కూటమి బలోపేతం కోసం మిగతా పార్టీలతో కూడా చర్చలు జరపాలని చంద్రబాబుని కోరినట్లు ఆయన తెలిపారు. 
ఏపీ ముఖ్యమంత్రి చంద్రబాబునాయుడు మాట్లాడుతూ.... దేశంలోని రాజ్యంగ బధ్దంగా ఏర్పడ్డ సంస్ధలను అడ్డంపెట్టుకుని మోడీ ప్రభుత్వం దేశంలోని చాలా రాష్ట్రాల్లో ప్రతిపక్ష పార్టీలను వేధింపులకు గురిచేస్తోందని ఆరోపించారు. ప్రజాస్వామ్యాన్ని, వ్యవస్థలను, దేశాన్ని కాపాడాలన్నలక్ష్యంతో బెంగళూరు వచ్చానని చంద్రబాబు అన్నారు. పెట్రోల్,డీజిల్ ధరలు దేశంలో పెరిగిపోతున్నాయని,  ఆర్ధిక వ్యవస్ధ దెబ్బతిందని, రెగ్యులేటరీ బాడీ అయిన రిజర్వుబ్యాంకు ప్రస్తుతం మోడీ ప్రభుత్వ ఒత్తిడిలో ఉందని చంద్రబాబు చెప్పారు. ఈడీ, ఆదాయపుపన్ను శాఖలద్వారా గుజరాత్, కర్ణాటక, ఆంధ్రప్రదేశ్‌లలో వేధింపులకు పాల్పడుతూ సంస్ధలను దుర్వినియోగం చేస్తున్నారని ఆయన ఆరోపించారు. వ్యవసాయం సంక్షోభంలో పడిందని, మైనారిటీలు ఇబ్బందులు ఎదుర్కొంటున్నారని  చంద్రబాబు పేర్కొన్నారు.
టీడీపీ, జేడీఎస్‌ పాతమిత్రులేనని, లౌకికవాద శక్తులను ఏకం చేసే విషయంపై తాము చర్చించినట్లు కర్ణాటక ముఖ్యమంత్రి కుమారస్వామి చెప్పారు. కూటమి ఏర్పాటులో దేవెగౌడ, చంద్రబాబు వ్యూహాలు బాగున్నాయని కుమారస్వామి అంటూ...2019 లోక్‌సభ ఎన్నికల్లో 1996నాటి పరిస్థితులు వస్తాయని ఆశాభావం వ్యక్తం చేశారు. బీజేపీ వ్యతిరేక శక్తులు  ఏకం చేయంటంలో భాగంగా చంద్రబాబు నాయుడు ఈవారంలోనే చెన్నై వెళ్లి డీఎంకే అధ్యక్షుడు స్టాలిన్ తోనూ సమావేశం అవుతారు. 

దంతేవాడ: నవంబర్ 12 ఎన్నికల జరగనున్న చత్తీస్ ఘడ్  రాష్ట్రంలో మావోయిస్టులు మరోసారి రెచ్చిపోయారు. ప్రధానమంత్రి నరేంద్రమోడీ, కాంగ్రెస్ పార్టీ అధ్యక్షుడు రాహుల్ గాంధీ శుక్రవారం చత్తీస్ ఘడ్ లో పర్యటించనున్నారు. వారి పర్యటనకు ఒక రోజు ముందు మావోయిస్టులు ఈ ఘాతకానికి పాల్పడ్డారు. చత్తీస్ ఘడ్  రాష్ట్రం దంతేవాడ జిల్లాలోని బచేలి సమీపంలో గురువారం మావోయిస్టులు ఒక బస్సుపై  దాడి చేశారు. ఈ ఘటనలో ఒక సీఐఎస్ఎఫ్ జవాన్ తో సహా ఐదుగురు మరణించారు. మరో ముగ్గురు గాయపడ్డారు. గాయపడ్డ వారిని ఆసుపత్రికి తరలించి చికిత్స అందిస్తున్నారు. 
గడచిన 2 వారాల్లో మావోయిస్టులు భద్రతా దళాలపై దాడులకు పాల్పడటం ఇది మూడోసారి.  అక్టోబర్ 30 న ఎన్నికల వార్తల కవరేజ్ కు  వెళ్లిన దూరదర్శన్ టీంపై పైదాడి చేయగా దూరదర్శన్ కెమెరామెన్ అచ్యుతానందన్ మరణించారు.  వారికి రక్షణగా వెళ్లిన  మరో ముగ్గురు భద్రతా సిబ్బంది కూడా ప్రాణాలు కోల్పోయారు. అక్టోబరు 27న  ఆవపల్లి వద్ద జరిగిన మరో దాడిలో నలుగురు సీఆర్పీఎఫ్ జవాన్లు  మరణించారు.
90 అసెంబ్లీ నియోజకవర్గాలున్న చత్తీస్ ఘడ్ లో తొలిదశ పోలింగ్  నవంబర్ 12న జరుగుతుంది.  తొలిదశలో  మావోయిస్టు ప్రభావం ఎక్కువగా ఉన్న 8 జిల్లాల్లోని 18 నియోజకవర్గాలలో ఎన్నికలు జరుగుతున్నాయి, మిగిలిన  72 నియోజకవర్గాలలో నవంబర్  20న పోలింగ్ జరుగుతుంది. 

ఢిల్లీ: నోట్ల రద్దుకు ఈరోజుకు అంటే నవంబర్ 2019నాటికి రెండేళ్లు పూర్తయ్యాయి. నోట్ల రద్దు విషయంపై 2016 నవంబర్ 8 రాత్రి ప్రధాని నరేంద్రమోదీ ప్రకటనతో దేశం యావత్తు షాక్ కు గురయ్యింది. పెద్దల నుండి సాధారణ ప్రజానీకం వరకూ నివ్వెరపోయారు. దీంతో తెల్లారేసరికి దేశంయామత్తు భయాందోళనలకు గురయ్యింది. నల్లధనాన్నిన వెలికి తీసేందుకే పెద్ద నోట్లను రద్దు చేశామని కేంద్రం సమర్థించుకుంది. దేశ ప్రజలను అర్థరాత్రికి రాత్రి నడిరోడ్డుపై నిలబెట్టేసింది. నల్లధనం మాట ఎలా వున్నా దేశ ఆర్థిక వ్యవస్థ ఛిన్నా భిన్నం అయిపోయింది.

Image result for demonetisation peaple proublumsచిరు వ్యాపారుస్థుల నుండి పెద్ద వ్యాపారుల వరకూ ఏం చేయాలో పాలుపోక అతలాకుతలం అయిపోయారు. ఈ నేపథ్యంలో పెద్ద నోట్ల రద్దుకు రెండేళ్లు నిండిన  సందర్భంగా కేంద్ర ఆర్థిక మంత్రి అరుణ్ జైట్లీ నోట్ల రద్దు అసలు ఉద్దేశాన్ని విశదీకరించారు. డీమానిటైజేషన్ అదే పెద్ద నోట్ల రద్దు అసలు ఉద్దేశం నగదును సీజ్ చేయటం కాదు.. ఎక్కువ నగదు కలిగిఉన్న వారిచేత పన్ను చెల్లించేవిధంగా చేయడమేనని ఆర్థికమంత్రి వివరణ ఇచ్చారు. ‘‘లెక్కలోలేని నగదును ఆర్థిక వ్యవస్థలోకి తీసుకురావడంతోపాటు.. వారిచేత పన్ను చెల్లింపచేయడమే ప్రధాన ఉద్దేశం. అయితే దేశంలో నగదు వినియోగాన్ని తగ్గించి.. డిజిటల్ ట్రాన్సాక్షన్స్‌ను పెంచే విధానం అవసరం దేశానికి ఉంది’’ అంటూ బుధవారం జైట్లీ వివరించారు. కానీ ఇది ఎంతవరకూ వాస్తమో? ఇది ఎంతవరకూ నెరవేరిందో కేంద్ర ప్రభుత్వానికి కూడా ప్రశ్నార్థకంగా మారటం గమనించాల్సిన విషయం. 

 

 

న్యూఢిల్లీ: నోట్ల రద్దుకు రెండేళ్లు నిండింది. ఈ సందర్భంగా కేంద్ర ఆర్థిక మంత్రి అరుణ్ జైట్లీ నోట్ల రద్దు అసలు ఉద్దేశాన్ని విశదీకరించారు. డీమానిటైజేషన్ అదే పెద్ద నోట్ల రద్దు అసలు ఉద్దేశం నగదును సీజ్ చేయటం కాదు.. ఎక్కువ నగదు కలిగిఉన్న వారిచేత పన్ను చెల్లించేవిధంగా చేయడమేనని ఆర్థికమంత్రి వివరణ ఇచ్చారు. ‘‘లెక్కలోలేని నగదును ఆర్థిక వ్యవస్థలోకి తీసుకురావడంతోపాటు.. వారిచేత పన్ను చెల్లింపచేయడమే ప్రధాన ఉద్దేశం. అయితే దేశంలో నగదు వినియోగాన్ని తగ్గించి.. డిజిటల్ ట్రాన్సాక్షన్స్‌ను పెంచే విధానం అవసరం దేశానికి ఉంది’’ అంటూ గురువారం జైట్లీ వివరించారు. 

Image result for old indian currency notes
డీమానిటైజేషన్ తర్వాత యూపీఐ యాప్ విడుదలచేయడం ద్వారా ఢిజిటల్ లావాదేవీల్లో భారీ మార్పులు వచ్చాయి. ఇంతకుముందు కేవలం 50 లక్షల లావాదేవీలు అక్టోబర్ 2016 సంవత్సరం జరగగా..వీటి సంఖ్య సెప్టెంబర్, 2018 నాటికి 598 లక్షలకు చేరింది.   అలాగే డీమానిటైజైషన్ తర్వాత భీమ్ లావాదేవీలు కూడా భారీగా పెరిగాయి. 
 

 

ఉత్తరప్రదేశ్ : దీపావళి పర్వదినాన్ని పురస్కరించుకుని అయోధ్యలో 'అయోధ్య దీపోత్సవ్ 2018' పేరిట ఉత్తర్ ప్రదేశ్ ముఖ్యమంత్రి యోగి ఆదిత్యనాథ్ చేపట్టిన అయోధ్య దీపోత్సవానికి గిన్నిస్ బుక్ ఆఫ్ వరల్డ్ రికార్డ్స్‌లో చోటు దక్కింది. సరయు నది తీరాన 3,01,152 దీపాలు వెలిగించినందుకుగాను అయోధ్య దీపోత్సవ్ 2018 ఈ రికార్డ్ సొంతం చేసుకుంది. కాగా ఈ దీపోత్సవానికి సౌత్ కొరియా అధ్యక్షుడు సతీమణి సూరిరత్నప్రత్యేక అతిథిగా విచ్చేయటం మరో విశేషం. ఏటా వందల సంఖ్యలో దక్షిణ కొరియన్లు మన దేశానికి వచ్చి ఉత్తరప్రదేశ్‌లో ఉన్న అయోధ్యను దర్శించుకొని వెళుతుంటారు.మన రామాయణ దేవుడి జన్మభూమితో వారికేం పని అంటే.. దాని వెనక ఒక పెద్ద కథే ఉంది. ఈ నేపథ్యంలో క్రీస్తు శకం 48వ సంవత్సరంలో కొరియా యువరాజును సూరిరత్న కొరియా యువరాజును వివాహం చేసుకున్నారు. వివాహానంతరం సూరిరత్న పేరును హియో హ్వాంగ్-ఓక్ గా పేరు మార్చుకున్నారు. 
 

ఢిల్లీ : దీపావళి పండుగ వేడుకల సందర్భంగా వాహనదారులకు శుభవార్త అందినట్లే. ఇప్పటివరకూ పెట్రోల్,డీజిల్ పెరుగతుపోయి సామాన్యుడికి చుక్కలు చూపిన పెట్రోల్ ధరలు గత 20 రోజుల నుండి తగ్గుముఖంపట్టాయి. దీనికి కారణం ఇంటర్నేషనల్ మార్కెట్లో క్రూడాయిల్ ధరలు తగ్గుతూ ఉండటమే. దీంతో  దేశంలోనూ పెట్రోలు, డీజిల్ ధరల తగ్గుదల కొనసాగుతోంది. నేడు లీటరు పెట్రోలుపై 21 పైసలు, డీజిల్ పై 18 పైసలు తగ్గిస్తున్నట్టు ప్రభుత్వ రంగ చమురు సంస్థ ఇండియన్ ఆయిల్ కార్పొరేషన్ ప్రకటించింది. దీంతో దేశ రాజధాని న్యూఢిల్లీలో పెట్రోలు ధర రూ. 78.21కి, డీజిల్ ధర రూ. 72.89కి తగ్గింది. దేశ ఆర్థిక రాజధానిగా పేరున్న ముంబైలో పెట్రోలు ధర లీటరుకు రూ. 83.72, డీజిల్ ధర రూ. 76.38కి చేరుకోగా మిగతా ప్రాంతాల్లోనూ ధరలు ఆ మేరకు తగ్గాయి.
 

అమరావతి : రాహుల్‌ను కలిసి అధికార ఎన్డీయేలో గుబులు రేపిన టీడీపీ అధినేత చంద్రబాబు విపక్షాలను ఏకం చేసే ప్రక్రియను ముమ్మరం చేశారు. ఇందులో భాగంగా ఇవాళ సాయంత్రం బెంగళూరు వెళ్తున్నారు. దేవెగౌడ, కుమారస్వామిలను కలిసి భవిష్యత్‌ రాజకీయ పరిణామాలపై చర్చించనున్నారు. 

Image result for chandrababu mamata banerjeeరాష్ట్రానికి హామీలు ఇచ్చి.. మాట నిలబెట్టుకోకుండా మోసం చేసిన కేంద్రంపై చంద్రబాబు పోరాటం చేస్తున్నారు. ఎన్డీయే కూటమి నుంచి టీడీపీ బయటకు రావడం, అనంతరం బీజేపీ-టీడీపీ నేతల మాటల యుద్దం కొనసాగడం, ఆ తర్వాత టీడీపీ నేతల ఇళ్లపై ఏసీబీ దాడులు జరగడంతో ఈ వివాదం మరింత ముదిరింది. దీంతో చంద్రబాబు బీజేపీయేతర కూటమిని బలోపేతం చేసేందుకు సిద్దమయ్యారు. ఇందులో భాగంగా ఢిల్లీ వెళ్లి జాతీయ నేతలను కలిసిన చంద్రబాబు.. ఆ తర్వాత కాంగ్రెస్‌ అధ్యక్షుడు రాహుల్‌ను కలిసి సంచలనం లేపారు. ఇప్పటివరకు ఉత్తరాది రాష్ట్రాల నేతలను కలిసిన చంద్రబాబు.. ఇప్పుడు దక్షిణాది నేతలను కలిసే పనిలో పడ్డారు .ఇందులో భాగంగా ఇవాళ బెంగళూరు వెళ్తున్నారు. కర్నాటక సీఎం కుమారస్వామి, మాజీ ప్రధాని దేవెగౌడలతో సమావేశమవుతున్నారు. జేడీఎస్‌ నేతల సమావేశం అనంతరం... బెంగళూరు నుంచి నేరుగా చెన్నై వెళ్లి డీఎంకే అధినేత స్టాలిన్‌ను కూడా కలిసే అవకాశం ఉంది. ఇక కర్నాటక, తమిళనాడు పర్యటన అనంతరం చంద్రబాబు పశ్చిమబెంగాల్‌ సీఎం మమతా బెనర్జీని కూడా కలవనున్నారు. కర్నాటక ఉప ఎన్నికల్లో బీజేపీకి ఘోర పరాభావం ఎదురుకావడంతో బీజీపీయేతర శక్తులను ఏకతాటిపైకి తీసుకువచ్చే ప్రయత్నాలను చంద్రబాబు ముమ్మరం చేశారు. 

Image result for chandrababu kumaraswamyడిసెంబర్ నాటికి మోడీకి వ్యతిరేకంగా ఉన్న నాయకులను నేరుగా కలిసి వారి మద్దతు కూడగట్టే ప్రయత్నంలో ఉన్నారు చంద్రబాబు. డిసెంబర్‌లో నాలుగు రాష్ట్రాల ఎన్నికల ఫలితాలు రానున్నాయి. ఫలితాలు వచ్చిన త‌ర్వాత జ‌న‌వ‌రిలో బీజేపీయేతర కూటమి నేతలతో మరోసారి హ‌స్తిన‌లో ఒక స‌మావేశాన్ని ఏర్పాటు చేయాల‌ని చంద్రబాబు యోచిస్తున్నారు. జ‌న‌వ‌రి స‌మావేశం త‌రువాత ఆయా రాష్ట్రాల్లో నిర‌స‌న ర్యాలీలు, స‌భ‌ల్లో విపక్ష నేతలు పాల్గోనేలా ఒక ప్రణాళిక‌ను రూపొందిస్తున్నారు.
ఏదిఏమైనా తాజాగా వెలువడ్డ కర్నాటక ఉప ఎన్నికల ఫలితాలు బీజేపీ వ్యతిరేకంగా రావడంతో.. బీజేపీయేతర శక్తులను ఏకం చేసేందుకు కసరత్తు చేస్తున్న చంద్రబాబుకు మరింత బలం చేకూరింది. మరి ఈ స్పీడ్‌ ఇలాగే కొనసాగుతుందా ? లేదా ? చూడాలి. 
 

చెన్నై: సుప్రీంకోర్టు ఆదేశాలను తమిళనాడు పోలీసులు తు.చ తప్పకుండా పాటించినట్టున్నారు. దీపావళి పండుగ సందర్భంగా ప్రజలను కేసులతో భయపెట్టారు. మంగళవారం నుంచి బుధవారం మధ్యాహ్నం వరకు అందిన సమాచారం ప్రకారం..దీపావళి బాణాసంచా కాల్చే సమయాన్ని పాటించని, సుప్రీం కోర్టు ఆదేశాలను ఉల్లంఘించిన వారిపై తమిళనాడు రాష్ట్ర వ్యాప్తంగా 2100 కేసులు నమోదు చేసి... 650 మందిని అరెస్ట్ చేశారు. వీటిలో చెన్నైలో అత్యధికంగా 344, కోయంబత్తూరులో 184 కేసులు, విల్లిపురంలో 160 కేసులు నమోదయ్యాయి. సెక్షన్ 291, 188, 268 కింద ఈ కేసులు నమోదు చేశారు.  సుప్రీం ఆదేశాల మేరకు ఉదయం 6 నుంచి 7 గంటల వరకు, సాయంత్రం 7 నుంచి 8 గంటల వరకు బాణాసంచా కాల్చాలని తమిళనాడు ప్రభుత్వం ఉత్తర్వులు జారీ చేసింది. ఈ నిబంధలను పాటించని వారిపై న్యూసెన్స్ కేసులు నమోదు చేశారు. 

బెంగుళూరు: బళ్లారి మైనింగ్ బ్యారన్, కర్ణాటక మాజీ పర్యాటకశాఖ మంత్రి, బీజేపీ నాయకుడు గాలి జనార్ధనరెడ్డి మరోసారి చిక్కుల్లో పడ్డారు. కాకపోతే ఈసారి ఆయన మైనింగ్ కేసులో కాదు, రూ.18కోట్ల ముడుపుల కేసులో సిటీ క్రైం బ్రాంచ్(సీసీబీ) పోలీసులు ఆయన్ని విచారించనున్నారు. ఆయనపై బెంగుళూరు పోలీసులు లుక్-ఔట్ నోటీసులు జారీచేశారు. 
బెంగుళూరు పోలీసు కమీషనర్ సునీల్ కుమార్ బుధవారం జరిగిన విలేకరుల సమావేశం లోచెప్పిన వివరాల ప్రకారం ...."సయ్యద్ అహ్మద్ ఫరీద్‌ అనే వ్యక్తి  2016-17లో ఆంబిడెంట్ గ్రూప్‌ అనే కంపెనీని ఏర్పాటు చేశాడు. నెలకు 30 నుంచి 40 శాతం లాభాలు ఇస్తామని పెట్టుబడిదారులకు హామీ ఇచ్చి. వారివద్ద నుంచి సుమారు రూ.600 కోట్ల మేరకు వసూలు చేశాడు. కొన్ని నెలల తర్వాత  పెట్టుబడి దారులకు లాభాలు ఇవ్వలేక పోవటంతో కొందరు పెట్టుబడిదారులు ఫరీద్ పై ఫిర్యాదు చేశారు. పోలీసులు డీజే హళ్లి పోలీసు స్టేషన్ లో ఫరీద్ పై కేసు నమోదు చేశారు.  కేసులో భాగంగా 2017 జనవరిలో ఎన్‌ఫోర్స్‌మెంట్ డైరెక్టరేట్‌ (ఈడీ) కంపెనీలో సోదాలు చేసి విలువైన పత్రాలును స్వాధీనం చేసుకుంది. 
ఫరీదును విచారించగా.. ఈకేసు నుంచి బయటపడేయటానికి గాలి జనార్ధనరెడ్డితో రూ.18 కోట్లు డీల్ కుదుర్చుకున్నట్లు చెప్పాడు. ఫరీద్ రూ.18 కోట్లను గాలి సూచనల మేరకు మధ్యవర్తులకు అందచేశాడు. మొదటగా రూ.18 కోట్లను రమేష్ కొఠారీ అనే బంగారం వర్తకుడికి ఇవ్వగా, రమేష్ ఆసొమ్ముతో 57 కేజీల బంగారాన్నికొని జనార్దన్ రెడ్డి వద్ద పీఏగా పనిచేస్తున్న అలీఖాన్‌ సూచనల  మేరకు బళ్లారికి  చెందిన రాజ్‌మహల్‌ జ్యూయలర్స్ యజమాని రమేష్ కి పంపించినట్లు తెలిపాడు.  
గత కొద్దిరోజులుగా వినియోగదారుల ఫిర్యాదులు పెరుగుతుండటంతో పోలీసులు విచారణ వేగం పెంచారు. విచారణలో భాగంగా రమేష్ కొఠారిని, రమేష్ ను అదుపులోకి తీసుకుని విచారిస్తున్నారు.  వీరి బ్యాంకు ఖాతాలను జప్తు చేసారు. కాగా ఈకేసులో గాలి జనార్ధన రెడ్డి ఈడీ అధికారులకు లంచం ఇవ్వజూపినట్లు ఆరోపణలు నమోదయ్యాయని ఒక వార్తా సంస్ధ తెలిపింది. కేసు విచారణ గమనించిన గాలి జనార్ధనరెడ్డి పరారయ్యారు. సెర్చ్ వారెంట్‌తో బెంగళూరు, బళ్లారిలోని జనార్దన్‌రెడ్డి నివాసాల్లో మూడు సీసీబీ బృందాలు తనిఖీలు చేస్తున్నాయి. ఆయన్నుఅరెస్టు చేసేందుకు బెంగుళూరులోని ఆయన ఇంటికి వెళ్లినప్పుడు ఇంటికి తాళం వేసి ఉంది. పోలీసులు డూప్లికేట్ తాళంతో తెరిచి ఇంట్లో సోదాలు నిర్వహించారు. ఆయన దేశం విడిచి వెళ్లే అవకాశం ఉండటంతో పోలీసులు లుక్-ఔట్ నోటీసులు జారీచేశారు. మరో వైపు ఏసీపీ సుబ్రహ్మణ్యం ఆధ్వర్యంలోని ఒక బృందం తెలంగాణాలో గాలిజనార్ధన రెడ్డి కోసం గాలిస్తోంది. 

 

ఢిల్లీ : ఢిల్లీ నుండి గల్లీ వరకు చూసుకుంటే సీమ టపాకాయల్లాంటి మాటలతో ప్రజలను ఆకట్టుకునే నేతలు మనదేశంలో కొదవేం లేదు. మరి ఈ దీపావళి సందర్భంగా క్రాకర్స్ కు పొలికల్ ను జత చేస్తే  టాపాకాయల్లాంటి తమ మాటలతో ఏఏ నేతలున్నారో కాసేసు సరదాగా చూసేద్దాం..

మేడిన్ గుజరాత్ ప్రధాని నరేంద్ర మోదీ..
మేడిన్ గుజరాత్ నుండి తయారైన ఈ పొలిటికల్ క్రాకర్ అందరికంటే ఫస్ట్ వచ్చేశారు. ప్రధాని అయిన అనంతరం ఆకాశంలోకి వెళ్లాక ఆయన తీసుకున్న సంచలనాత్మక నిర్ణయాలు ఆకాశంలోకి వెళ్లాకు పేలిన బాంబులాగా తయారయ్యాయి. ఉదాహరణకు పెద్ద నోట్ల రద్దు, జీఎస్టీ అమలు వంటి పలు సంచలనాత్మక నిర్ణయాలు అంచనాలకు తల్లకిందులు చేస్తు అట్టర్ ప్లాప్ అయ్యాయి. మరి ఈ పొలిటికల్ రాకెట్ 2019లో వచ్చే ఎన్నికల్లో తన గమ్యాన్ని చేరుతుందో లేదో  వేచి చూడాలి..
వారసత్వ రాజకీయాల్లో చిచ్చుబుడ్డి రాహుల్  గాంధీ..
వారసత్వ రాజకీయాల్లో చిచ్చుబుడ్డి కాంగ్రెస్ జాతీయ అధ్యక్షుడు రాహుల్ గాంధీ. కాంగ్రెస్ పగ్గాలు చేపట్టిన తరువాత అంతకు ముందుకు వున్న రాహుల్ కు చాలా తేడా వుంది. పగ్గాలు చేతికొచ్చాక రాహుల్ చిచ్చుబుడ్డిలా రెచ్చిపోతున్నారు, అధికార పార్టీపై మాటలతో విరుచుకుపడుతున్నారు. కాగా కొన్నిసార్లు మాటలతో వెలిగిపోయే రాహుల్ కొన్ని సందర్భాల్లో మాత్రం తుస్సుమంటారు ఆ పార్టీ నేతలే అంటుంటారు. మరి మన దీపావళి చిచ్చుబుడ్డి మన రాహుల్ గాంధీ అన్నమాట. 
టెన్ థౌజెంట్ వాలా కేసీఆర్..
తెలంగాణలో టెన్ థౌజెంట్ వాలా వంటివారు. మాటలతో మంత్రం వేసేస్తారు. ఎంతటివారినైనా సన్నాసులు, దద్దమ్మలు, వాజమ్మలు అంటు బాంబుల్లాంటి మాటలతో చిత్తు చేసేస్తారు మన కేసీఆర్. తన మాటలతో వినేవారిని మంత్రముగ్ధుల్ని చేసేస్తారు.
uttam and ktr కోసం చిత్ర ఫలితంథౌజంట్ వాలాలా కేటీఆర్..
తండ్రికి తగ్గ తనయుడు అనిపించుకుంటారు. కేటీఆర్ మాటల వెల్లువలో తండ్రికి చాలా పోలికలున్నాయి. ఉత్తమ్ కుమార్ రెడ్డి..తెలంగాణ కాంగ్రెస్ అద్యక్షుడు ఉత్తమ్ కుమార్ రెడ్డి మాటలతో కోటలు కట్టేస్తారు. ఇప్పటివరకూ సైలెంట్ గావున్న ఉత్తమ్ ఎన్నికల వేళ మాత్రం సైటెంట్ గా వుండి దీపావళి తాటాకు బాంబ్ లాగా ఒక్కసారిగా సౌండ్ రేంజ్ చేస్తు పేలిపోతారు. అందుకే ఆయన దీపావళి తాటాకు బాంబ్ అన్నమాట.
నారా చంద్రబాబు నాయుడు..
రాజకీయాలలో అపర చాణుక్యుడికి ఏమాత్రం తీసిపోరు. అనవసరమైన మాటలు..అనవసరమై వ్యాఖ్యలు చేయరు. పొలిటికల్ మంత్రాంగంలోను, యంత్రాంగంలోను ఆయనను మించినవారు లేరంటే అతిశయోక్తి లేదు. తన తెలివితేటలతో రాష్ట్రాన్ని అందనంత ఎత్తుకు తీసుకెళ్లాలంనుకుంటారు. అందుకే ఆయన అవ్వాయల్ సువ్వాయ్ రాకెట్ లాంటివారు. pawan and jagan కోసం చిత్ర ఫలితం
జనసేన పవన్ కళ్యాణ్..
టైమ్ బాంబ్ లాంటివారు జనసేన అధినేత పవన్ కళ్యాణ్. సరిగ్గా ఎన్నికల టైమ్ చూసుకుని పేలేందుకు సిద్ధంగా వున్నారు పవన్. అటు అధికార పక్షం ఇటు ప్రతిపక్షాలమీద బాంబుల్లాంటి మాటలతోవిరుచుకుపడ్తున్నారు పవన్. ఏపార్టీతోనైనా పొత్తులు పెట్టుకుంటారనే ప్రశ్నలకు ఫుల్ స్టాప్ పెట్టేస్తు తాను ఒంటరిగానే పోటీచేస్తాననీ..తాను సీఎం అవుతానని ప్రత్యర్థుల గుండెల్లో బాంబు పేల్చేశారు. మరి ఈ పొలిటికల్ టైంబాంబ్ 2019 ఎన్నికల్లో పేలుతుందో లేదో చూడాలి.

vijayashanthi and roja కోసం చిత్ర ఫలితంఇక పాదయాత్ర అటు భూచక్రంలా తిరుగుతు మెరుపులు మెరిపంచే జగన్ 2019 ఎన్నికల్లో వెలుగులు పంచుతారో లేదో చూడాలి. అలాగే జేసీ దివాకర్ రెడ్డి ఎప్పుడు చిటపటలాడుతు కనిపిస్తుంటారు. చిటపటల మాటలతో మెరిసిపోతుంటారు జేసీ.

ఇక మహిళా లీడర్స్ లో రోజా,విజయశాంతి లక్ష్మీ బాంబ్ లాంటివారు. లక్ష్మీబాంబ్ ల్లాంటి డైలాగ్స్ తో విరుచుకుపడుతుంటారు ఈ మహిళా మణులు. ఇలా పొలిటికల్ బాంబ్ లు రానున్న ఎన్నికల్లో తమ సత్తా ఎలా చాటుతారో వేచి చూద్దాం.

 

కర్ణాటక : మైనింగ్ మాఫియా కింగ్ గాలి జనార్థన్ రెడ్డి మరోసారి వార్తల్లోకెక్కారు. విలాసవంతమైన జీవితానికి గాలి కేరాఫ్ అడ్రస్. అలాగే వివాదాలకు కూడా ఆయన కేంద్ర బిందువు. సీబీఐ కేసుల్లో భాగంగా భారీ అక్రమాస్తుల కేసు, మైనింగ్ మాఫియా వంటి బడా బడా కేసుల్లో వున్న గాలి మరోసారి తన నైజాన్ని చాటుకున్నారు.

బెంగళూరులోని అంబిడెంట్ కంపెనీ విదేశీ పెట్టుబడుల విషయంలో విచారణను ఎదుర్కొంటోంది. ఈ నేపథ్యంలో గాలి వర్గీయులు కంపెనీ ప్రతినిధులతో భేటీ అయ్యారు. సమస్యను పరిష్కరించేందుకు డీల్ కుదుర్చుకున్నారు. ఇందులో భాగంగా కంపెనీ 57 కేజీల బంగారు కడ్డీలను రహస్యంగా అందించింది. దీంతో రంగంలోకి దిగిన గాలి జనార్దన రెడ్డి ఓ ఈడీ అధికారికి రూ.కోటి లంచం ఇచ్చారు. అయితే ఈ వ్యవహారంపై పక్కా సమాచారం అందుకున్న పోలీసులు రంగంలోకి దిగారు.

బెంగళూరు, బళ్లారి, హైదరాబాద్, ఢిల్లీ సహా పలుచోట్ల గాలి జనార్దన రెడ్డి నివాసాలు, ఆఫీసులపై దాడులు నిర్వహించారు. కాగా, ఈ దాడుల గురించి ముందే తెలుసుకున్న గాలి అక్కడి నుంచి పరారయ్యారు. కాగా, లంచం విషయంలో గాలిని త్వరలోనే ప్రశ్నిస్తామని పోలీస్ ఉన్నతాధికారి ఒకరు తెలిపారు. ఈడీ అధికారికి రూ.కోటి లంచం ఇచ్చిన వ్యవహారంలో గాలి జనార్దనరెడ్డికి నోటీసులు జారీచేసినట్లు వెల్లడించారు. ప్రస్తుతం జనార్దనరెడ్డిని పట్టుకునేందుకు గాలింపు కొనసాగుతోందని పేర్కొన్నారు.

 

ఉత్తరాఖండ్: ప్రధాని నరేంద్రమోదీ కేదార్‌నాథ్ పుణ్యక్షేత్రానికి చేరుకున్నారు. కేదార్‌నాథ్ ఆలయ పరిసర ప్రాంతాలను ప్రధాని పరిశీలించారు. అక్కడి భక్తులతో కాసేపు ముచ్చటించారు. దీపావళిని పురస్కరంచుకుని మోదీ కేదార్‌నాథ్ ఆలయంలో ప్రత్యేక పూజలు చేశారు.
ప్ర‌జ‌ల‌కు దీపావ‌ళి శుభాకాంక్ష‌లు తెలిపిన మోడీ... 
ప్ర‌ధాని మోడీ దేశ ప్ర‌జ‌ల‌కు దీపావ‌ళి శుభాకాంక్ష‌లు తెలిపారు. ఈ మేర‌కు ఆయ‌న త‌న ట్విట్ట‌ర్ ఖాతాలో ట్వీట్ చేశారు. ప్ర‌తి ఒక్క‌రి జీవితంలో ఈ దీపావ‌ళి వెలుగులు నింపాల‌ని, ప్ర‌జ‌ల జీవితాల్లో సంతోషాలు నెల‌కొనాల‌ని ఆయ‌న ఆకాంక్షించారు.

 

 
 
 
 

తమిళనాడు : దేశ అత్యున్నత న్యాయస్థానం అయిన సుప్రీంకోర్టు ఆదేశాలను కూడా బేఖాతరు చేసినందుకు వారంతా అరెస్ట్ అయ్యారు. కాగా దీపావళికి బాణాసంచా కాల్చుకోవటాన్నిరాత్రి 8 గంటల నుండి 10 గంటల వరకు 2గంటలకు పరిమితంచేస్తూ తీర్పు చెప్పింది.  వాస్తవానికి గత ఏడాది బాణాసంచా విక్రయాలపై సుప్రీం కోర్టు నిషేధం విధించింది. ఈ నేపథ్యంలో దీపావళి పండుగ వేళ తమిళనాఢు అంతటా టెన్షన్, టెన్షన్ వాతావరణం నెలకొంది. పండుగ సందర్భంగా నిన్న ఉదయం 6 గంటల నుంచి 7 వరకూ.. తిరిగి రాత్రి 7 నుంచి 8 గంటల మధ్యలో బాణసంచా కాల్చుకోవడానికి ప్రభుత్వం అనుమతి ఇచ్చింది. అయితే ఈ ఉత్తర్వులను చాలాచోట్ల ప్రజలు పట్టించుకోలేదు. పండుగ సందర్భంగా కుటుంబ సభ్యులతో కలిసి బాణసంచా కాల్చుతూ సంబరాలు చేసుకున్నారు. దీంతో పోలీసులు కొరడా ఝులిపించారు. తమిళనాడు వ్యాప్తంగా 1,000 మందిపై కేసులు నమోదుచేశారు. వీరిలో 600 మందిని పోలీసులు అరెస్ట్ చేయగా, 400 మంది ప్రజలు బెయిల్ పై బయటకు వచ్చారు. మిగతావారిని కోర్టులో హాజరుపర్చి డిమాండ్ కు తరలించారు. 
 

హైదరాబాద్ : దీపం ప్రాణానికి ప్రతీక. పరమాత్మకి ప్రతిరూపం. అందుకే ఏపూజకైనా ముందు దీపారాధనతోనే ప్రారంభిస్తారు. దేవుడిని పూజించడం కంటే ముందు ఆ దేవుడికి ప్రతిరూపమైన దీపాన్ని ఆరాధిస్తామన్నమాట. ఏ ఉపచారాలూ చేయలేకపోయినా ధూపం, దీపం, నైవేద్యాలను తప్పక చేయాలంటారు పెద్దలు. ముక్కోటి దేవతలకూ వాహకంగా నిలిచే అగ్ని సాక్షాత్తూ లక్ష్మీ స్వరూపం కూడా. అందుకే దీపాన్ని అర్చించిన వారికి లక్ష్మీకటాక్షం తప్పక లభిస్తుందంటారు. ఎన్నో విశిష్టతలకు నెలవైన దీపాన్ని ఎలా ఆరాధించాలీ, దీపారాధన సమయంలో ఎలాంటి నియమనిబంధనలు పాటించాలీ మొదలైన అంశాలను కూడా శాస్త్రాల్లో నిక్షిప్తం చేశారు మన పెద్దలు.

Image result for deepavaliపంచ భూతాత్మక సృష్టికి ప్రతీక దీపం. దీప కాంతి జ్ఞానానికీ, శుభానికీ, శాంతికీ సంకేతమనే ఆర్య భావనా సంస్కృతి మనది. పర్యావరణహితంగా పూలు, రంగవల్లులు వాటి నడుమ వెలిగే అందమైన దీపాలు మనలో ఆనందాలు నింపే అసలైన వెలుగులు. ఒక చిన్న దీపం గదిలోని చీకటినంతటినీ తరిమేస్తుంది. అలాంటిది మంచి మనసుతో బంధాల అమరికతో ఒదిగిన కుటుంబమంతా కలిసి దీపాల వరుసను పేర్చి దీప జ్యోతిని ఆరాధిస్తే ఇల్లంతా నిజ కాంతితో వెలిగిపోతుంది. దీపారాధన భారతీయులకు నిత్య సమారాధన. ప్రతిరోజూ ఉదయం, సాయంత్రం దేవుడి ముందు దీపాలను వెలిగించి అంతా మంచే జరుగాలని కోరుకుంటాం. ఏదైనా మంచి పనిని మొదలు పెట్టేముందు జ్యోతి ప్రజ్వలనం చేసి నిరాటంకంగా అనుకున్న పని విజయవంతం కావాలని ఆకాంక్షిస్తాం. అలాగే దీపావళి రోజు ప్రపంచంలోని చెడంతా నశించి మంచితో నిండిపోవాలని వెలిగించే దీపాలు జీవిత వెలుగులకు సంకేతాలుగా భావించాలి. ఆ దీపాల వెలుగులను ప్రతీ ఒక్కరూ తమ జీవితాలను ఆపాదించుకునే వెలుగులను నింపుకోవాలి. అప్పుడే దీపావళి పండుగకు అసలైన నిర్వచనం.

‘తమసోమా జ్యోతిర్గమయ’ అంటుంది వేదం... చీకటి నుంచి వెలుగులోకి నన్ను నడిపించు అని దీని అర్థం... చీకటిని తిట్టుకుంటూ కూర్చోకు. చిన్న దివ్వెను వెలిగించిచూడు అనే అమృత ప్రబోధమే దీపావళి ఆంతర్యం. చీకటిని దుఃఖానికి, వెలుగును సంతోషానికి ప్రతీకలుగా భావిస్తారు. ప్రతి ఒక్కరి జీవితంలోనూ ఇవి రెండూ తప్పవు. దుఃఖాన్ని జయించి, ఆనందాన్ని సాధించాలన్న మనిషి యత్నానికి దీపావళి ఓ సంకేతం. సత్యం నుంచి సత్యంలోకి, చీకటి నుంచి వెలుగులోకి, మృత్యువులోంచి అమర్వతంలోకి నడిపించమనే వేదవాక్కు దీపావళి పండుగలో ఒప్పారే దివ్య సందేశంగా విరాజిల్లుతూ మన జీవితాలను వెలుగులమయం చేయాలని ఆకాంక్షిద్దాం. దీపావళి పర్వదినం సందర్భంగా 10టీవీ సోషల్ మీడియా వీక్షకులకు దీపావళి శుభాకాంక్షలు..

 

 

 

 

 

లక్నో: ఉత్తర ప్రదేశ్ ముఖ్యమంత్రి యోగి ఆదిత్యనాధ్ తన పదవి కాలంలో రికార్డులు సృష్టించేటట్టు ఉన్నారు. నిన్నటికి నిన్న లక్నోలోని ఏకన ఇంటర్నేషనల్ క్రికెట్ స్టేడియం పేరును భారతరత్న అటల్ బిహారీ వాజ్ పేయి ఏకన ఇంటర్నేషనల్ క్రికెట్ స్టేడియంగా మార్చిన యోగి, మంగళవారం ఫైజాబాద్ జిల్లా పేరును అయోధ్య జిల్లాగా పేరు మారుస్తూ నిర్ణయం తీసుకున్నారు. అయోధ్యలో  దీపావళి పండుగ సందర్భంగా ఏర్పాటు చేసిన కార్యక్రమంలో యోగి ఈప్రకటన చేశారు. అయోధ్య మనకు గర్వకారణమని, అయోధ్య అంటేనే రాముడని యోగి అన్నారు. ఈరోజు నుంచి ఫైజాబాద్‌ జిల్లా అయోధ్యగా పేరు మారుస్తున్నట్లు ఆయన సభాముఖంగా ప్రకటించారు. ఫైజాబాద్ జిల్లా పేరు మార్పుతో పాటు అయోధ్యలో నిర్మించే విమానాశ్రయానికి రాముడి పేరు, వైద్య కళాశాలకు రాముడి తండ్రి దశరధుని పేరు పెడతామని యోగి ఆదిత్యనాథ్  తెలిపారు. గతంలో యూపీ ప్రభుత్వం మొఘల్‌సరై రైల్వే జంక్షన్‌ పేరును దీన్‌ దయాళ్‌ ఉపాధ్యాయ్‌ జంక్షన్‌గాను, అలహాబాద్ ను ప్రయాగరాజ్ గాను మార్చిన విషయం తెలిసిందే. మరోవైపు బరేలి, ఆగ్రా విమనాశ్రాయాల పేర్లను కూడా మార్చే యోచనలో యోగి  సర్కార్‌  ఉన్నట్లు తెలుస్తోంది.

లక్నో: సంచలన నిర్ణయాలు తీసుకునే  ఉత్తరప్రదేశ్ ముఖ్యమంత్రి యోగి ఆదిత్యనాధ్ ఇంకో సంచలన నిర్ణయం తీసుకున్నారు. ఇటీవలే అలహాబాద్ పేరును ప్రయాగ్ రాజ్ గా మారుస్తూ  తీసుకున్న నిర్ణయం మరువకముందే  లక్నోలోని ఏకన ఇంటర్నేషనల్ స్టేడియాన్ని  "భారతరత్న అటల్ బిహారీ వాజ్‌పేయి ఏకన క్రికెట్ స్టేడియం"గా పేరు మార్చి మంగళవారం ప్రారంభించారు. స్వర్గీయ వాజ్ పేయ్ గౌరవార్ధం పేరు మార్చినట్లు ఆయన చెప్పారు. తన సొంత వూరు గోరఖ్ పూర్ లో  ఉర్దూబజార్‌ను హిందీబజార్ గానూ, హుమాయూన్‌పూర్‌ను హనుమాన్‌నగర్, ఇస్లాంపూర్‌ను ఈశ్వరపూర్‌గా, మియాబజార్‌ను మాయాబజార్, అలీనగర్‌ను ఆర్యనగర్‌గా కూడా మార్చేశారు. ఇవాళ లక్నో లోని ఇంటర్నేషనల్ స్టేడియం కూడా పేరు మార్చి ప్రారంభోత్సవం చేశారు. 
50వేల మంది కూర్చునే కెపాసిటీ ఉన్నలక్నో ఇంటర్నేషనల్ క్రికెట్ స్డేడియంలో ఈరోజు భారత్, వెస్ట్ ఇండీస్ మధ్య రెండో టీ20 మ్యాచ్ జరగనుంది. అయితే మ్యాచ్‌కు ఒక్క రోజు ముందు స్టేడియం పేరు మార్చడాన్ని సమాజ్‌వాదీ పార్టీ తీవ్రంగా వ్యతిరేకించింది. అయితే స్టేడియం పేరు మార్పును ముఖ్యమంత్రి ఆదిత్యనాధ్ సమర్ధించుకుంటున్నారు. 1991 నుంచి 2009 మధ్య కాలంలో 5 సార్లు వరుసగా లక్నో ఎంపీగా సేవలు అందించినందుకే వాజ్‌పేయి సంస్మరణార్ధం ఈ స్టేడియానికి పేరు పెట్టడం జరిగిందని  తెలిపారు. వాజ్‌పేయి  ప్రభుత్వ హయాంలో క్రీడలను ఎంతగానో ప్రోత్సాహం అందించారని, ఆయన స్ఫూర్తితో దేశంలో ఉన్న అన్ని గ్రామాల్లో భారీ ఎత్తున విశాలమైన క్రీడా మైదానాలను నిర్మిస్తామని యోగి చెప్పారు. ఘజియాబాద్‌లో నిర్మింతమవుతున్న భారీ స్టేడియాన్ని త్వరలోనే ప్రారంభిస్తామని యోగి తెలిపారు. 

 

పాట్నా: కలవని మనసులతో కాపురం చేయలేమనుకున్న బీహార్ మాజీ సీఎం లాలూప్రసాద్ యాదవ్ పెద్ద కుమారుడు తేజ్ ప్రతాప్ యాదవ్ గత శుక్రవారం విడాకులకు అప్లయ్ చేసిన సంగతి తెలిసిందే. దాంతో రెండు కుటుంబాల నుంచి నష్ట నివారణ చర్యలు మొదలయ్యాయి. భార్యకు విడాకులు ఇచ్చే విషయంలో ఆలోచన విరమించుకోవాలని కుటుంబ సభ్యుల నుంచి ఒత్తిడి తీవ్రమవటంతో తేజ్ ప్రతాప్ అజ్ఞాతంలోకి వెళ్లి పోయారు.
ఐశ్వర్య తాను ఉత్తర,దక్షిణ ధృవాలమని, ఇద్దరి ఇష్టాయిష్టాలు, వ్యవహారాలు పూర్తిగా విరుధ్దమని, పెళ్లి తర్వాత జీవితం చాలా కష్టంగా గడుస్తోందని విడాకుల దరఖాస్తులో తేజ్ ప్రతాప్ చెప్పుకొచ్చారు. ఢిల్లీలోని లేడీ శ్రీరాం కాలేజి నుంచి ఐశ్వర్య పీజీ చేయగా తేజ్ ప్రతాప్ స్కూల్ లెవల్లోనే  చదువు ఆపేశారు. బీహార్ మాజీ సీఎం దరోగా రాయ్ మనవరాలైన ఐశ్వర్యతో తేజ్ ప్రతాప్ కు మే 12 న వివాహాం జరిగింది. కేవలం రాజకీయ లబ్ది చేకూరుతుందనే ఈపెళ్లి చేశారని, తనుకు ఈపెళ్లి ఇష్టం లేదని చెప్పినా ఎవరూ వినలేదని విడాకులకు అప్లయ్ చేసిన తర్వాత తేజ్ ప్రతాప్ వాపోయారు. 
కుటుంబ సభ్యుల నుంచి ఒత్తిడి ఎక్కువవటంతో గత రెండురోజులుగా బోధ్ గయలోని హోటల్లో బస చేసిన తేజ్ ప్రతాప్ వ్యక్తిగత సెక్యూరిటీ కళ్లు గప్పి సోమవారం మధ్యాహ్నం హోటల్ రూంలోని వెనుక డోర్ నుంచి  ఎవరికీ చెప్పకుండా వెళ్లిపోయారు. శ్రీకృష్ణుడి భక్తుడైన తేజ్ ప్రతాప్ బృందావనం వెళ్ళి ఉంటారని భావిస్తున్నారు. విడాకుల పిటీషన్ వేయటానికి ముందు కొన్ని రోజుల క్రితం తేజ్ ప్రతాప్ మధుర,బృందావనం సందర్సించి వచ్చారు. కాగా తేజ్ ప్రతాప్ విషయంపై లాలూ కుటుంబ సభ్యులు ఇంతవరకు స్పందించలేదు. 

కర్ణాటక : ఉప ఎన్నికల్లో బీజేపీకి కేవలం ట్రైలర్ మాత్రమే చూపించామని పూర్తి సినిమా వచ్చే స్వార్వత్రిక ఎన్నికల్లో చూపిస్తామని కుమారస్వామి సంచలన వ్యాఖ్యలు చేశారు. రాష్ట్రంలో జరిగిన  ఉపఎన్నికల్లో కాంగ్రెస్-జేడీఎస్ కూటమి ఘన విజయం సాధించడంపై ముఖ్యమంత్రి కుమారస్వామి ఆనందం వ్యక్తం చేశారు. ఇది కేవలం తొలి అడుగు మాత్రమేనని... 2019 సార్వత్రిక ఎన్నికల్లో బీజేపీకి చుక్కలు చూపిస్తామని చెప్పారు. రాష్ట్రంలో 28 లోక్ సభ స్థానాలు ఉన్నాయని... కాంగ్రెస్ పార్టీతో కలసి అన్ని స్థానాల్లో జయకేతనం ఎగురవేస్తామని ధీమా వ్యక్తం చేశారు. ఈరోజు గెలిచాం కాబట్టి తాను ఈ మాటలు అనడం లేదని... ఈ విషయం తమపై ప్రజలకు ఉన్న నమ్మకానికి ఇది నిదర్శనమన్నారు. 
ఇంతటి ఘన విజయానికి కారణమైన జేడీఎస్ నేతలను, కార్యకర్తలను కూడా అభినందిస్తున్నానని కుమారస్వామి సంతోషంతో తెలిపారు. జీడీఎస్-కాంగ్రెస్ లది అపవిత్ర కలయిక అని వ్యాఖ్యానించిన బీజేపీకి... ఈ ఫలితాలు చెంపపెట్టువంటివని చెప్పారు. తమ కూటమి ఎంతో కాలం బతకదని ఎద్దేవా చేసిన బీజేపీ నేతలు... ఈ ఫలితాల తర్వాత ఏం మాట్లాడతారని అన్నారు. రాష్ట్రాన్ని క్లీన్ స్వీప్ చేయడమే తమ కూటమి తదుపరి లక్ష్యమని కుమారస్వామి తెలిపారు. 
 

ఛత్తీస్‌గడ్: మావోయిస్టు పార్టీకి గట్టి ఎదురుదెబ్బ తగిలింది. నారాయణపూర్‌‌ జిల్లాలో పెద్ద సంఖ్యలో మావోయిస్టులు లొంగిపోయారు. ఏకంగా 51 మంది మావోయిస్టులు స్వచ్ఛందంగా పోలీసుల ఎదుట లొంగిపోయారు. వారంతా తమ ఆయుధాలను పోలీసులకు సరెండర్‌ చేశారు. పోలీసుల నిర్బంధం పెరుగుతుండటంతోనే మావోలు లొంగిపోయినట్టుగా తెలుస్తోంది. చత్తీస్‌గడ్, నారాయణపూర్, బీజాపూర్‌లలో అడుగడుగునా బ్లాస్టింగ్‌లు, ఎన్2కౌంటర్లు జరుగుతున్నాయి. ఈ నేపథ్యంలో అటు గిరిజన ప్రజలు, ఇటు మావోయిస్టులు ఆందోళన చెందుతున్నారు. కేంద్ర, రాష్ట్ర, ప్రత్యేక బలగాలు అడవిని జల్లెడ పడుతున్నాయి. ఇక నిన్నటి ఎన్‌కౌంటర్‌లో ఐదుగురు మావోలు మృతి చెందారు. మరోవైపు మావోయిస్టులు జన జీవన స్రవంతి కలిసిపోవాలని ఎస్పీ కోరారు. హింస ద్వారా ఏమీ సాధించలేరని ఆయన చెబుతూ వచ్చారు. దాదాపుగా 10 రోజుల నుంచి ఆయన చేస్తున్న ప్రయత్నాలు ఫలించాయి. మావోయిస్టులు లొంగిపోయేందుకు ముందుకు వచ్చారు. ప్రభుత్వ పథకాలు మీకు అందేలా సహకారం అందిస్తానని ఎస్పీ వారికి హామీ ఇచ్చారు. కాగా మరో 50మంది దాకా మావోయిస్టులు, మిలీషియా సభ్యులు సైతం లొంగిపోయేందుక సిద్ధంగా ఉన్నట్టు తెలుస్తోంది.

కర్ణాటక : రాష్ట్రంలో మూడు లోక్ సభ, రెండు శాసనసభ స్థానాలకు జరిగిన ఉపఎన్నిలలో బీజేపీకి బేజారు పుట్టిస్తుంటే కాంగ్రెస్-జేడీఎస్ కూటమి సత్తా చాటుతోంది. ఇప్పటికే  రెండు శాసనసభ స్థానాలను కూటమి తన ఖాతాలో వేసుకుంది మహాకూటమి.  ఈ నేపథ్యంలో  ముఖ్యమంత్రి కుమారస్వామి భార్య, జేడీఎస్ అభ్యర్థి అనితా కుమారస్వామి రామనగరం నియోకవర్గం నుంచి ఏకంగా 1,09,137 ఓట్ల ఆధిక్యంతో ఘన విజయం సాధించారు. జామ్ ఖండీ అసెంబ్లీ స్థానం నుంచి కాంగ్రెస్ అభ్యర్థి న్యామగౌడ 39,480 ఓట్ల మెజార్టీతో జయకేతనం ఎగురవేశారు. బళ్లారి, శివమొగ్గ, మండ్య లోక్ సభ స్థానాలకు సంబంధించి ఓట్లు లెక్కింపు కొనసాగుతోంది. బళ్లారిలో కాంగ్రెస్ అభ్యర్థి ఉగ్రప్ప, మండ్యలో జేడీఎస్ అభ్యర్థి శివరామేగౌడలు పూర్తి ఆధిక్యతలో ఉన్నారు. శివమొగ్గలో బీజేపీ అభ్యర్థి రాఘవేంద్ర స్వల్ప మెజార్టీలో ఉన్నారు.
 

ఢిల్లీ : ఆర్బీఐ మాజీ గవర్నర్ సంచలన వ్యాఖ్యలు చేశారు. ఆర్బీఐ నిర్వహణలో ప్రభుత్వ జోక్యం ఉండరాదని మాజీ గవర్నర్ రఘురాం రాజన్ వ్యాఖ్యానించారు. ఇతర ప్రయోజనాల కోసం ఆర్బీఐని వాడుకోవడం మంచిది కాదని పరోక్షంగా కేంద్రప్రభుత్వానికి చురకలంటించారు. కాగా ప్రస్తుత ఆర్బీఐ గవర్నర్ గా విధులు నిర్వహిస్తున్న ఉర్జిత్ పటేల్ కు షోకాజ్ నోటీసులు జారీ చేసిన నేపథ్యంలో మాజీ గవర్నర్ ఈ వ్యాఖ్యలు చేయటం ప్రాధాన్యతను సంతరించుకుంది. భారత ఆర్థిక వ్యవస్థను కాపాడటమే ఆర్బీఐ లక్ష్యమని ఆ సంస్థ రఘురాం రాజన్ అన్నారు. సంస్థను పటిష్టంగా నిర్వహించడమే లక్ష్యంగా పని చేయాలని రఘురామ్ రాజన్ సూచించారు. 
దేశ ఆర్థిక వ్యవస్థకు ఆర్బీఐ సీట్ బెల్ట్ లాంటిదని చెప్పారు. ఆర్బీఐ ఎప్పుడూ రాహుల్ ద్రావిడ్ లా ఆచితూచి అడుగులు వేస్తూ ముందుకు వెళ్లాలని... సిద్ధూలా దూకుడుగా ఆడే ప్రయత్నం చేయకూడదని అన్నారు. తన వద్ద ఉన్న నిధులను సమర్థవంతంగా వినియోగించడమే కాకుండా... ప్రభుత్వ ధనం దుర్వినియోగం కాకుండా కాపాడాల్సిన బాధ్యత కూడా ఆర్బీఐపై ఉందని రాజన్ విలువైన సూచనలు చేశారు. ఆర్బీఐ బోర్డులో వివిధ రంగాల నుంచి వచ్చిన మేధావులు ఉంటారని... ప్రతి విషయాన్ని కూలంకషంగా చర్చించిన తర్వాతే నిర్ణయాలు తీసుకుంటారని రఘురామ్ రాజన్ తెలిపారు. 
 

బెంగళూరు: కర్ణాటక ఉపఎన్నికల్లో కాంగ్రెస్‌-జేడీయూ కూటమి సత్తా చాటింది. ఇప్పటివరకూ వెలువడిన ఫలితాల్లో కాంగ్రెస్‌-జేడీఎస్‌ కూటమి మూడు చోట్ల విజయం సాధించింది. మరో స్థానంలో ఆధిక్యంలో ఉంది. కాగా.. ప్రతిపక్ష బీజేపీ కేవలం ఒకే ఒక్క చోట ముందంజలో ఉంది. కర్ణాటకలోని మూడు లోక్‌సభ స్థానాలకు(బళ్లారి, శివమొగ్గ, మాండ్య), రెండు అసెంబ్లీ నియోజకవర్గాలకు(రామనగర, జమఖండి) గత శనివారం ఉపఎన్నికలు నిర్వహించారు. ఇవాళ కౌంటింగ్ చేపట్టారు. 

మాండ్య లోక్‌సభ నియోజకవర్గంలో జేడీఎస్‌ అభ్యర్థి శివరామగౌడ సమీప బీజేపీ అభ్యర్థి సిద్ధరామయ్యపై భారీ ఆధిక్యంతో విజయం సాధించారు. ఇక రామనగర అసెంబ్లీ నియోజకవర్గం నుంచి జేడీఎస్‌ అభ్యర్థి, ముఖ్యమంత్రి కుమారస్వామి సతీమణి అనిత కుమారస్వామి గెలుపొందారు. మరో అసెంబ్లీ నియోజకవర్గం జమఖండిలో కాంగ్రెస్‌ అభ్యర్థి, మాజీ ఎమ్మెల్యే సిద్ధు న్యామగౌడ కుమారుడు ఆనంద్‌ విజయం సాధించారు.

ఇక బళ్లారి లోక్‌సభ నియోజకవర్గంలో బీజేపీ అభ్యర్థి, మాజీ ఎంపీ శ్రీరాములు సోదరి శాంతపై కాంగ్రెస్‌ అభ్యర్థి ఉగ్రప్ప భారీ ఆధిక్యంలో ఉండగా.. మరో లోక్‌సభ నియోజకవర్గం శివమొగ్గలో కాంగ్రెస్‌-బీజేపీ మధ్య హోరాహోరీ పోటీ నెలకొంది. శివమొగ్గలో బీజేపీ అభ్యర్థి, మాజీ ముఖ్యమంత్రి యడ్యూరప్ప తనయుడు రాఘవేంద్ర తన సమీప జేడీఎస్‌ అభ్యర్థి మధు బంగారప్పపై స్వల్ప లీడ్‌లో ఉన్నారు.

ఢి్ల్లీ : దేశవ్యాప్తంగా దీపావళి సందడి మొదలైపోయింది. ఇళ్లన్నీ దీపాల వెలుగుల్లో కళకళలాడుతున్నాయి. దీపావళి అందరి ఇళ్లలోను వెలుగులను పంచుతోందా? సంపన్నులకేనా దీపావళి. సామాన్యులకు కాదా? అవునే అనిపిస్తోంది నేటి ఆధునిక సమాజం. ఆధునికత మెరుపులకే కాగీ..మేలుకొలుపులకు కాదంటోంది. వెలుగు జిలుగులు దీపాల కొనుగోలులో మట్టి దీపాలు వెల వెలబోతున్నాయి. అవి తయారుచేసేవారి పాలిట శాపంగా మారుతున్నాయి. ఈ నేపథ్యంలో దీపావళి సందర్భంగా హెచ్‌పీ ఇండియా సంస్థ ఓ వీడియోను రూపొందించింది. దీపాలు వెలిగించే ప్రమిదలను ఖరీదైన షాపింగ్‌ మాల్స్‌, దుకాణాల్లో కాకుండా వీధుల్లో అమ్మే వారి వద్ద నుంచి కొనుగోలు చేయాలని ప్రజలకు చెప్పడం కోసం హెచ్‌పీ ఈ ప్రకటనను రూపొందించింది. ఈ వీడియోను ‘ఉమ్మీద్‌ కా దియా’ పేరిట హెచ్‌పీ ఇండియా తన అధికారిక ట్విటర్‌లో పోస్ట్‌ చేసింది.

‘మనం వేసే ఒక్క అడుగు ఎందరో జీవితాల్లో మార్పును తెస్తుంది. పండుగకు కావాల్సిన వస్తువులను వీధుల్లో అమ్మేవారి నుంచి కొనుగోలు చేయండి. వాటితో మన ఇంట్లో వెలిగించే దీపాలు వారి నివాసాల్లోనూ వెలుగునిస్తాయి.’ అని హెచ్‌పీ ఇండియా ట్వీట్‌లో పేర్కొంది. వీడియోలో ఓ బాలుడు తన తల్లితో కలిసి దీపావళి షాపింగ్‌ చేయడానికి ఓ మాల్‌కు వెళతాడు. అక్కడ ఖరీదైన వస్తువులు కొనుగోలు చేస్తారు. మాల్‌ నుంచి బయటికి వస్తుండగా ఆ బాలుడికి రోడ్డు పక్కన ప్రమిదలను అమ్ముతున్న ఓ మహిళ కనబడుతుంది. ఆమె ఫొటో తీస్తాడు. ‘అమ్మా ఇవి కొనుక్కుందాం..’ అని తన తల్లిని అడుగుతాడు. కానీ అందుకు ఆమె ఒప్పుకోదు. పైగా ఆ మహిళను చులకనగా చూస్తుంది. అప్పుడు ఆ మహిళకు బాలుడు ఏ విధంగా సాయం చేశాడు? అన్న విషయమే ఇప్పుడు ఎందరినో మేలుకొలిపింది. సంప్రదాయమే కాదు సహాయానికి ముందడుగు వేయించింది. 
రెండు రోజుల్లో ఈ వీడియోను 20 లక్షల మందికిపైగా వీక్షించారు. ‘ఈ వీడియో నిజంగానే కన్నీరుపెట్టించింది’ అంటూ నెటిజన్లు కామెంట్లు పెడుతున్నారు. నెటిజన్ల హృదయాల్ని ద్రవింపజేసిన ఆ వీడియోను మీరూ చూడండి..!
 

Pages

Don't Miss