National News

భూపాల్ : మధ్యప్రదేశ్ అసెంబ్లీ ఎన్నికల ఫలితాలు హోరా హోరిగా సాగుతున్నాయి. కాంగ్రెస్, బీజేపీ నువ్వానేనా రీతిలో కొనసాగుతున్నాయి. కాంగ్రెస్ 111 స్థానాల్లో, బీజేపీ 108 స్థానాల్లో, బీఎస్ పీ 5 స్థానాల్లో ఆధిక్యంలో ఉన్నాయి. ఇతరులు 12 స్థానాల్లో ఆధిక్యంలో కొనసాగుతున్నారు. సర్వత్రా ఉత్కంఠ నెలకొంది. మొత్తం 230 అసెంబ్లీ స్థానాలకు కౌంటింగ్ జరుగోంది. 

 

 

జైపూర్ : రాజస్థాన్ అసెంబ్లీ ఎన్నికల ఫలితాల్లో కాంగ్రెస్ ముందజలో ఉంది. హస్తం పార్టీ ఆధిక్యంలో కొనసాగుతోంది.  9 స్థానాల్లో కాంగ్రెస్ విజయం సాధించింది. 3 స్థానాల్లో బీజేపీ గెలుపొందింది. ఇతరులు 1 స్థానంలో విజయం సాధించించారు. కాంగ్రెస్ 92 స్థానాల్లో, బీజేపీ 69 స్థానాల్లో ఆధిక్యంలో ఉన్నాయి. ఇతరులు 25 స్థానాల్లో ఆధిక్యంలో కొనసాగుతున్నారు. మొత్తం 199 అసెంబ్లీ స్థానాలకు కౌంటింగ్ జరుగుతోంది. ఎన్నికల ఫలితాల విడుదల నేపథ్యంలో సర్వత్రా ఉత్కంఠ నెలకొంది.

 

హైదరాబాద్ : ఐదు రాష్ట్రాల ఎన్నికల కౌంటింగ్ ప్రారంభమైంది. డిసెంబర్ 11న ఉదయం 8గంటలకు ఆయా రాష్ట్రాల్లో ఏర్పాటు చేసిన కౌంటింగ్ కేంద్రాల్లో భారీ భద్రత నడుమ ఓట్ల లెక్కింపు చేపట్టారు. తొలుత పోస్టల్ బ్యాలెట్ ఓట్లను లెక్కిస్తున్నారు. తెలంగాణలో 43 కేంద్రాల్లో ఓట్ల లెక్కింపు చేపట్టారు. 
తెలంగాణ (119 నియోజకవర్గాలు మేజిక్ ఫిగర్ 60) : టీఆర్ఎస్ 86, టీడీపీ 02, కాంగ్రెస్ 20 బీజేపీ 02, ఎంఐఎం 06, ఇతరులు 03 స్థానాల్లో అధిక్యంలో కొనసాగుతున్నరు. 
రాజస్థాన్ (199 నియోజకవర్గాలు మేజిక్ ఫిగర్ 100) బీజేపీ 72, కాంగ్రెస్ 102, బీఎస్పీ 05, ఇతరులు 20 స్థానాల్లో అధిక్యంలో కొనసాగుతున్నారు.
మధ్యప్రదేశ్ (230 నియోజకవర్గాలు మేజిక్ ఫిగర్ 116) కాంగ్రెస్ 107, బీజేపీ 114, బీఎస్పీ 05, ఇతరులు 06 స్థానాల్లో అధిక్యంలో కొనసాగుతున్నారు. 
ఛత్తీస్ గడ్ (90 నియోజకవర్గాలు మేజిక్ ఫిగర్ 40) బీజేపీ 15, కాంగ్రెస్ 67, జేసీపీ 7, ఇతరులు 1 స్థానాల్లో అధిక్యంలో కొనసాగుతున్నారు. 
మిజోరాం (40 నియోజకవర్గాలు మేజిక్ ఫిగర్ 21) బీజేపీ 01, కాంగ్రెస్ 06, ఎంఎన్ఎఫ్ 25, ఇతరులు 08 అధిక్యంలో కొనసాగుతున్నారు. 

మధ్యప్రదేశ్ : రాష్ట్రంలో జరిగిన అసెంబ్లీ ఎన్నికల ఫలితాలు కాసేపట్లో వెల్లడి కానున్నాయి. ఉదయం 8గంటలకు కౌంటింగ్ మొదలు కానుందని..మొత్తం 22 రౌండ్లలో కౌంటింగ్ కొనసాగుతుందని సీఈఓ వెల్లడించారు. 15000 మంది అధికారులు ఎన్నికల విధులు నిర్వర్తించనున్నారని...ఉదయం 11గంటలకల్లా తొలి ట్రెండ్ వచ్చే అవకాశం ఉందన్నారు. సాయంత్రం 5గంటలకల్లా మొత్తం ఫలితాలు వెల్లడించేందుకు అవకాశాలున్నాయన్నారు. 14 టేబుళ్ల ఏర్పాటు చేసి...ఈవీఎంలో నిక్షిప్తమైన ఓట్లు..వీవీ ప్యాట్‌‌లో ఉన్న చీటీలను లెక్కిస్తామన్నారు. 
నవంబర్ 28న పోలింగ్...
నవంబర్ 28న జరిగిన 230 అసెంబ్లీ స్థానాలకు జరిగిన ఎన్నికల్లో 75 శాతం ఓటింగ్ నమోదైంది. 2,907 మంది అభ్యర్థులు బరిలో ఉన్నారు. ఇక్కడ బీజేపీ అధికారంలో ఉన్న సంగతి తెలిసిందే. మరోసారి అధికారంలోకి రావడానికి సర్వశక్తులు ఒడ్డుతోంది. విజయంపై కాంగ్రెస్ కూడా ధీమా వ్యక్తం చేస్తోంది. బీజేపీ విజయం సాధిస్తే సీఎంగా శివరాజ్ సింగ్ పగ్గాలు చేపడుతారా ? అనేది తెలియాల్సి ఉంది. కాంగ్రెస్ గెలిస్తే ఆ పార్టీలో ఎవరు ముఖ్యమంత్రి కానున్నారో కాసేపట్ల తేలనుంది. 

దేశవ్యాప్తంగా ఐదు రాష్ట్రాల అసెంబ్లీ ఎన్నికల ఫలితాలు ఉత్కంఠ రేపుతున్నాయి. మధ్యప్రదేశ్, మిజోరం, రాజస్థాన్, ఛత్తీస్‌గఢ్, తెలంగాణ అసెంబ్లీ ఎన్నికల ఫలితాలను అంతా ఆసక్తిగా గమనిస్తున్నారు. త్వరలో జరగబోయే సార్వత్రిక ఎన్నికలకు సెమీఫైనల్స్‌గా భావిస్తున్నారు. దీంతో రిజల్ట్స్‌పై తీవ్ర ఉత్కంఠ నెలకొంది. సాధారణంగా ఎన్నికల ఫలితాలు అంటే విజయోత్సవ ర్యాలీలు, సంబరాలు కామన్. గెలిచిన వారు స్వీట్లు పంచుకుని, రంగులు చల్లుకుని, బాణ సంచా కాల్చి, విజయోత్సవ ర్యాలీలు నిర్వహిస్తారు. అయితే ఈసారి మాత్రం నిరాశ తప్పదు. విజయోత్సవ ర్యాలీలకు ఈసీ బ్రేక్ వేసింది. ఎన్నికల ఫలితాలు వెలువడనున్న వేళ ఎన్నికల సంఘం పలు ఆంక్షలు విధించింది. విజయోత్సవ ర్యాలీలపై ఈసీ నిషేధం విధించింది. ఎటువంటి విజయోత్సవ ర్యాలీలు నిర్వహించకూడదని ఆదేశాలు ఇచ్చింది. బాణసంచా కాల్చకూడదని చెప్పింది. అయతే డిసెంబర్ 12 నుంచి విజయోత్సవ ర్యాలీలకు అనుమతి ఇచ్చింది.

దేశవ్యాప్తంగా అంతా ఉత్కంఠగా ఎదురుచూస్తున్న 5 రాష్ట్రాల అసెంబ్లీ ఎన్నికల ఓట్ల లెక్కింపు ప్రారంభమైంది. భారీ బందోబస్తు మధ్య లెక్కింపు జరుగుతోంది.  ఉదయం 8 గంటలకు లెక్కింపు ప్రారంభం కాగా, గంటలోనే పోలింగ్ సరళి తెలిసిపోనుంది. తెలంగాణతోపాటు మొత్తం 5 రాష్ట్రాల ఓట్ల లెక్కింపునకు ఎన్నికల సంఘం కట్టుదిట్టమైన ఏర్పాట్లు చేసింది. మధ్యప్రదేశ్‌లో 230, రాజస్థాన్‌లో 200, తెలంగాణలో 119, చత్తీస్‌గఢ్‌లో 90, మిజోరంలో 40 అసెంబ్లీ స్థానాలున్నాయి. రాజస్థాన్‌లో అభ్యర్థి మరణించడంతో 199 స్థానాలకు మాత్రమే ఎన్నికలు జరిగాయి.
తెలంగాణ వ్యాప్తంగా మొత్తం 43 కౌంటింగ్ కేంద్రాలు ఏర్పాటు చేశారు. కౌంటింగ్‌లో 40వేల మంది సిబ్బంది ఉన్నారు. మొదట పోస్టల్ బ్యాలెట్‌ను లెక్కించనున్నారు. 9 గంటలకల్లా పోలింగ్ సరళి ఏంటనేది తెలిసిపోనుంది. ఇక, శేరిలింగంపల్లిలో గరిష్టంగా 42 రౌండ్లు లెక్కించనుండగా, అతి తక్కువగా భద్రాచలం, అశ్వారావుపేటలలో 12 రౌండ్లలో లెక్కింపు జరగనుంది. కౌంటింగ్ కేంద్రాల వద్ద కేంద్ర, రాష్ట్ర బలగాలతో పటిష్ట భద్రత ఏర్పాటు చేసింది. అలాగే, సీసీటీవీ కెమెరాలను కూడా ఏర్పాటు చేసింది. కౌంటింగ్ కేంద్రాల వద్ద 144 సెక్షన్‌ను విధించారు. కౌంటింగ్ కేంద్రాల్లో సెల్‌ఫోన్లను నిషేధించిన ఈసీ, విజయోత్సవాలకు కూడా అనుమతి నిరాకరించింది.
మధ్యప్రదేశ్‌, మిజోరంలలో నవంబర్ 28న, రాజస్థాన్‌, తెలంగాణలో డిసెంబర్ 7న పోలింగ్ జరిగింది. ఛత్తీస్‌గడ్‌లో నవంబర్ 12, 20 తేదీల్లో రెండు విడతలుగా పోలింగ్ జరిగింది.

* మధ్యప్రదేశ్‌లో మొత్తం స్థానాలు 230, మేజిక్ ఫిగర్ 116
* రాజస్థాన్‌లో మొత్తం స్థానాలు 199, మేజిక్ ఫిగర్ 101
* ఛత్తీస్‌గఢ్‌లో మొత్తం స్థానాలు 90, మేజిక్ ఫిగర్ 46
* మిజోరంలో మొత్తం స్థానాలు 40, మేజిక్ ఫిగర్ 21
* తెలంగాణలో మొత్తం స్థానాలు 119, మేజిక్ ఫిగర్ 60

హైదరాబాద్ : కొద్ది గంటల్లో ఫలితం వెల్లడి కానుంది. ఐదు రాష్ట్రాల్లో జరిగిన ఎన్నికల ఫలితాలు డిసెంబర్ 11న వెల్లడి కానున్నాయి. ఇందుకు ఎన్నికల అధికారులు అన్నీ ఏర్పాట్లు చేశారు. తెలంగాణ, ఛత్తీస్ గడ్, మిజోరాం, మధ్యప్రదేశ్, రాజస్థాన్ రాష్ట్రాల్లో ఇటీవలే ఎన్నికలు జరిగిన సంగతి తెలిసిందే. వచ్చే లోక్ సభ ఎన్నికలకు సెమీఫైనల్స్‌గా భావిస్తున్న ఈ ఎన్నికల ఫలితాలు 8,500 మంది  అభ్యర్థుల భవతవ్యం నేడు తేలనుంది. తొలుత పోస్టల్ బ్యాలెట్ లెక్కింపు చేపట్టనున్నారు. అనంతరం ఈవీఎంలు తెరిచి ఓట్లను లెక్కిస్తారు. 

  • మధ్యప్రదేశ్‌లో 230 స్థానాలకు నవంబర్ 28న పోలింగ్ జరిగింది. 2వేల మంది అభ్యర్థులు బరిలో నిలిచారు. బీజేపీ 230 స్థానాలు..బీఎస్పీ 227 స్థానాలు..కాంగ్రెస్ 229 స్థానాలు..లోక్‌తాంత్రిక్ జనతాదళ్ 1 స్థానం..ఎస్పీ 52 స్థానాలు..ఆప్ 208 స్థానాలు..మొత్తం 1094 స్వతంత్ర అభ్యర్థులు..రంగంలో ఉన్నారు. 
  • మిజోరాంలో 40 స్థానాలకు నవంబర్ 28న ఎన్నికలు జరిగాయి. కాంగ్రెస్..మిజోనేషనల్ ఫ్రంట్ తలపడ్డాయి. ఇక్కడ సుమారు 80 శాతం పోలింగ్ నమోదైంది. 
  • రాజస్థాన్‌లో 199 స్థానాలకు డిసెంబర్ 7న పోలింగ్ జరిగింది. 74 శాతం ఓటింగ్ నమోదు. 
  • ఛత్తీస్ గడ్‌లో 90 స్థానాలకు నవంబర్ 12, 20 తేదీల్లో రెండు విడతలుగా పోలింగ్ జరిగింది. 76.60 శాతం పోలింగ్ నమోదు. 
  • తెలంగాణ రాష్ట్రంలో 119 నియోజకవర్గాలకు డిసెంబర్ 7న పోలింగ్. 

ఢిల్లీ: ఆర్బీఐ గవర్నర్ పదవికి ఉర్జిత్ పటేల్ రాజీనామా చేయడం చర్చనీయాంశంగా మారింది. ఏడాది ముందే ఆయన ఎందుకు దిగిపోయారు? సార్వత్రిక ఎన్నికలకు సమయం సమీపిస్తున్న తరుణంలో ఉర్జిత్ పటేల్ ఇలాంటి నిర్ణయం ఎందుకు తీసుకున్నారు? అసలేం జరిగింది? ఆర్బీఐకి కేంద్రానికి ఎక్కడ చెడింది? రాజీనామా చేయడానికి కారణాలు ఏంటి? ప్రస్తుతం ఈ ప్రశ్నలు హాట్ టాపిక్‌గా మారాయి.
కేంద్ర ప్రభుత్వానికి, ఆర్బీఐకు మధ్య కొంత కాలంగా కోల్డ్ వార్ నడుస్తున్న సంగతి తెలిసిందే. దేశ ఆర్థిక వ్యవస్థకు సంబంధించిన కీలక విధాన నిర్ణయాలపై కేంద్ర ప్రభుత్వంతో ఢీ అంటే ఢీ అనే రీతిలో పటేల్ తలపడుతున్నారు. విధాన నిర్ణయాల విషయంలో కేంద్రంతో తీవ్రంగా విబేధిస్తున్నారు. తాను చెప్పినట్టు వినకుండా ఉర్జిత్‌ స్వతంత్రంగా వ్యవహరిస్తుండటం.. కేంద్రాన్ని తీవ్ర అసంతృప్తికి గురిచేస్తోంది. ముఖ్యంగా రిజర్వ్ బ్యాంకులో ఉన్న నగదు నిల్వల్లో కొంత భాగాన్ని తమకు ఇవ్వాలంటూ కేంద్రం ఒత్తిడి చేస్తోంది. ఈ ప్రతిపాదనను ఉర్జిత్ పటేల్‌తో పాటు మరికొందరు బోర్డు సభ్యులు తీవ్రంగా వ్యతిరేకిస్తున్నారు. ఈ క్రమంలోనే ఆయన రాజీనామా చేసినట్టు తెలుస్తోంది. వ్యక్తిగత కారణాలతోనే ఆర్బీఐ గవర్నర్ పదవికి రాజీనామా చేశానని పటేల్ చెబుతున్నా.. అసలు కారణం మాత్రం కేంద్రంతో ఉన్న విభేదాలే.
2016లో ఆర్బీఐ గవర్నర్‌గా ఉర్జిత్ పటేల్ బాధ్యతలను స్వీకరించారు. 2019 సెప్టెంబర్ వరకు ఆయన పదవీకాలం ఉంది. పటేల్‌ హయాంలోనే పెద్దనోట్ల రద్దు వంటి తీవ్రమైన నిర్ణయాలను మోడీ ప్రభుత్వం తీసుకుంది. ఆర్థికంగా దేశం ఒకింత క్లిష్ట సమయంలో ఉన్నప్పుడు పటేల్ రాజీనామా చేయడం రాజకీయంగా దుమారం రేపే అవకాశముంది. పటేల్ రాజీనామా కేంద్ర ప్రభుత్వాన్ని ఇబ్బందుల్లోకి నెట్టే ఛాన్స్ ఉందని, శీతాకాల పార్లమెంటు సమావేశాల్లో ఈ అంశాన్ని విపక్షాలు అస్త్రంగా మలచుకోవచ్చని విశ్లేషకులు అభిప్రాయపడుతున్నారు.

ముంబై: ఇండియాలోని బ్యాంకులకు 9వేల కోట్ల రూపాయలు ఎగ్గొట్టి లండన్ వెళ్లిపోయిన మాల్యాను అప్పగించాలంటూ భారత్ చేసిన పోరాటం ఫలించింది. డిసెంబర్ 10వ తేదీ భారత దౌత్యవేత్తల వాదనలు విన్న లండన్‌లోని వెస్ట్ మినిస్టర్ మెజిస్ట్రేట్ కోర్టు భారత్‌కు మాల్యాను అప్పగించాలని ఆదేశించింది. ఈ ఆదేశాలకు ముందు కోర్టులో ఆసక్తికరమైన వాదనలు జరిగాయి. భారత్‌లోని జైళ్లపై మాల్యా అసంతృప్తి వ్యక్తం చేయటంతోపాటు అక్కడ ఉండలేం అని స్పష్టం చేశారు. దీంతో ముంబైలోని ఆర్థర్ జైలులోని బ్యారక్‌లపై 10 నిమిషాల వీడియోను భారత అధికారులు కోర్టుకు సమర్పించారు.
ఆర్థర్ రోడ్ జైలు బ్యారక్ నెంబర్ 12 :
ముంబైలోనే అతిపెద్ద జైలు ఆర్థర్ రోడ్‌లో ఉంది. ఈ జైలు ఆవరణలో రెండు అంతస్తుల భవనం ఉంది. అందులో బ్యారక్ నెంబర్ 12 మాల్యా కోసం ప్రత్యేకంగా సిద్ధం చేశారు అధికారులు. సీసీ కెమెరాల నిఘాలో ఉంటుంది ఈ బ్యారక్. అనారోగ్యం వస్తే వెంటనే పరీక్షించటానికి దగ్గరలోనే క్లీనిక్ కూడా ఉందని అధికారులు కోర్టుకి వివరించారు. వెస్టర్న్ టాయ్‌లెట్ కూడా సిద్ధం చేసినట్లు తెలిపారు. ప్రకృతి సిద్ధంగా గాలి, వెలుతురు చక్కగా బ్యారక్‌లోకి వస్తాయని.. మాల్యాను ఎలాంటి ఇబ్బంది పెట్టకుండా చూసుకుంటాం అంటూ కోర్టుకి వివరించారు. భారత అధికారులు సమర్పించిన వీడియోలు, డాక్యుమెంట్లు పరిశీలించిన లండన్ కోర్టు.. మాల్యాను భారత్‌కు అప్పగించాలంటూ ఆదేశాలు జారీ చేసింది.

లండన్: భారత వ్యాపారవేత్త విజయ్ మాల్యాకు బ్రిటన్ కోర్టులో ఎదురుదెబ్బ తగిలింది. విజయ్ మాల్యాను భారత్‌కు అప్పగించాలని కోర్టు ఆదేశించింది. మాల్యాను భారత్‌కు అప్పగించాలన్న వాదనను కోర్టు సమర్థించింది. అదే సమయంలో తీర్పుపై 14 రోజుల్లో ఉన్నత న్యాయస్థానంలో అప్పీల్ చేసుకునే అవకాశం మాల్యాకు ఇచ్చింది. భారతీయ బ్యాంకులకు 9వేల కోట్ల రూపాయల రుణాలు ఎగ్గొట్టి మాల్యా బ్రిటన్‌కు పారిపోయారని ఆరోపణలు ఉన్నాయి. మాల్యాను తమకు అప్పగించాలని భారత ప్రభుత్వం యూకేను కోరింది. దీనిపై ఇరుపక్షాల వాదనలు విన్న లండన్‌లోని వెస్ట్‌మినిస్టర్ మెజిస్ట్రేట్ కోర్టు తుది తీర్పు ఇచ్చింది. తుది తీర్పు ప్రకటిస్తున్న సమయంలో మాల్యా నిజాలు దాచారని కోర్టు మండిపడింది. కేసు విచారణకు భారత్ నుంచి సీబీఐ, ఈడీ అధికారులు హాజరయ్యారు.
రూ.9వేల కోట్లు ఎగనామం:
కింగ్‌ఫిషర్‌ ఎయిర్‌లైన్స్‌ కోసం ఎస్‌బీఐ సహా వివిధ భారతీయ బ్యాంకులకు 9వేల కోట్ల రూపాయల మేర రుణాలు ఎగవేశారని, మనీ లాండరింగ్‌‌కు పాల్పడ్డారని మాల్యాపై ఆరోపణలు ఉన్నాయి. ఈ కేసు నుంచి తప్పించుకునేందుకు మాల్యా బ్రిటన్‌కు పారిపోయారు. గతేడాది ఏప్రిల్‌ నుంచి బెయిల్‌పై ఉన్న మాల్యాపై డిసెంబర్ నుంచి లండన్‌లోని వెస్ట్‌మినిస్టర్‌ మెజిస్ట్రేట్‌ కోర్టులో విచారణ జరిగింది.
నేను దొంగను కాను:
మాల్యా మాత్రం తనపై వచ్చిన ఆరోపణలను కొట్టిపారేస్తున్నారు. తాను ఎలాంటి నేరం చేయలేదని వాదిస్తున్నారు. నేను దొంగను కాను, ఎవరి డబ్బులు దొంగలించలేదు అని అంటున్నారు. బ్యాంకులకు మోసం చేయలేదన్న మాల్యా అప్పులు చెల్లించేందుకు సిద్ధంగా ఉన్నట్టు చెప్పారు. అంతేకాదు కింగ్ ఫిషర్ ఎయిర్ లైన్స్‌ను కాపాడుకోవటానికి తన సొంత డబ్బు 4వేల కోట్ల రూపాయల వినియోగించినట్టు తెలిపారు.

ఢిల్లీ: కేంద్ర ప్రభుత్వం, రిజర్వ్ బ్యాంక్ ఆఫ్ ఇండియా మధ్య యుద్ధం ముదిరింది. ఆర్బీఐ గవర్నర్‌ ఉర్జిత్ పటేల్ సంచలన నిర్ణయం తీసుకున్నారు. గవర్నర్ పదవికి ఆయన రాజీనామా చేసి షాక్ ఇచ్చారు. వ్యక్తిగత కారణాలతో తాను పదవికి రాజీనామా చేశానని పటేల్ చెప్పారు. ఆర్బీఐ గవర్నర్‌గా పని చేయడం గర్వంగా ఉందన్నారాయన. కొన్ని రోజులుగా కేంద్ర ప్రభుత్వంతో ఢీ అంటే ఢీ అంటున్న ఉర్జిత్ పటేల్ సడెన్‌గా రాజీనామా చేశారు. కొంతకాలంగా కేంద్రం, ఆర్బీఐ మధ్య వివాదం నడుస్తోంది. పలు అంశాల్లో కేంద్రం నిర్ణయాలతో ఉర్జిత్ పటేల్ తీవ్రంగా విభేదిస్తూ వస్తున్నారు. పెద్ద నోట్ల రద్దు, విజయ్ మాల్యా అంశం, బ్యాంకుల దివాళాకు సంబంధించి ఇరు వర్గాల మధ్య వివాదం నడుస్తోంది. రిజర్వ్ బ్యాంకు వద్ద ఉన్న నగదు నిల్వల్లో కొంత భాగం(దాదాపు 2లక్షల కోట్ల రూపాయలు) తమకు ఇవ్వాలని కేంద్ర ప్రభుత్వం ఒత్తిడి తీసుకొచ్చింది. అయితే ఈ ప్రతిపాదనను పటేల్‌తో పాటు కొందరు సీనియర్ ఆర్థికవేత్తలు వ్యతిరేకిస్తున్నారు. ఫండ్స్ ఇచ్చేది లేదని ఉర్జిత్ పటేల్ తేల్చి చెప్పారు. దీనిపై అనేకమార్లు ట్విట్టర్‌లో వివాదాస్పదమైన వ్యాఖ్యలు చేశారు. ఉర్జిత్ పటేల్ వ్యాఖ్యలను ప్రతిపక్షాలు సమర్థించాయి. కేంద్ర ప్రభుత్వం తీరుని ఆక్షేపించాయి.
నోట్ల రద్దు, జీఎస్టీలో కీలక పాత్ర:
కొన్ని నెలలుగా కేంద్రం-ఆర్బీఐ మధ్య కోల్డ్‌వార్ నడుస్తోంది. కేంద్ర ప్రభుత్వంతో ఉర్జిత్ పటేల్‌కు విభేదాలు ఉన్నాయి. నోట్ల రద్దు, జీఎస్టీ అమలులో ఉర్జిత పటేల్ కీలక పాత్ర పోషించారు. 2016 సెప్టెంబర్‌లో ఆర్బీఐ గవర్నర్‌గా ఉర్జిత్ పటేల్ బాధ్యతలు స్వీకరించారు. 2019 సెప్టెంబర్‌లో ఆయన పదవీకాలం ముగియనుంది. సార్వత్రిక ఎన్నికలకు సమయం సమీపిస్తున్న వేళ.. ఉర్జిత్ పటేల్ రాజీనామా చేయడం రాజకీయవర్గాల్లో చర్చనీయాంశంగా మారింది. ఇది బీజేపీకి ఇబ్బంది కలిగించే పరిణామం అని విశ్లేషకులు అంటున్నారు.

ఢిల్లీ : దిగితేనే గానీ లోతు ఎంతుటుంటో తెలీదని పెద్దల మాట. అదే అర్థమైనట్లుగా వుంది కేంద్ర మంత్రి పదవికి రాష్ట్రీయ లోక్ సమతా పార్టీ అధినేత ఉపేంద్ర కుష్వాహాకు. మానవ వనరుల శాఖామంత్రిగా వున్న ఉపేంద్ర కుష్వాహా తన మంత్రి పదవికి రాజీనామా చేసిన సంగతి తెలిసిందే. ఈ  క్రమంలో ప్రధాని మోదీకి ఓ లేఖను కూడా రాశారాయన. తీవ్ర విమర్శలు సందిస్తు కుష్వాహా రాసిని లేఖలో ప్రధాని నరేంద్రమోదీ నాయకత్వంలో తాను పూర్తిగా మోసపోయాననీ..రాజ్యాంగ బద్ధంగా నిర్వహించాల్సిన విధులను కూడా వ్యవస్థను మోదీ నాశనం చేస్తున్నారంటే తీవ్రంగా విమర్శించారు. 
ఈ సందర్భంగా మోదీకి ఆయన ఒక ఘాటు లేఖను రాశారు.  కేబినెట్ ను రబ్బర్ స్టాంప్ స్థాయికి దిగజారనీ..మంత్రులు సొంత నిర్ణయాలు తీసుకోకుండా కట్టడి చేస్తు..ప్రధాని మోదీ తన నిర్ణయాలను మాత్రమే అమలు చేసేలా చేశారనీ..త్రులు, ఉన్నతాధికారులను నిస్సహాయులుగా మోదీ మార్చేశారని ఉపేంద్ర తన లెటర్ లో పేర్కొన్నారు. 
అన్ని నిర్ణయాలను ప్రధాని, ప్రధాని కార్యాలయమే నిర్ణయిస్తుందనీ..ఈ నిర్ణయాలలో బీజేపీ అధ్యక్షుడు అమిత్ షా ప్రధానంగా వుంటారని..పేదలు, అణగారిన వర్గాల కోసం కాకుండా ప్రత్యర్థులను నిర్వీర్యం చేయడం కోసమే పని చేస్తున్నారని ప్రధానికి రాసిన లేఖలో కుష్వాహా తీవ్ర వ్యాఖ్యలు చేశారు. మరోవైపు, జాతీయ స్థాయిలో ఏర్పాటు కాబోతున్న మహాకూటమిలో ఆయన చేరే అవకాశం ఉంది. కాగా డిసెంబర్ 10 ఉదయం కాంగ్రెస్ అధినేత రాహుల్ గాంధీతో సమావేశమైన తర్వాత ఆయన తన రాజీనామా లేఖను ప్రధాని మోదీకి పంపించారు. అనంతరం ప్రధాని మోదీకి రాసిన లేఖలో పలు ఘాటు విమర్శలను కుష్వాహా సంధించారు. 
 

 

బ్యాంకులకు వేల కోట్ల రుణాల ఎగొట్టి విదేశాలకు పారిపోయారనే ఆరోపణలు ఎదుర్కొంటున్న వ్యాపార వేత్త, కింగ్ ఫిషర్ అధినేత విజయ్ మాల్యా కేసుపై తుది తీర్పు రానుంది. విజయ్ మాల్యాను భారత్‌కు అప్పగించే విషయమై బ్రిటన్ కోర్టు కీలక తీర్పు వెలువరించనుంది. ఇప్పటివరకు ఇరు పక్షాల వాదనలు విన్న కోర్టు... డిసెంబర్ 10న తుది తీర్పు ఇస్తారని భావిస్తున్నారు. విజయ్ మాల్యా కేసుకు సంబంధించి బ్రిటీష్ అధికారులకు మరింత సమాచారం ఇచ్చేందుకు సీబీఐ, ఈడీ అధికారులు ఇప్పటికే లండన్‌ చేరుకున్నారు. అవినీతి ఆరోపణల రావడంతో సీబీఐ స్పెషల్ డైరెక్టర్ రాకేశ్ అస్థానాను కేంద్రం సెలవుపై పంపింది. దీంతో ఆస్తానా స్థానంలో సాయి మనోహర్‌ లండన్ వెళ్లారు.
రూ.9వేల కోట్లు ఎగనామం:
కింగ్‌ఫిషర్‌ ఎయిర్‌లైన్స్‌ కోసం ఎస్‌బీఐ సహా వివిధ భారతీయ బ్యాంకులకు 9వేల కోట్ల రూపాయల మేర రుణాలు ఎగవేశారని, మనీ లాండరింగ్‌‌కు పాల్పడ్డారని మాల్యాపై ఆరోపణలు ఉన్నాయి. ఈ కేసు నుంచి తప్పించుకునేందుకు మాల్యా బ్రిటన్‌కు పారిపోయారు. గతేడాది ఏప్రిల్‌ నుంచి బెయిల్‌పై ఉన్న మాల్యాపై డిసెంబర్ నుంచి లండన్‌లోని వెస్ట్‌మినిస్టర్‌ మెజిస్ట్రేట్‌ కోర్టులో విచారణ జరుగుతోంది.
తీర్పుపై సర్వత్రా ఉత్కంఠ:
ఒకవేళ మాల్యాను భారత్‌కు అప్పగించాలని సోమవారం కోర్టు తీర్పు ప్రకటిస్తే 28 రోజుల్లోగా బ్రిటన్‌ విదేశాంగ మంత్రి దానిపై నిర్ణయం తీసుకోవాలి. మాల్యా కూడా ఆ తీర్పును 14 రోజుల్లోపు బ్రిటన్‌ హైకోర్టులో సవాల్‌ చేయొచ్చు. అప్పగింతకు వ్యతిరేకంగా తీర్పు వస్తే, భారత్‌ కూడా దీనిపై 14 రోజుల్లోగా అప్పీల్‌ చేయాల్సి ఉంటుంది. మరి మాల్యా భారత్‌కు వస్తాడా లేక మళ్లీ బ్రిటన్‌లోనే మకాం వేస్తాడా అన్నది ఆసక్తికరంగా మారింది. బ్రిటన్ కోర్టు తీర్పుపై బ్యాంకులతో పాటు... భారత అధికారులు, రాజకీయ నేతలు, దేశ ప్రజలు ఉత్కంఠగా ఎదురుచూస్తున్నారు.
మాల్యా కోసం జైలు సిద్ధం:
విజయ్ మాల్యా కోసం ముంబైలోని ఆర్థర్ రోడ్ జైల్లో సెల్‌ను అధికారులు సిద్ధం చేశారు. మాల్యా అప్పగింత కేసు విచారణలో ఒకవేళ బ్రిటన్ కోర్టు తీర్పు అనుకూలంగా ఇస్తే మాల్యాను ఉంచడానికి హై సెక్యూరిటీ సెల్‌ను సిద్ధంగా ఉంచారు. ముంబై దాడుల దోషి కసబ్‌ను కూడా ఇక్కడే ఉంచిన విషయం తెలిసిందే.
నేను దొంగను కాను:
మాల్యా మాత్రం తనపై వచ్చిన ఆరోపణలను కొట్టిపారేస్తున్నారు. తాను ఎలాంటి నేరం చేయలేదని వాదిస్తున్నారు. నేను దొంగను కాను, ఎవరి డబ్బులు దొంగలించలేదు అని అంటున్నారు. బ్యాంకులకు మోసం చేయలేదన్న మాల్యా అప్పులు చెల్లించేందుకు సిద్ధంగా ఉన్నట్టు చెప్పారు. అంతేకాదు కింగ్ ఫిషర్ ఎయిర్ లైన్స్‌ను కాపాడుకోవటానికి తన సొంత డబ్బు 4వేల కోట్ల రూపాయల వినియోగించినట్టు తెలిపారు. కోర్టు తీర్పు ఎలా ఎన్నా అంగీకరిస్తానని మాల్యా స్పష్టం చేశారు.

బీహార్ : సార్వత్రిక ఎన్నికలకు మరో నాలుగు నెలలే గడువు ఉండటంతో ఎన్డీఏలో భాగస్వామపక్షమైన రాష్ట్రీయ లోక్ శక్తి పార్టీ అధ్యక్షుడు బీజేపీకి షాక్ ఇచ్చాడు. ఎన్డీయే భాగస్వామిగా కొనసాగుతున్న రాష్ట్రీయ లోక్ శక్తి పార్టీ అధ్యక్షుడు ఉపేంద్ర కుశాహ్వా తన కేంద్ర మంత్రి పదవికి రాజీనామా చేశారు. బిహార్‌లో 2019 లోక్‌సభ ఎన్నికలకు సంబంధించిన సీట్ల పంపిణీ సక్రమంగా జరగడం లేదని ఆరోపిస్తూ ఆ పార్టీ చీఫ్, మానవ వనరులు శాఖామంత్రి పదవికి ఉపేంద్ర కుశాహ్వా కేంద్ర మంత్రి పదవికి రాజీనామా చేశారు.  రాజీనామా లేఖను ప్రధాని కార్యాలయానికి, లోక్ సభ స్పీకర్‌కూ పంపించారు. గత, సార్వత్రిక ఎన్నికల్లో ఎన్డీఏ మిత్రపక్షంగా మూడు చోట్ల పోటీచేసిన రాష్ట్రీయ లోక్‌శక్తి పార్టీ అన్ని స్థానాల్లోనూ విజయం సాదించింది. దీంతో వచ్చే సాధారణ ఎన్నికల్లో తమకు ఏడు స్థానాలు ఇవ్వాలని పట్టుబడుతోంది. అలా కాకపోతే ఎన్డీఏ నుంచి బయటకు వచ్చేస్తానంటూ అల్టిమేటం జారీ చేశారు. అయితే, బీజేపీ, జేడీయూలు మాత్రం రెండు సీట్లను మాత్రమే ఇస్తామని తేల్చిచెప్పాయి. దీంతో తీవ్ర అసంతృప్తి వ్యక్తం చేసిన కుశాహ్వా, కూటమిలో తమకు సరైన ప్రాతినిథ్యం దక్కడంలేదని ఆరోపించారు. 
దీంతో మంత్రి పదవికి రాజీనామా చేశారు. అంతేకాదు, సోమవారం సాయంత్రం పార్లమెంటు ప్రాంగణంలో జరిగే ఎన్డీఏ సమావేశానికి సైతం వెళ్లబోనని కుశ్వాహా ప్రకటించారు. మరోవైపు, కాంగ్రెస్, ఆర్జేడీ కూటమితో రాష్ట్రీయ లోక్‌శక్తి పార్టీ జట్టుకట్టనుందని విశ్వసనీయ వర్గాలు పేర్కొంటున్నాయి. బిహార్‌లో మొత్తం 40 లోక్‌సభ స్థానాలు ఉండగా గత ఎన్నికల్లో బీజేపీ తన మిత్ర పక్షాలతో కలిసి 31 చోట్ల విజయం సాధించింది. ఈసారి మాత్రం జేడీయూతో పొత్తు కారణంగా చెరి సగం పంచుకోవాలనే అవగాహనకు వచ్చింది. దీంతో ఉపేంద్ర కుశ్వాహా ఈ నిర్ణయం తీసుకున్నట్లుగా సమాచారం. 
 

ఉత్తరప్రదేశ్ : అద్భుతమైన..అపురూప కట్టడం తాజ్ మహల్. తాజ్ మహల్ నిర్మాణం గురించి గానీ..అలనాటి ఆర్కిట్రెక్చర్ గురించి గానీ ఎంత చెప్పుకున్నా తక్కువే. ఈ కట్టడాన్ని చూస్తే అదొక సమాధి అని ఎవరికి అనిపించదు. హుందా తనానికి..చరిత్రకు నిలువెత్తు నిదర్శనంగా కనింపించే ఈ తాజ్ మహల్ ను ఇకపై చూడాలంటే జేబులు ఖాళీ అవ్వాల్సిందే. అదేమిటి అనుకుంటున్నారా? అంతేమి? అపురూపాన్ని చూడాలంటే బారీ రుసుము చెల్లించుకోవాల్సిందేనట. 
దేశీయ టూరిస్టులకు ఇప్పటి వరకు ఎంట్రీ టికెట్ రూ. 50గా ఉంది. ఈరోజు నుంచి మనం రూ. 250 చెల్లించాలి. విదేశీ టూరిస్టుల టికెట్ ధర రూ. 1,300లకు పెరిగింది. అంటే అదనంగా రూ. 200 చెల్లించాలి. పెరిగిన ధరలు డిసెంబర్ 10 నుండే అమల్లోకి వచ్చాయి. 
ఇక సార్క్ దేశాల నుంచి వచ్చే టూరిస్టుల టికెట్ ధర రూ. 540 నుంచి రూ. 740కి పెరిగింది. ఆర్కియాలజికల్ సర్వే ఆఫ్ ఇండియా చీఫ్ ఆర్కియాలజిస్ట్ వసంత్ స్వర్ణాకర్ ఈ వివరాలను వెల్లడించారు. రూ. 50 టికెట్ తీసుకున్న వారిని తాజ్ మహల్ ప్రధాన ప్రాంతం వద్దకు అనుమతించమని... తాజ్ ను వెనుకవైపు ఉన్న యమునా నది ముందు నుంచి వీక్షించేందుకు మాత్రమే అనుమతిస్తామని చెప్పారు.
 

మహారాష్ట్ర : రైతన్నలకు కోపం వస్తే పీఎం అయినా ఒకటే సీఎం అయినా ఒక్కటే. ఎవరినీ ఖాతరు చేయరు. తమ కష్టాన్ని దోచేసుకుంటున్న  దళారులు అనే విషయం తెలిసినా ఏమీ చేయలేని నిస్సహాయత..దీనిపై చర్యలు తీసుకోవాల్సిన ప్రభుత్వాలు మిన్నకుండి పోతే శాంతస్వాభావి అయిన రైతన్నకు కోపం వస్తే ఏం చేస్తారో..వారి నిరసనను ఎలా వ్యక్తం చేస్తారో చేసి చూపించారు ఉల్లి రైతులు. 
ఉల్లిపాయలు మనం కొనుక్కుంటే రూ.10 నుండి రూ.30లు. ఉల్లి పండించిన రైతు అమ్ముకుంటే కేవలం ఒకే ఒక్క రూపాయి. ఏమిటీ దారుణం. అటు కష్టించి పండించిన రైతు నష్టాల్లో కూరుకుపోతుంటే మరోపక్క కొనుగోలు చేసిన వారు కూడా అదే తరహాలో నష్టపోతున్నారు. మోస పోతున్నారు. రైతులకు..వినియోగదారులకు మధ్యంలో దళారులు మాత్రం కష్టాన్ని క్యాష్ చేసుకుంటున్నారు. రైతుల రక్తాన్ని పిండేస్తున్నారు. దీంతో ఒళ్లు మండిన రైతన్నలు తమ నిరసనను వినూత్నంగా వ్యక్తంచేశారు. 
నష్టపోయిన అభ్యుదయ రైతు నిరసన..
ఓ ఉల్లి రైతు తన రెక్కల కష్టానికి ప్రతిఫలం నాలుగు నెలలకు 1,064 రూపాయలు. తాను పండించిన 750 కేజీల ఉల్లిపాయలను మార్కెట్‌లో అమ్ముకుంటే వచ్చిన మొత్తం అక్షరాలా 1,064 రూపాయలు. తన శ్రమకు దక్కిన ఈ అల్పాదాయంతో ఆ రైతు కడుపు రగిలిపోయింది. వెంటనే ఆ మొత్తాన్ని ప్రధానమంత్రికి మనియార్డర్‌ చేశారు. మహారాష్ట్రకు చెందిన సంజయ్‌ సాఠేకు ఎదురైన ఈ బాధాకర అనుభవం దేశంలో తీవ్ర నిర్లక్ష్యానికి గురవుతున్న అన్నదాతల కష్టాలకు నిలువెత్తు నిదర్శనం. దేశంలోని ఉల్లి ఉత్పత్తిలో ఉత్తర మహారాష్ట్రలోని నాసిక్‌ జిల్లాదే దాదాపు 50 శాతం. అదే జిల్లా నిఫాడ్‌కు చెందిన సంజయ్‌ ఓ అభ్యుదయ రైతు. 
2010లో నాటి అమెరికా అధ్యక్షుడు ఒబామా భారత పర్యటన సందర్భంగా ఆయనతో ముచ్చటించేందుకు వ్యవసాయ శాఖ ఎంపిక చేసిన రైతుల్లో ఆయన ఒకరు. ప్రస్తుత సీజన్‌లో 4 నెలలు శ్రమించి తాను పండించిన ఉల్లిని కొద్ది రోజుల క్రితం నిఫాడ్‌ టోకు మార్కెట్‌కు తీసుకెళ్లగా వర్తకులు కేజీ రూపాయికి అడిగారు. చివరకు బేరమాడటంతో రూ. 1.40కి ఒప్పందం కుదిరింది. ఆ రైతు చేతికి వచ్చింది రూ.1,064 మాత్రమే. దీంతో ఆయనకు కడుపు మండింది. నిరసన తెలుపుతూ ఆ మొత్తాన్ని ప్రధానమంత్రి కార్యాలయానికి చెందిన విపత్తు సహాయ నిధికి పంపించారు. దీనికి మనియార్డర్‌ చేయడానికి అదనంగా 54 రూపాయలు భరించారు.
మహారాష్ట్రలో మరో రైతన్న నిరసన..
మహారాష్ట్ర అహ్మద్ నగర్ జిల్లాలోని అభిలాలే అనే రైతు ముఖ్యమంత్రి దేవేంద్ర ఫడ్నావిస్కు 6 రూపాయల నగదు ఎంవో చేశాడు. జిల్లాలో టోకు మార్కెట్లో కిలో 1 రూపాయల మేరకు 2,657 కిలోల ఉల్లిపాయలు విక్రయించిన తర్వాత మార్కెట్ ఖర్చులు సర్దుబాటు చేసిన తరువాత ఆయన కేవలం రూ 6 మాత్రమే మిగిల్చారు. ఆ ఆరు రూపాయల్ని సీఎం ఫడ్నవీస్ కు ఎంవో పంపించి తమ నిరసనను వ్యక్తంచేశాడు. తమ పరిస్థితి సీఎంకు తెలియాలనే రూ.6 లను పంపించానని సదరు బాధిత రైతు తెలిపాడు.  కాగా ఉల్లిపాయల ఉత్పత్తిలో మహారాష్ట్ర పేరొందిన విషయం తెలిసిందే.
 

లండన్: భారతదేశంలోని బ్యాంకులకు రూ.9000 కోట్ల రూపాయల మేర రుణాలు ఎగ్గొట్టి 2016 లో విదేశాలకు పారిపోయిన కింగ్ ఫిషర్ అధినేత విజయ మాల్యాను భారత్ కు అప్పగించే అంశంపై లండన్ లోని వెస్ట్ మినిస్టర్ మెజిస్ట్రేట్ కోర్టు సోమావారం  తీర్పు చెప్పనుంది. ఈకేసు విచారణ నిమిత్తం సీబీఐకు చెందిన అధికారుల బృందం ఇప్పటికే లండన్  చేరుకుంది. కింగ్‌ఫిషర్‌ ఎయిర్‌లైన్స్‌ కోసం మాల్యా ఎస్‌బీఐతో సహా వివిధ భారతీయ బ్యాంకులలో రూ.9,000 కోట్ల మేర రుణాలు తీసుకుని వాటిని తిరిగి చెల్లించకుండా విదేశాలకు పారిపోయారని ప్రభుత్వం ఆరోపణ చేస్తోంది.మాల్యాపై అక్రమనగదు చలామణి,రుణాల నిధులు  మళ్లింపు ఆరోపణలు ఉన్నాయి. 2017 ఏప్రిల్ నుంచి బెయిల్ పై ఉన్న మాల్యాపై గత ఏడాది డిసెంబరు నుంచి వెస్ట్‌మినిస్టర్‌ మెజిస్ట్రేట్‌ కోర్టులో విచారణ జరుగుతోంది. మాల్యాను భారత్‌కు అప్పగించాలని సోమవారం కోర్టు తీర్పు ప్రకటిస్తే 28 రోజుల్లోగా బ్రిటన్‌ విదేశాంగ మంత్రి దానిపై నిర్ణయం తీసుకోవాలి. మాల్యా కూడా ఆ తీర్పును 14 రోజుల్లోపు బ్రిటన్‌ హైకోర్టులో సవాల్‌ చేయవచ్చు.  తీర్పు అప్పగింతకు వ్యతిరేకంగా వస్తే, భారత్‌ కూడా దీనిపై 14 రోజుల్లోగా అప్పీల్‌ చేయ్యవచ్చును.
 

 

ఢిల్లీ : ప్రధాని నరేంద్రమోదీ వ్యాఖ్యలు తీవ్ర వివాదాస్పందంగా పరిణమించాయి. రాజస్థాన ప్రచారంలో కాంగ్రెస్ జాతీయ ఉపాధ్యక్షురాలు సోనియా గాంధీపై మోదీ వ్యాఖ్యలు తీవ్ర దుమారాన్ని రేపాయి. రాజస్థాన్ లో పర్యటించిన ఆయన ఓ ప్రచార సభలో మాట్లాడుతూ చేసిన వ్యాఖ్యల వీడియో సామాజిక మాధ్యమాల్లో వైరల్ కాగా, కాంగ్రెస్ తీవ్రంగా మండిపడింది. ఆయన వ్యాఖ్యలు సోనియాగాంధీని ఉద్దేశించే చేశారని, తక్షణం క్షమాపణలు చెప్పాలని డిమాండ్ చేసింది.

"కాంగ్రెస్‌ పాల్పడిన పలు కుంభకోణాల్లో భాగమైన వితంతు పింఛను పథకంలోని పెద్ద మొత్తం ఏ కాంగ్రెస్‌ వితంతువు అకౌంట్ లోకి ఈ మొత్తం చేరిందో?" అని రాజస్థాన్ ఎన్నికల ప్రచారంలో ఘాటుగా వ్యాఖ్యానించారు. దీనిపై స్పందించిన సీడబ్ల్యూసీ సభ్యుడు సిద్ధరామయ్య..ప్రధాని దిగజారుడుతనానికి ఇది తాజా ఉదాహరణని అన్నారు. ఆయన తమ మాట్లతో ప్రధాని పదవికే కళంకం తెచ్చారని..ఈ వ్యాఖ్యలు మహిళలందరికీ అవమానమని నిప్పులు చెరిగారు. మాజీ ప్రధాని మన్మోహన్‌ సింగ్‌ నుంచి నరేంద్ర మోదీ నేర్చుకోవాల్సింది చాలా ఉందని సిద్ధరామయ్య సూచించారు. 
 

ఢిల్లీ: 2019  పార్లమెంట్ ఎన్నికల్లో బీజేపీ అధికారంలోకి రాకుండా అడ్డుకునేందుకు  ఏర్పాటైన బీజేపీయేతర పార్టీల  మావేశం సోమవారం మధ్యాహ్నం 3-30 గంటలకు పార్లమెంట్ హాలులో జరగనుంది. ఆంధ్రప్రదేశ్ ముఖ్యమంత్రి చంద్రబాబు నాయుడు దేశంలోని వివిధ రాజకీయ పార్టీలను సమన్వయం చేస్తూ ఈ సమావేశాన్ని ఏర్పాటు చేశారు.  ప్రస్తుతం 14 పార్టీల నాయకులు ఈకూటమికి మద్దతుతెలిపి నేటి సమావేశంలో పాల్గోంటున్నారు. డిసెంబర్ 11 మంగళవారం  5 రాష్ట్రాల ఎన్నికల ఫలితాలు వెలువడ్డాక మరికొన్ని పార్టీలు కూడా కూటమిలోకి వచ్చే అవకాశం ఉందని భావిస్తున్నారు. ఈ తొలి సమావేశానికి ఎవ్వరూ నాయకత్వం వహించటం లేదని, కాంగ్రెస్ పార్టీ అధక్షుడు రాహుల్ గాంధీ, టీడీపీ అధ్యక్షుడు చంద్రబాబు నాయుడు వంటినాయకుల సమన్వయంతో అన్నిపార్టీల నేతలు ఒకరికొకరు మాట్లాడుకుని ఒకే వేదికపైకి వస్తున్నారని కూటమి లోని నేతలు చెపుతున్నారు. 
ఈమధ్యాహ్నం జరిగే సమావేశంలో యూపీఏ అధ్యక్షురాలు సోనియాగాంధీ, కాంగ్రెస్‌ అగ్రనేతలు మన్మోహన్‌సింగ్‌, గులాంనబీ ఆజాద్‌, మల్లికార్జున ఖర్గే, అహ్మద్‌ పటేల్‌, తృణమూల్‌ కాంగ్రెస్‌ అధ్యక్షురాలు, పశ్చిమబెంగాల్‌  మఖ్యమంత్రి మమతా బెనర్జీ, యూపీ మాజీ ముఖ్యమంత్రి బీఎస్పీ అధినేత మాయావతి తరఫున ఆపార్టీకి చెందిన సతీశ్‌చంద్ర మిశ్ర, జేడీఎస్‌ అధ్యక్షుడు మాజీ ప్రధాని దేవెగౌడ లేదా ఆయన కుమారుడు కుమార స్వామి, సమాజ్ వాది పార్టీ తరుఫున ములాయంసింగ్ యాదవ్ లేదా ఆయన కుమారుడు అఖిలేష్ యాదవ్, ఆప్‌ కన్వీనర్ ఢిల్లీ ముఖ్యమంత్రి అరవింద్‌ కేజ్రీవాల్‌, సీపీఎం, సీపీఐ ప్రధాన కార్యదర్శులు సీతారాం ఏచూరి, సురవరం సుధాకర్‌రెడ్డి, ఎన్సీపీ అధ్యక్షుడు శరద్‌ పవార్‌, ఎన్‌సీ నేత ఫరూఖ్‌ అబ్దుల్లా, ఆర్‌ఎల్‌డీ అజిత్‌సింగ్‌, ఆర్‌జేడీనేత తేజస్వియాదవ్‌, ఝార్ఖండ్‌ మాజీ  ముఖ్యమంత్రి, జేఎంఎ నేత హేమంత్‌ సోరెన్‌, ఝార్ఖండ్‌ వికాస్‌ మోర్చా అధ్యక్షుడు బాబూలాల్‌ మరాండీ, డీఎంకే నేత స్టాలిన్‌, లోక్‌తాంత్రిక్‌ జనతాదళ్‌ అధ్యక్షుడు శరద్‌ యాదవ్‌, రాష్ట్రీయ లోక్‌సమతాపార్టీ నేత ఉపేంద్రకుష్వాహా, అసోం యునైటెడ్‌ డెమొక్రటిక్‌ ఫ్రంట్‌ నేత బద్రుద్దీన్‌ అజ్మల్‌ పాల్గొంటున్నారు. పుదుచ్చేరి  ముఖ్యమంత్రి నారాయణస్వామితోపాటు, ఎల్డీఎఫ్‌ నేత ‌కేరళ ముఖ్యమంత్రి పినరయి విజయన్ లనూ ఈ సమావేశానికి ఆహ్వానించారు. కొందరు  నాయకులకు ఆహ్వానాలు అందినా వేర్వేరు కారణాలతో ఈ సమావేశానికి రాలేక పోతున్నట్లు తెలిపారు. 
ఇది తొలిసమావేశం కనుక భవిష్యత్తులో భావసారూప్యం గల మరికొన్ని పార్టీలు కూటమి లో చేరతాయని  కూటమినేతలు భావిస్తున్నారు. దేశంలో రైతాంగ సమస్యలు, నిరుద్యోగం,రఫేల్‌  యుద్దవిమానాల కుంభకోణం,  పెద్దనోట్ల రద్దు వల్ల ప్రజల కష్టాలు, జీఎస్‌టీ వల్ల చిన్న   వ్యాపారుల కష్టాలు ,  పెరిగిపోయిన చమురు ధరలు, రాజకీయ ప్రత్యర్థులపై ఈడీ, ఐటీ దాడులు వంటి ప్రధాన అంశాలను ఈ సమావేశంలో  చర్చించి ఒక ప్రణాళిక రూపొందించనున్నారు. మంగళవారం నుంచి జరిగే పార్లమెంట్ శీతాకాల సమావేశాలలో అన్ని పార్టీలు ఓకే మాటతో ప్రభుత్వ వైఫల్యాలను ఎండగడుతూ బీజేపీ ప్రభుత్వాన్ని ఇరుకున పెట్టేందుకు  ప్రణాళిక రూపొందించుకొనున్నారు. భవిష్యత్తులో  బీజేపీయేతర కూటమిని ఎలా  ముందుకుతీసుకెళ్లలనే అంశంపై నేతలు  తమ ఆలోచనలు  అభిప్రాయాలు వెలిబుచ్చి ఒకకార్యాచరణ ప్రణాళిక రూపోందించనున్నారు.   కూటమిలోని కొన్ని పార్టీల మధ్య వారి వారి రాష్ట్రాల్లో ప్రత్యక్ష పోటీ ఉంది.  అలాంటి చోట్ల ఎలా వ్యవహరించాలి, జాతీయ స్ధాయిలో ఎలా వ్యవహరించాలి అనే అంశాలపై కూడా నేతలు ఒక అవగాహనకు రానున్నారు. 
 

జైపూర్ : ఓ వైపు మహారాజ కుటుంబాల వివాహాలు అంగరంగ వైభవంగా జరుగుతుంటే జైపూర్ రాజకుమారి విడాకుల కోసం దరఖాస్తు చేసుకోవడం సంచలనం సృష్టిస్తోంది. జైపూర్ యువరాణి దియా కుమారి 21 ఏళ్ల క్రితం నరేంద్ర సింగ్‌తో వివాహం జరిగింది. ఈమె ఎమ్యెల్యేగా కూడా పని చేశారు. 
జైపూర్ సంస్థానం ప్రముఖమైంది...
రాజస్థాన్ మహారాజ కుటుంబాల్లో జైపూర్ సంస్థానం ప్రముఖమైంది. మహారాజ భవానీసింగ్ కుమార్తె జైపూర్ రాజకుమారి దియాకుమారి వయస్సు 47 ఏళ్లు. ఈమెది ప్రేమ వివాహం. 9 ఏళ్ల పాటు డేటింగ్ చేసి మరీ...నరేంద్ర సింగ్‌ను పెళ్లాడారు.
బీజేపీ తరపున ఎమ్మెల్యే...
వీరి వివాహం 1997లో జరిగింది. వీరికి ఒక కుమార్తె...ఇద్దరు కుమారులున్నారు. తరువాత సవాయి మాధోపూర్ నియోజకవర్గం నుండి బీజేపీ తరపున ఆమె ఎమ్యెల్యేగా కూడా గెలిచారు. అయితే ఈసారి మాత్రం పోటీకి దూరంగా ఉన్నారు. ఇప్పుడు పరస్పర అంగీకారంతో విడాకుల కోసం దరఖాస్తు చేసుకున్నారే వార్త కలకలం రేపుతోంది. భర్తతో అభిప్రాయ భేదాలే ఇందుకు కారణమని తెలుస్తోంది. ఈ అంశంపై ఎక్కడా మాట్లాడకూడదని ఇద్దరూ నిర్ణయించుకున్నట్లు సమాచారం. 

రాజస్థాన్: భారత వ్యాపార దిగ్గజం, రిలయన్స్ ఇండస్ట్రీస్ అధినేత ముకేష్ అంబానీ కూతరు ఈషా అంబానీ ప్రీ వెడ్డింగ్ వేడుకలు సందడిగా సాగుతున్నాయి. సినీ, రాజకీయ ప్రముఖులతో పాటు అంతర్జాతీయ అతిథులు వేడుకలకు తరలివచ్చారు. ఉదయ్‌పూర్‌లోని ఒబెరాయ్‌ ఉదయ్‌విలాస్‌ వేదికగా ప్రీ వెడ్డింగ్ వేడుకలు నిర్వహిస్తున్నారు. ఈశా అంబానీ సంగీత్‌ వేడుకల్లో సినీ తారలే కాదు కుటుంబసభ్యులు కూడా డ్యాన్సులతో దుమ్మురేపారు. ముకేష్ అంబానీ భార్య నీతా అంబానీ తన డ్యాన్స్‌తో ఆకట్టుకున్నారు. అనంతరం ఈశా అంబానీ, ఆనంద్‌ పిరమాల్‌లు సైతం పలు బాలీవుడ్‌ పాటలకు డ్యాన్సులు చేశారు. దీంతోపాటు నీతా, ఆకాశ్‌, అనంత్‌లు సైతం మరోసారి ఈశా కోసం స్టెప్పులేశారు. గులాబీ రంగు గ్రాండ్‌ లెహంగాలో పెళ్లికూతురు ఈషా జిగేల్‌మంది. ఈశా-ఆనంద్‌ల చెయ్యి పట్టుకుని స్వయంగా ముకేష్ అంబానీ వేదిక మీదకు తీసుకొచ్చారు. అన్నదమ్ములు ముకేష్‌, అనిల్‌ అంబానీలు స్వయంగా దగ్గరుండి అతిథులకు స్వాగతం పలికారు.
హిల్లరీ క్లింటన్‌, వివిధ సంస్థల సీఈవోలు, బాలీవుడ్‌ ప్రముఖులు షారుక్‌ ఖాన్ దంపతులు‌, సల్మాన్‌ ఖాన్‌, ప్రియాంక చోప్రా దంపతులు, అభిషేక్ బచ్చన్, ఐశ్వర్యరాయ్‌, జాన్వి, అమీర్‌ఖాన్ దంపతులు తదితరులు ఈ వేడుకకు హాజరయ్యారు. డిసెంబర్ 8న ప్రారంభమైన రెండు రోజుల ప్రీ వెడ్డింగ్ వేడుకలు డిసెంబర్ 9తో ముగియనున్నాయి. 12న ముంబైలోని అంబానీ నివాసం యాంటీలియాలో ఈషా-ఆనంద్‌ల వివాహం అంగరంగ వైభవంగా జరగనుంది.

రాజస్థాన్: ప్రపంచ కుబేరుల్లో ఆయనొకరు. భారత్‌లో నెంబర్ 1 సంపన్నుడు. అలాంటి వ్యక్తి ఇంట వివాహం అంటే మాములుగా ఉంటుందా. భారత బిజినెస్ దిగ్గజం, రిలయన్స్ ఇండస్ట్రీస్ అధినేత ముఖేశ్ అంబానీ కూతురు ఈషా అంబానీ వివాహ వేడుకలు అంగరంగ వైభవంగా జరుగుతున్నాయి. ఇషా అంబానీ, ఆనంద్ పిరమాల్ వివాహం డిసెంబర్ 12న ముంబైలోని అంబానీ నివాసం యాంటీలియాలో జరగనుంది. పెళ్లికి ముందు రెండు రోజుల వేడుకను ఉదయ్‌పూర్‌లో ఘనంగా జరుపుతున్నారు. శనివారం రాత్రి ప్రారంభమైన వేడుకలు నేటితో(డిసెంబర్ 9) ముగియనున్నాయి. ఉదయ్‌పూర్‌లోని ఒబెరాయ్‌ ఉదయ్‌విలాస్‌ వేదికగా జరుగుతున్న ప్రీ వెడ్డింగ్ సెలబ్రేషన్స్‌కు సినీ, రాజకీయ ప్రముఖులు, అంతర్జాతీయ అతిథులు తరలివచ్చారు. అమెరికా మాజీ అధ్యక్షుడు బిల్‌క్లింటన్ భార్య హిల్లరీ క్లింటన్ కూడా విచ్చేశారు.
తారల ఆటాపాటా:
ఈషా అంబానీ సంగీత్‌లో బాలీవుడ్ తారలు సందడి చేశారు. తమ ఆటపాటలతో ఉర్రూతలూగించారు. కింగ్ ఖాన్ షారుక్ ఖాన్, అభిషేక్ బచ్చన్ దంపతులు ఆడిపాడారు. షారుక్ తన భార్య గౌరీ ఖాన్‌తో కలిసి డ్యాన్స్ చేశారు. అభిషేక్ బచ్చన్-ఐశ్వర్యరాయ్ కపుల్.. స్టెప్పులతో ఉత్సాహం నింపారు. వీరి డ్యాన్సులు సంగీత్‌లో స్పెషల్ అట్రాక్షన్‌గా నిలిచాయి. తారల డ్యాన్సుల ఫొటోలు సోషల్ మీడియాలో వైరల్ అయ్యాయి. బాలీవుడ్ కండల వీరుడు సల్మాన్ ఖాన్, అమీర్ ఖాన్, ముద్దుగుమ్మలు కత్రినా కైఫ్, ప్రియాంక చోప్రా, కరిష్మా కపూర్, జాక్వెలిన్ ఫెర్నాండెజ్ తదితరులు కూడా వేడుకకు తరలివచ్చారు.

 

 

 

 

ప్రపంచ కుబేరుల్లో ఆయనొకరు. భారత్‌లో నెంబర్ 1 సంపన్నుడు. అలాంటి వ్యక్తి ఇంట వివాహం అంటే మాములుగా ఉంటుందా. భారత బిజినెస్ దిగ్గజం, రిలయన్స్ ఇండస్ట్రీస్ అధినేత ముఖేశ్ అంబానీ కూతురు ఈషా అంబానీ వివాహ వేడుకలు అంగరంగ వైభవంగా జరుగుతున్నాయి. ఇషా అంబానీ, ఆనంద్ పిరమాల్ వివాహం డిసెంబర్ 12న జరగనుంది. పెళ్లికి ముందు రెండు రోజుల వేడుకను ఉదయ్‌పూర్‌లో ఘనంగా జరుపుతున్నారు. శనివారం రాత్రి ప్రారంభమైన వేడుకలు నేటితో(డిసెంబర్ 9) ముగియనున్నాయి. ప్రీ వెడ్డింగ్ సెలబ్రేషన్స్‌కు సినీ, రాజకీయ ప్రముఖులు, అంతర్జాతీయ అతిథులు తరలివచ్చారు. అమెరికా మాజీ అధ్యక్షుడు బిల్‌క్లింటన్ భార్య హిల్లరీ క్లింటన్ కూడా విచ్చేశారు.

Image result for isha ambani

ఈషా అంబానీ ప్రీ వెడ్డింగ్ వేడుకల ఎఫెక్ట్ ముంబైలోని ఛత్రపతి శివాజీ ఇంటర్నేషనల్ ఎయిర్‌పోర్టుపై పడింది. ఎయిర్‌పోర్టులో ఒక్కఃసారిగా విమాన రాకపోకలు పెరిగిపోయాయి. ప్రైవేటు ఫ్లైట్లు, విమానాలతో కిక్కిరిసిపోయింది. ప్రీ వెడ్డింగ్ వేడుకల్లో పాల్గొనేందుకు పెద్ద సంఖ్యలో ప్రముఖులు తమ ప్రైవేట్ ఫ్లైట్స్‌లో తరలివచ్చారు. ఈ క్రమంలో ముంబైలోని విమానాశ్రయం సరికొత్త రికార్డ్ సృష్టించింది. ఈ ఎయిర్‌పోర్టులో ఒకే రోజు 1007 విమాన రాకపోకలు నడిచాయి. ఇది సరికొత్త రికార్డు. గతంలో 1003 విమానరాకపోకలు నడిచాయి. ఆ రికార్డు ఇప్పుడు బ్రేక్ అయ్యింది. 8, 9న ఈషా-ఆనంద్ ప్రీ వెడ్డింగ్ సెలబ్రేషన్స్ అయ్యాక.. డిసెంబర్ 12న అంగరంగ వైభవంగా వివాహ వేడుక జరగనుంది.

ప్రయాగ్ రాజ్ : వచ్చేసంవత్సరం జనవరిలో  ప్రయాగ్ రాజ్ లో జరిగే కుంభమేళాను  కేంద్ర ప్రభుత్వంతో  కలిసి విజయవంతంగా నిర్వహిస్తామని ఉత్తర ప్రదేశ్ ముఖ్యమంత్రి యోగి ఆదిత్యనాధ్ చెప్పారు. కుంభమేళా ఏర్పాట్లు పర్యవేక్షించటానికి ప్రయాగ్ రాజ్వచ్చిన ఆయన విలేకరులతోమాట్లాడుతూ...‘‘ప్రపంచంలోనే  జరిగే అతిపెద్ద  హిందూ  ఆథ్మాత్మిక, సాంస్కృతిక వేడుక ఇది... కేంద్ర, రాష్ట్ర ప్రభుత్వాల సంయుక్త సహకారంతో కుంభమేళాను బ్రహ్మాండంగా నిర్వహిస్తాం, కుంభమేళా కోసం కేంద్ర, రాష్ట్ర ప్రభుత్వాలు రెండూ సంయుక్తంగా ఏర్పాట్లు చేస్తున్నాయి...’’ అని  చెప్పారు. కుంభమేళా ఏర్పాట్లు పై చర్చించేందుకు యోగి  గువారం  ఢిల్లీ వెళ్లి ప్రధానితో చర్చించి వచ్చారు. 45 రోజుల పాటు  జరిగే కుంభమేళా జనవరి  15న ప్రయాగ్ రాజ్ లోని త్రివేణి సంగమం వద్ద జరుగుతుంది, ప్రపంచం నలుమూలలనుంచి లక్షలాది మంది హిందువులు పుణ్యస్నానాలు చేయటానికి ప్రయాగరాజ్ తరలి వస్తారు.
 

 

బెంగుళూరు: కట్టుకున్న భార్యకు వాట్సప్ ద్వారా తలాక్ చెప్పి అమెరికా పారిరపోయాడో ప్రబుద్దుడు. బెంగుళూరుకు చెందిన డాక్టర్ జావేద్ ఖాన్, రేష్మా అజీజ్ లకు 2003 లో వివాహాం అయ్యింది, వివాహనంతరం కొత్త జంట ఇంగ్లండ్ లో కాపురం  పెట్టారు. వీరికి 13 ఏళ్లకూతురు, 10 ఏళ్ళకుమారుడు ఉన్నాడు. ఇటీవలే వీరు  అమెరికాకు మకాం మార్చారు. గత కొంత కాలంగా  భార్యాభర్తల మధ్య గొడవలు వచ్చాయి. దీంతో ఇరువైపులా కుటుంబ సభ్యులు సమస్యను పరిష్కరించటానికి ప్రయత్నించారు. బెంగుళూరు వెళ్లి సమస్య చర్చిద్దాం రమ్మని నవంబర్ 30న  బెంగుళూరు చేరుకున్నారు. తాను వెనుక వస్తానని చెప్పి  భర్త జావేద్ ఖాన్ భార్య పిల్లలను కెంపెగౌడ విమానాశ్రయం బయట కారు ఎక్కించి ఇంటికి పంపించాడు. భర్త మాటలు నమ్మిన రేష్మా ఇంటికి వెళ్లింది. కానీ భర్త ఎంతకీరాకపోవటంతో ఆమెకు అనుమానంవచ్చింది. ఈ వారం ప్రారంభంలో భర్త ఫోన్ నుంచి 3సార్లు తలాక్ చెపుతూ వాట్సప్  మెసేజ్ పంపించాడు  జావేద్. దాంతో తాను మోసపోయనని తెలుసుకున్న రేష్మా బెంగుళూరు నార్త్ జోన్ పోలీసులకు ఫిర్యాదు చేసింది. ప్రయాణంలో ఉండగానే రేష్మా పాస్ పోర్టు వీసా,కొంత నగదును, ఆభరణాలను భర్త తీసుకున్నాడని ఆమె ఆరోపించింది. విమానాశ్రయం నుంచి ఇంటికి రాకుండా తిరిగి తన భర్త అమెరికా వెళ్లిపోయాడని రేష్మా పోలీసులకిచ్చిన ఫిర్యాదులో  పేర్కోంది. 
 

ఢిల్లీ : అయోధ్య తేనెతుట్టను కదిలించారు. హిందుత్వ వాదులు ధర్మసభలు నిర్వహిస్తున్నారు. రామ మందిరం నిర్మాణంపై వీహెచ్‌పీ పోరును మరింత ఉధ‌ృతం చేస్తోంది. సార్వత్రిక ఎన్నికలు పూర్తయ్యేలోపు అయోధ్యలో రామమందిర నిర్మాణం జరగాలన్న డిమాండ్లు మరలా తెర మీదకు తీసుకొచ్చాయి. సుప్రీంకోర్టులో కేసు విచారణ ఆలస్యమౌతుందన్న కారణంగా..కేంద్రం ఆర్డినెన్స్ తీసుకొచ్చి ఆలయాన్ని నిర్మాణం చేయాలని డిమాండ్ చేస్తున్నారు. 
తరలివస్తున్నలక్షలాది మంది...
ప్రధానంగా విశ్వహిందు పరిషత్ పలు కార్యక్రమాలు నిర్వహిస్తూ కేంద్రంపై వత్తిడి తేవడానికి ప్రయత్నిస్తోంది. కొద్దిరోజుల్లో పార్లమెంట్ శీతాకాల సమావేశాలు ప్రారంభం కానున్న నేపథ్యంలో వీహెచ్‌పీ ధర్మసభలు నిర్వహిస్తోంది. ఈ మేరకు డిసెంబర్ 09వ తేదీ ఢిల్లీలోని రామ్‌లీలా మైదాన్‌లో భారీ బహిరంగసభ నిర్వహిస్తోంది. ఈ సభలో పాల్గొనడానికి వివిధ రాష్ట్రాల నుండి లక్షలాది మంది తరలివస్తున్నారు. పార్లమెంట్ శీతాకాల సమావేశాల్లో రామ మందిరం బిల్లు తేవాలని డిమాండ్ చేస్తున్నాయి. 
ఆలయం పూర్తయితే సమస్యలు పరిష్కారమౌతాయి...
రామ మందిరం నిర్మించిన తరువాతే ఓట్లు అడగడడానికి ముందుకు రావాలని నేతలు డిమాండ్ చేస్తున్నారు. రామ మందిరం నిర్మాణమయితే దేశంలో ఎన్నో సమస్యలు పరిష్కారమౌతాయని పేర్కొంటున్నారు. మరి ఈ సభతో కేంద్రం ఎలాంటి వైఖరి కనబరుస్తుందో వేచి చూడాలి. 

ఢిల్లీ: పార్లమెంట్ శీతాకాల సమావేశాలు ఈనెల 11నుంచి ప్రారంభంకానున్నాయి. అదేరోజు 5 రాష్ట్రాల అసెంబ్లీ ఎన్నికల ఫలితాలు విడుదలవుతున్నాయి. లోక్ సభలో అధికార బీజేపీని నిలదీసేందుకు ప్రస్తావించవలసిన అంశాలపై చర్చించేందుకు 10వతేదీ సోమవారం బీజేపీయేతర పక్షాలు ఢిల్లీలో సమావేశం అవుతున్నాయి. వచ్చే లోక్ సభ ఎన్నికల్లో బీజేపీని గద్దె దించటానికి బీజేపీయేతర పార్టీల మద్దతు కూడగడుతున్న టీడీపీ అధ్యక్షుడు చంద్రబాబునాయుడు ఈసమావేశానికి బీజేపీయేతర పార్టీల నేతలను ఆహ్వానించారు. 
సీబీఐలో అంతర్గత విభేదాలు, న్యాయపరిపాలన వ్యవస్ధ నిర్వీర్యం రఫెల్ ఒప్పందాలు, వ్యవసాయ రంగం సంక్షోభం తో పాటు, బీజేపీ ని గద్దె దించటానికి భవిష్యత్తులో అనుసరించాల్సిన వ్యూహాలు, దేశ వ్యాప్తంగా ర్యాలీలు, సభలు నిర్వహణ, భవిష్యత్‌ కార్యచరణపై ఈ సమావేశంలో చర్చించే అవకాశం ఉన్నట్లు తెలుస్తోంది. 
ఈ సమావేశానికి కేరళ, పంజాబ్‌, పుదుచ్చేరి, పశ్చిమబెంగాల్, కర్ణాటక సీఎంలు, అలాగే ములాయం సింగ్‌, అఖిలేష్‌, మాయావతి, ఫరూక్‌ అబ్దుల్లా, ఒమర్‌ అబ్దుల్లా..ఎన్సీపీ అధినేత శరద్‌పవార్‌, శరద్‌యాదవ్‌లను కూడా చంద్రబాబు ఆహ్వానించారు. కాంగ్రెస్ అధ్యక్షుడు రాహుల్‌ గాంధీ ఆధ్వర్యంలో మరికొంతమంది నేతలు ఈ సమావేశానికి హాజరుకానున్నారు.

Pages

Don't Miss