రాజ్యసభ..మళ్లీ అదే సీన్...

14:36 - December 5, 2016

ఢిల్లీ : రాజ్యసభలో గందరగోళ పరిస్థితులకు తెరపడడం లేదు. సభలు ప్రారంభమైనప్పటి నుండి ఈ రోజు వరకు గందరగోళ పరిస్థితులు నెలకొంటున్న సంగతి తెలిసిందే. పెద్దనోట్లు రద్దు అంశంపై చర్చించాలని, చర్చ సమయంలో ప్రధాన మంత్రి నరేంద్ర మోడీ సభలోనే ఉండాలని విపక్షాలు పట్టుబడుతున్న సంగతి తెలిసిందే. దీనితో పాటు మరికొన్ని కీలక అంశాలపై విపక్షాలు ఆందోళన చేపట్టాయి. దీనితో సభలు పలుమార్లు వాయిదా పడుతూ వస్తున్నాయి. సోమవారం నాడు ప్రారంభమైన రాజ్యసభలో విపక్ష నేతలు ఆందోళన చేపట్టారు. ప్రభుత్వానికి వ్యతిరేకంగా నినాదాలు చేశారు. మధ్యాహ్నం కొనసాగిన సభలో విపక్ష సభ్యులు స్పీకర్ పోడియాన్ని చుట్టుముట్టి నినాదాలు చేశారు. ఉద్యోగస్తులు వేతనాలు తీసుకోవడానికి చాలా ఇబ్బందులు పడుతున్నారని, ఆర్థిక మంత్రి జైట్లీ సభలో ఉన్నా సమాధానం చెప్పడం లేదని శుక్లా పేర్కొన్నారు. దీనిపై డిప్యూటి ఛైర్మన్ స్పందించారు. పోడియం వద్ద నిరసనలు తెలియచేస్తుంటే మంత్రి సమాధానం ఎలా చెబుతారని ప్రశ్నించారు. చివరకు మంగళవారం ఉదయం వరకు సభను వాయిదా వేస్తున్నట్లు డిప్యూటి ఛైర్మన్ వెల్లడించారు.

Don't Miss