తమిళనాడుకు కేంద్ర బలగాలు..

11:46 - December 5, 2016

తమిళనాడు : సీఎం జయలలిత ఆరోగ్య పరిస్థితి విషమంగా ఉన్నట్లు వార్తలు వస్తున్న నేపథ్యంలో కేంద్రం భద్రతా చర్యలను కట్టుదిట్టం చేసింది. చెన్నైకి జయ అభిమానులు, పార్టీ కార్యకర్తల తాకిడి గంటగంటకు పెరుగుతుండటంతో కేంద్రం మరిన్ని భద్రతా దళాలను రాష్ర్టానికి పంపించింది. కోయంబత్తూర్‌లో పోలీసుల భద్రతను పెంచారు. రాష్ట్రవ్యాప్తంగా పలు ప్రాంతాల్లో శాంతి భద్రతలకు విఘాతం కలగకుండా ఇప్పటికే కేంద్రం తొమ్మిది కంపెనీల ర్యాపిడ్ యాక్షన్ ఫోర్స్‌ను సిద్ధం చేసింది. కాగా ఆమె ఆరోగ్యంపై మ.12గంటలకు హెల్త్ బులిటెన్ విడుదల చేసే అవకాశం వున్నట్లుగా సమాచారం. ఏ క్షణంలోనైనా అవాంచనీయమైన ఘటనలు జరుగకుండా కేంద్రం అన్ని చర్యల్ని చేపట్టినట్లుగా కూడా తెలుస్తోంది. మరోవైపు ఆదివారం రాత్రి జయలలితకు సర్జరీ జరిగినట్లు కూడా సమాచారం. మరోవైపు జయ ఆరోగ్య పరిస్థితి గురించి కేంద్ర హోంమంత్రి రాజ్‌నాథ్‌సింగ్‌.. గవర్నర్‌కు ఫోన్‌ చేసి తెలుసుకున్నారు. ఈరోజు కేంద్రమంత్రులు నడ్డా, నితిన్‌ గడ్కరీలు చెన్నైకు రానున్నారు. మరోవైపు రాష్ట్రంలో ఎలాంటి ఉద్రిక్త పరిస్థితులు తలెత్తకుండా డీజీపీ.. పోలీసులను అప్రమత్తం చేశారు. పోలీసుల సెలవులను రద్దు చేశారు.. ఇప్పటికే సెలవుల్లో ఉన్నవారిని విధుల్లో చేరాలని ఆదేశించారు. జయ ఆరోగ్య పరిస్థితి దృష్ట్యా ఈరోజు విద్యాసంస్థలకు సెలవు ప్రకటించారు. ఈరోజు జరగనున్న పరీక్షలను రద్దు చేశారు. ఇక జయ ఆరోగ్యంపై రాష్ట్రపతి ప్రణబ్‌ ముఖర్జీ, ప్రధాని మోదీ స్పందించారు. ఆమె త్వరగా కోలుకోవాలని ట్వీట్‌ చేశారు. 

Don't Miss