'జయ' ఆరోగ్యంపై సందిగ్ధత..

18:54 - December 5, 2016

చెన్నై : అపోలో ఆసుపత్రి వద్ద సోమవారం సాయంత్రం ఉత్కంఠ వాతావరణం నెలకొంది. తమిళనాడు సీఎం జయలలిత చనిపోయిందంటూ తమిళ న్యూస్ ఛానెల్స్ ప్రసారం చేయడంతో తీవ్ర ఉద్రిక్తత వాతావరణం నెలకొంది. 75 రోజులుగా జయలలిత చికిత్స పొందుతున్న సంగతి తెలిసిందే. మృతి చెందారన్న వదంతులతో అన్నాడీఎంకే నేతలు, కార్యకర్తలు, అభిమానులు తీవ్ర ఆగ్రహానికి..ఉద్విగ్నానికి గురై వీరంగం సృష్టించారు. పోలీసులు..ఆసుపత్రి పైకి రాళ్లు రువ్వారు. హుటాహుటిన అపోలో ఆసుపత్రి వైద్యులు స్పందించారు. ఇలాంటి వదంతులు ఎవరూ నమ్మవద్దని అపోలో ఎండీ పేర్కొన్నారు. కొన్ని ఛానెల్స్ నిరాధారణమైన వార్తలు ప్రసారం చేస్తున్నారని, అమ్మ బతికే ఉందని వెల్లడించారు. వైద్యులు జయ ఆరోగ్యాన్ని ప్రతిక్షణం పర్యవేక్షిస్తున్నారని తెలిపారు.

తప్పును సరిదిద్దుకున్న ఏఐఏడీఎంకే నేతలు..
'జయ' ఛానెల్స్ లో సైతం 'అమ్మ' మృతి చెందారన్న వార్త ప్రసారం చేసిందని తెలుస్తోంది. ఏఐఏడీఎంకే నేతలు తప్పును సరిదిద్దుకున్నారు. సీఎం జయలలిత మృతి చెందారన్న తమిళ న్యూస్ ఛానెళ్ల కథనాలతో ప్రధాన కార్యాలయంలోని పార్టీ జెండాను అవనతం చేశారు. 'అమ్మ' బతికే ఉందని అపోలో వైద్యులు పేర్కొనడంతో తిరిగి పార్టీ జెండాను తిరిగి పైకి ఎత్తారు. ఇదిలా ఉంటే కాసేపటి క్రితం కేంద్ర మంత్రి వెంకయ్య నాయుడు అపోలో ఆసుపత్రికి చేరుకున్నారు. సీఎం జయలలిత ఆరోగ్య పరిస్థితిపై వైద్యులతో మాట్లాడుతున్నారు. ఆయనతో పాటు రాష్ట్ర గవర్నర్ విద్యాసాగర్ రావు కూడా ఉన్నారు.

Don't Miss